अविरल वर्षाका कारण डोल्पाको सदरमुकाम दुनैमा रहेको जैरिगाड साना जलविधुत केन्द्रको नहरलाई सोमबार साँझ आएको पहिरोले भत्काएपछि विद्युत आपूर्ति बन्द भएको छ । विद्युत आपूर्ति बन्द हुँदा यस जिल्लाको सदरमुकाम दुनै अन्धकारमय बनेको छ ।
कालिमाटी गाउँपालिकाको बडाढुंगामा रहेको टावरमा आएको खराबीका कारण गाउँपालिका क्षेत्र एक महिनादेखि सञ्चारविहीन बनेको छ । यहाँका झण्डै १७ हजार घरपरिवार प्रभावित भएका छन् ।
शिक्षक सेवा आयोगको परीक्षाको केन्द्र जिल्लामै राख्न परीक्षार्थीले माग गरेका छन् । आयोगले प्राथमिकदेखि माध्यमिक तहसम्मको स्थायी पदपूर्तिका लागि खुला विज्ञापन गरेको छ ।
अविरल वर्षाका कारण गमगढी–नाग्मा सडक डेढ महिनादेखि अवरुद्ध भएको छ । लामो समयसम्म सडक सुचारु नहुँदा जिल्लामा दैनिक उपभोग्य वस्तु र निर्माण सामग्री अभाव हुन थालेको छ । सडक बन्द भएपछि स्थानीयवासी घण्टौं पैदलयात्रा गर्न बाध्य छन् ।
जिल्ला कृषि विकास कार्यालयको भवमा कृषि ज्ञान केन्द्र स्थापना गर्न लागिएको छ । मुसीकोट नगरपालिका–१, स्थित भवनबाट रुकुम पश्चिम र सल्यान जिल्लामा काम गर्ने गरी ज्ञान केन्द्र स्थापना हुन लागेको हो ।