डेढ महिनादेखि सडक अवरुद्ध

जिल्लामा दैनिक उपभोग्य वस्तु र निर्माण सामग्री अभाव
राजबहादुर शाही

मुगु — अविरल वर्षाका कारण गमगढी–नाग्मा सडक डेढ महिनादेखि अवरुद्ध भएको छ । लामो समयसम्म सडक सुचारु नहुँदा जिल्लामा दैनिक उपभोग्य वस्तु र निर्माण सामग्री अभाव हुन थालेको छ । सडक बन्द भएपछि स्थानीयवासी घण्टौं पैदलयात्रा गर्न बाध्य छन् ।

बर्षाका कारण गमगढी–नाग्मा सडक अबरुद्ध भएपछि अलपत्र परेका यात्रु । तस्बिर : राजबहादुर

वर्षाका कारण गमगढी–नाग्मा सडकको घुच्ची सातमोड, झयारी खोला, ताल्चा, मैतुडाँडालगायत स्थानमा पहिरो गएको छ । सडक जताततै हिलाम्मे बनेपछि गाडी चलाउन समस्या भएको व्यवसायीले जनाएका छन् ।

जुम्ला, सिजा क्षेत्रका विभिन्न स्थानमा माथिबाट ससाना पहिरो खसेकाले र रातो माटो हिलाम्मे भएकाले ठाउँठाउँमा गाडी फस्न थालेपछि यातायात सेवा बन्द भएको हो । नाग्मादेखि पिनाझयारी खोलासम्म पहिरो पन्छाएपछि पिनाझयारी खोलासम्म फाटफुट सवारीसाधन आउजाउ गर्ने गरेका छन् तर अन्य स्थानमा समस्या भएको चालकको गुनासो छ ।

Yamaha

सुर्खेत र नेपालगन्जबाट मुगु आएका अधिकांश सवारीसाधन बीच बाटामै रोकिएका छन् । व्यापारीहरूको सामान बीच बाटामै अलपत्र परेपछि दैनिक उपभोग्य सामानको अभाव हुन थालेको हो । ग्यास, डिजेल, सिमेन्ट, फलामे रडलगायत अभाव देखा परेको व्यवसायीले जनाएका छन् ।

सडक अवरुद्ध हुँदा चामल, ग्यास, मैदा, तेललगायत उपभोग्य वस्तुको अभाव हुँदै गएको रवीन्द्र ट्रेडर्स एन्ड सप्लायर्सका प्रोपराइटर रवि रावतले बताए । उनका अनुसार गमगढीमा ग्यास प्रतिसिलिन्डर २ हजारबाट मूल्य बढेर २ हजार ५ सय पुगेको छ । ढुवानीको समस्याले ग्यासको मूल्य बढाउनुपरेको उनले जाए ।

सुर्खेत र नेपालगन्जबाट निजी गाडी तथा साना जिपमा आएका स्थानीयलाई गमगढी पुग्न चार दिनसम्म लाग्ने गरेको छ । सडकको हिलो पहिरो पन्छाउँदै जिप धकेल्दै यात्रा गर्नुपर्ने बाध्यता रहेको स्थानीय विनोदकुमार मल्लले बताए ।

नजिकिँदै गरेको चाडबाडमा दैनिक उपभोग्य बस्तुको अभाव हुन नदिन सडक डिभिजन कार्यालयसँग समन्वय गरेर सडक खुलाउने प्रयास भइरहेको उद्योग वाणिज्य संघले जनाएको छ । कच्ची सडकले गर्दा हिउँद र बर्खा दुबैमा जिल्लावासीले सास्ती खेप्नुपरेको उद्योग वाणिज्य संघका अध्यक्ष कमल बुढाले बताए ।

स्काभेटर लगाएर सडक खुलाउने प्रयास भइरहेको सडक डिभिजन प्रमुख माधव अधिकारीले बताए । सडक अवरुद्ध भएपछि छिमेकी जिल्ला हुम्लाका बासिन्दासमेत प्रभावित भएका छन् । सर्केघाट, चंखेली र अदानचुली गाउँपालिकाका स्थानीयले मुगुबाटै खाद्यान्न तथा दैनिक उपभोग्य बस्तु लिने गरेका छन् ।

नेपाली सेनाले ट्रयाक खोलेपछि २०६९ सालबाट गमगढीसम्म यातायातका साधन सञ्चालन हुन थालेका हुन् । सडक खुलेको लामो समय बित्दासमेत कालोपत्रे नभएपछि असारदेखि भदौसम्म र पुसदेखि माघसम्म सडक अवरुद्ध हुने गरेको छ । वर्षामा अविरल वर्षा र हिउँदमा हिउँले यातायात सेवा अवरुद्ध हुने गरेको हो ।

त्यस्तै खत्याड गाउँपालिकासँग सदरमुकामलाई जोडिएको गोठीज्युला कालाकाँडा सडक पनि दुई महिनादेखि बन्द छ । ३२ किलोमिटरको सडक बन्द भएपछि गाउँमा समेत दैनिक उपभोग्य सामान अभाव हुन थालेको छ ।

उक्त सडकखण्डको भत्तेरछहरामा सडक भत्किएपछि यातायात सेवा बन्द भएको हो । खत्याडस्थित गम्था गाउँका गोविन्द सन्ज्यालले सडक अवरुद्ध भएपछि जुम्लाको गोठिज्युलाबाट सामान पिठ्यूँमा बोकेर ल्याउनुपर्ने बाध्यता भएको बताए । सडक बन्द भएपछि दैनिक उपभोग्य सामान र निर्माण सामग्री अभाव भएको गम्थाका व्यापारी लोकराज दाहालले बताए ।

गाउँका पसलमा सामान खोज्दाखोज्दै भौतारिनुपर्ने बाध्यता रहेको उनको भनाइ छ । पाँच वर्षअघि ड्रिलिप प्रोजेक्टले निर्माण गरेको गोठिज्युला–कालाकाडा सडक पनि स्तरोन्नति नहुँदा समस्या भएको उनले गुनासो गरे । उनका अनुसार सडकका कारण स्थानीयले वर्षौंदेखि सास्ती पाइरहेका छन् ।

Esewa Pasal

प्रकाशित : भाद्र १९, २०७५ १०:४१
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

ओझेलमा मुगु गाउँ

राजबहादुर शाही

मुगु — पूर्वाधार विकास तथा प्रचारप्रसार अभावले पर्यटकीय सम्भावना बोकेको मुगु गाउँ ओझेलमा परेको छ ।

पर्यटकीय गन्तव्य मुगु गाउँ । तस्बिर : राजबहादुर

रारापछि यहाँको उत्कृष्ट पर्यटकीय गन्तव्य मानिएको मुगु गाउँमा पर्यटक पुग्नै नसकेका हुन् । रारा आउने पर्यटकलाई अन्य पर्यटकीय स्थलमा पुर्‍याउन सके आर्थिक विकासले फड्को मार्ने सम्भावना हुँदाहँुदै पनि त्यसका लागि पहल भएको छैन ।

पर्यटन व्यवसायी राजु कार्कीले रारादेखि मुगु गाउँसम्मको यात्रामा पर्यटकले भरपुर आनन्द लिन सक्ने बताए । उनले भने, ‘अहिले डोल्पाको सेफोक्सुण्डो ताल घुमेर हयाजिमथान हुँदै हिमाली पदमार्गबाट आएका केही पर्यटकले मुगु गाउँको भ्रमण गर्ने गरेका छन् ।’ रारादेखि मुगु गाउँ हुँदै तिब्बत भएर मानसरोवर र डोल्फु नाका जान विदेशी पर्यटक उत्साही भएको उनले जनाए ।

मुगमकार्मारोङ गाउँपालिकास्थित पर्यटकीय गन्तव्य मुगु गाउँ समुद्र सतहदेखि करिब १२ हजार पाँच सय फिटको उचाइमा अवस्थित छ । रारा भ्रमणमा आउने पर्यटकलाई प्याकेजमा अन्य पर्यटकीय क्षेत्रको भ्रमणमा लैजान जरुरी रहेको जिल्ला समन्वय समितिका प्रमुख पूर्णबहादुर रोकायाले बताए । ‘रारामा एउटा ताल मात्र छ, बाम गाउँभित्र सातवटा ताल छन्,’ उनले भने, ‘त्यहाँ अहिलेसम्म कुनै पर्यटक पुग्न सकेका छैनन् ।’ मुगु गाउँमा तामाङ जाति र बौद्ध धर्मावलम्बीको बसोबास छ । मुगम गाउँपालिकाका १२ वटा बस्तीमा करिब १२ सय बढी चिटिम चैतन्य धार्मिकस्थल रहेको स्थानीयको भनाइ छ । मुगु गाउँमा प्रत्येक ढुंगामा तिब्बती भाषाले कँुदिएका अक्षर देख्न पाइन्छ ।

गाउँलाई सुक्खा मरुभूमिको मानव बस्तीको रूपमा चिनिने गरिएको छ । यहाँका जनजाति व्यवसायबाट आत्मनिर्भर छन् । स्थानीयले घरघरै होमस्टेको अवधारणा ल्याएका छन् । यहाँ जाने पर्यटकले भोटे चिया, आलु तथा फापरका परिकार, तिब्बती चामलको भातलगायत परिकारको स्वाद लिन पाउने स्थानीयको भनाइ छ ।

रारा आउने पर्यटकका लागि मुगु गाउँ, कोइजी मरक्का हिमाल हुँदै तामाखानी र छायानाथ तीर्थस्थलसम्म घुम्ने पदमार्ग निर्माणको काम भइरहेको मुगमकार्मारोङ गाउँपालिकाका अध्यक्ष छिरिङक्याप्ने लामाले बताए । ‘पूर्वी मुगुमा पुरानो बौद्ध संस्कृति, खानी, वन्यजन्तुलगायत अवलोकन गर्ने व्यवस्था छ,’ उनले भने, ‘पदमार्ग निर्माण भएपछि विदेशी पर्यटकसमेत आकर्षित हुनेछन् ।’ यात्रा क्रममा झारल, घोरल, मृग, कस्तुरी, नाउर, कालिजलगायत वन्यजन्तु हेर्न सकिने उनले जनाए ।

शान्ति स्थापना भएसँगै विदेशी पर्यटक मुगु घुम्न आउन थालेको स्थानीय अगुवा टाँसी तामाङले बताए । उनका अनुसार मुगु गाउँदेखि तिब्बत पुग्न दुई दिनको पैदल यात्रा गर्नुपर्छ । गमगढीदेखि लुम्स गाउँसम्म जिपमै यात्रा गर्न सकिने सुविधा छ । त्यहाँबाट पैदल यात्रा गर्न सकिन्छ । पर्यटकका लागि छाइल, ढुंगेधारा, पुलु र चितै बगरमा होटलको व्यवस्था छ ।

प्रकाशित : भाद्र १७, २०७५ १०:५६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT