विद्यालयमा अपांगमैत्री भवन

एलपी देवकोटा

जुम्ला — तिला गाउँपालिका–२, भुङ्गेडी स्थित कालिका आधारभूत विद्यालयमा अपांगमैत्री भवन निर्माण गरिएको छ । अपांगमैत्री भवन निर्माण भएपछि बिभिन्न शारीरिक समस्या भएका विद्यार्थीको पठनपाठन सहज बनेको छ ।

जुम्लास्थित कालिका आधारभूत विद्यालयमा निर्माण भइरहेको अपांगमैत्री भूकम्प प्रतिरोधी भवन । तस्बिर : एलपी

शारीरिक अशक्तता भएका तिला गाउँपालिका–२ का हरियो नेपालीले यसअघि विद्यालयको पुरानो भवनमा बसेर पढ्दा विभिन्न समस्या आएको बताए । ‘जीर्ण भवन त्यसमा पनि अपांगमैत्री कक्षा कोठा नहुँदा पठनपाठनमा समस्या थियो,’ उनले भने, ‘समान्य कक्षाकोठाभित्र बसेर पढ्दा सिकाइमा समस्या भोग्नुपरेको थियो, अपांगमैत्री भवन बनेपछि पठनपाठन पनि गुणस्तरीय हुने अपेक्षा छ ।’

उनी विद्यालयमा कक्षा ६ मा अध्ययनरत छन् । अपांगता भएका टेक बोहोराले भवनका कारण सिकाइको स्तर अब माथि उठ्ने जनाए । ‘नयाँ बनेको भवनमा सहजै आवतजावत गर्ने सकिने भएको छ,’ उनले भने, ‘कक्षा कोठा पनि अपांगमैत्री भएकाले पठनपाठनका लागि सास्ती भोग्नु नपर्ने भयो ।’ विद्यालयमा कक्षा ८ सम्म पठनपाठन भइरहेको छ ।

Yamaha

विद्यालयमा सात वटा मात्रै कोठा भएकाले अन्य विद्यार्थीको पठनपाठनमा समेत समस्या थियो । विद्यालयका प्रधानाध्यापक लालबहादुर बुढाले भूकम्प प्रतिरोधात्मक चार कोठे पक्की भवन बनेपछि विद्यार्थी खुसी भएको बताए । ‘अरू साथीहरूसँग बसेर पढ्दा विद्यार्थीलाई धेरै समस्या थियो,’ उनले भने, ‘अब पठनपाठन पनि व्यवस्थित हुनेछ ।’

विद्यालयमा तीन सय ५४ जना विद्यार्थी अध्ययनरत छन् । अपांगता भएका एक दर्जन विद्यार्थीले अध्ययन गर्दै आइरहेका छन् । ‘विद्यालयमा कक्षा कोठा अभावका कारण एक सय ४० जनासम्म विद्यार्थीलाई एउटै कोठामा राखेर पढाउनुपर्ने बाध्यता थियो,’ उनले भने, ‘अब त्यो झन्झटबाट पनि मुक्ति पाइयो ।’

प्लान नेपालको सहयोगमा सांग्रिला एसोसिएसनले ८० लाख रुपैयाँको लागतमा अपांगमैत्री भवन र छात्रछात्राका लागि चर्पीसमेत निर्माण गरेको सांग्रिला एसोसिएसनका प्रोग्राम म्यानेजर जय श्रेष्ठले बताए ।

विद्यार्थीको चाप धेरै भएको र कक्षा कोठाहरू साँघुरो र कम भएकाले भवन निर्माणमा सहयोग गरेको उनको भनाइ छ । संस्थाले खानेपानीको समस्यासमेत समाधान गरेको उनले जनाए । गाउँमा अपांगमैत्री विद्यालय भवन बनेपछि लिही गाउँका स्थानीय समेत खुसी भएको अभिभावक पूर्ण रावतले बताए ।

Esewa Pasal

प्रकाशित : भाद्र २६, २०७५ १०:०३
प्रतिक्रिया
पठाउनुहोस्

एचआईभीले १ वर्षमा १६ को मृत्यु

कान्तिपुर संवाददाता

कपिलवस्तु — जिल्लामा एड्स भएर एक वर्षमा १६ जनाको मृत्यु भएको छ । समयमा उपचार नपाउँदा तिनीहरूको मृत्यु भएको हो । गत आव ०७४/७५ मा नौ पुरुष, चार महिला, दुई बालक र एक तेस्रो लिंगीको मृत्यु भएको जनस्वास्थ्य कार्यालयले जनाएको छ ।

औषधि सेवनका लागि एआरटी सेन्टरमा सम्पर्क नराख्नेले ज्यान गुमाएको जनस्वास्थ्य कार्यालयका एचआईभी फोकल पर्सन मोहम्मद इरफान खाँले बताए । औषधि सेवनमा लापरबाही गर्नेको मृत्यु हुने गरेको उनले बताए ।


जिल्लामा ३ सय ७२ संक्रमित औषधि सेवन गरिरहेका छन् । ‘९० प्रतिशतभन्दा बढीमा असुरक्षित यौन सम्पर्कका कारण एचआईभी संक्रमण भएको पाइएको छ,’ स्वास्थ्य कार्यालयका फोकल पर्सन खाँले भने, ‘त्यसबारेमा मात्र सचेतना जगाउन सके जिल्लामा एचआईभी संक्रमणको जोखिम कम हुँदै जानेछ ।’ संक्रमितको स्वास्थ्य परीक्षणका लागि सहज सुविधा दिए पनि एआरटी सेन्टरसम्म नआउने जनस्वास्थ्य कार्यालय प्रमुख योगेन्द्र भगतले बताए ।

प्रकाशित : भाद्र २६, २०७५ ०९:५७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT