बाढीपहिरोमा चार करोडको क्षति

कान्तिपुर संवाददाता

रुकुम पश्चिम — चालु वर्षाको कारण चौरजहारी नगरपालिकामा झन्डै चार करोडको सम्पत्ति क्षति भएको छ । गत असार २४ देखि भदौ २० गतेसम्म बाढी, पहिरो र भूक्षयका कारण तीन करोड ६९ लाख ६३ हजार चार सय रुपैयाँ बराबरको क्षति भएको नगरपालिकाले जनाएको छ ।

बर्षाले रुकुम पश्चिम चौरजहारी नगरपालिकाको चौरजहारी बजारमा भत्किएको घर । तस्बिर : कान्तिपुर

नगरपालिकाका अधिकांश वडामा वर्षाको क्रममा बाढी, पहिरो र भूक्षय गएको त्यसले सर्वसाधारणको घरदेखि अन्नबालीसहितको जग्गा जमिन बगेको जनाइएको छ ।

चौरजहारी नगरपालिकाले गठन गरेको कार्यदलले वर्षाको तीन महिनामा पुगेको क्षतिको विवरणसहितको प्रतिवेदन नगरपालिकामा बुझाएका छन् । उक्त प्रतिवेदनअनुसार नगरपालिकाका ८५ घरपरिवार बाढी, पहिरो र भूक्षयबाट पीडित बनेका छन् । जसमध्य १० घरपरिवार घरबारविहीन बनेका भने २७ घरमा आंशिक क्षति बनाएको छ । २७ घर परिवारको अन्नबालीसहितको खेतबारी बगेको विवरण प्रतिवेदनमा उल्लेख गरिएको छ ।

Yamaha

वर्षाको कारण ७ वटा सडकमा क्षति पुगेको छ भने ६ वटा विद्यालय तथा आयोजनामा क्षति पुगेको छ । ४ घर आगजनीबाट क्षति पुगेको छ भने सार्वजनिक स्थानमा बसेका ४ घरपरिवार पनि घरबारविहीन बनेका छन् । निमित्त प्रमुख प्रशासकीय अधिकृत प्रदीप सुनार नेतृत्वको टोलीले नगर कार्यपालिकामा प्रतिवेदन बुझाएको हो ।

कार्यदलका संयोजक एवं प्रमुख प्रशासकीय अधिकृत सुनारले जहारीखोला, खहरेखोला, नार्जीखोला, लापुरखोला, ठूलाखोला, कटेजखोला, कालिगारखोला, सेतीगारखोला, मानाकोटखोला, चिन्नेबगरखोला, चैतेखोला, दमदमेखोला तथा साक्चा खोलालगायतको कारणले बढी क्षति पुग्ने गएको बताए । उनले कार्यदलले गाउँकार्यपालिकामा दसबुँदे सुझाव पनि दिएको बताए ।

जनचेतनना जगाउनुपर्ने, जोखिमयुक्त ठाउँको पहिचान तथा पूर्वतयारी गर्नुपर्ने, विनाश हुने अवस्थाको निक्र्योलपछि मात्रै विकास गर्नुपर्ने, रकम भुक्तानी दिनुअघि आईईई र ईआईए गर्नुपर्नेजस्ता सुझाव दिइएको छ ।

नगरप्रमुख विशाल शर्माले तत्काल राहतका लागि अत्यावश्यक परेका २० बढी घरपरिवारलाई ३ हजारदेखि २० हजारसम्म नगद सहयोग गरिएको बताए । यसको साथै प्रतिवेदनमा दिइएका सुझावअनुसार अबका दिनमा डोजरले केहीबाहेक अधिकांश सडक निर्माण नगर्ने निर्णयमा पुगिसकेको नगरप्रमुख शर्माले बताए ।

प्राकृतिक प्रकोपबाट धेरै क्षति हुने भएपछि अबका दिनमा आपतकालीन कोष स्थापना गर्ने, तारजाली र तटबन्धको साथै अर्को वर्षदेखि वृक्षरोपणलाई प्रथामिकता दिने नगर प्रमुख शर्माले बताए ।

प्रकाशित : भाद्र २७, २०७५ १०:२०
प्रतिक्रिया
पठाउनुहोस्
ADVERTISEMENT

गाउँगाउँमा भाइरलका बिरामी

मोहन शाही

डोटी — दूषित पानीले टाइफाइड र भाइरलका बिरामी बढेका छन् । जिल्लाका आदर्श, बड्डीकेदार र केआईसिंह गाउँपालिकाका स्थानीय टाइफाइडले प्रभावित भएका हुन भने दिपायल सिलगढी, शिखर नगरपालिका तथा पूर्विचौकी गाउँपालिकामा भाइरल ज्वरोका बिरामी बढेका छन् ।

जिल्ला अस्पताल डोटीका मेडिकल सुपरिटेन्डेन्ट भूषण मिश्रका अनुसार जिल्ला अस्पतालमा ज्वरो बढेको, हातखुट्टा गल्ने, कमजोरीको महसुस गर्ने बिरामीहरूको संख्या साउनदेखि लगातार बढेको बढ्यै छ । ‘त्यो भाइरल ज्वरोको लक्षण हो, हामीले औषधी दिएर उपचार गराइरहेका छौं,’ उनले भने ।


दूषित पिउने पानी तथा खानपानमा ध्यान नदिँदा टाइफाइडका बिरामी दैनिक बढ्ने गरेको आदर्श गाउँपालिका मौवानगरदह स्वास्थ्य चौकी इन्चार्ज दीपक ओझाले बताए । दैनिक २० देखि २५ जनासम्म टाइफाइडका बिरामी आउने गरेको उनले जानकारी दिए ।


आदर्श गाउँपालिका–१ बाझकी कलुदेवी खडाले ७ दिनसम्म घरमै थलापरेपछि उपचारका लागि स्वास्थ्यचौकी आएको बताइन् । उपचार क्रममा स्वास्थ्यचौकीबाट टाइफाइडको बिरामी भएको थाहा पाएपछि सुई र औषधि लिएर उनी फर्किन लागेकी थिइन् । उनले टोलमा आफूजस्ता बिरामीहरूको संख्या धेरै रहेको बताइन् ।


मौवानगरदह स्वास्थ्य चौकीमा टाइफाइडसँगै जन्डिसका बिरामीहरू आउने गरेका छन् । ओझाले उपचारका लागि औषधि तथा उपचारका लागि स्वास्थ्यकर्मी व्यवस्था भएकाले समस्या भने नभएको बताए । आदर्श गाउँपालिकामा अझै पनि सामान्य बिरामी सम्झेर कतिपय उपचारका लागि स्वास्थ्यचौकी आउन सकेका छैनन् ।


केआईसिंह गाउँपालिकाको दुर्गामाण्डौ इकाला स्वास्थ्य चौकीमा तिखात्तर, वायल, बासुदेवी, दल्ल क्षेत्रका बिरामीहरू टाइफाइडका लक्षणहरू लिएर उपचारका लागि आउने गरेको गाउँपालिकाका स्वास्थ्य संयोजक तिलबहादुर बोहराले जानकारी दिए । बिरामीमध्ये अधिकांश महिला र बालबालिका छन् ।


डोटीमा १६ प्रतिशत जनसंख्या अझै पनि नदी, खोला तथा कुवाको पानी पिउन बाध्य रहेको तथ्यांक छ । पछिल्लो समय डोटीमा झाडापखालाका बिरामी भने घट्न थालेका छन् । ग्रामीण क्षेत्रमा समेत शौचालय निर्माण भएपछि झाडापखालाका बिरामीको संख्यामा कमी आएको मौवानगरदह स्वास्थ्यचौकीकी सिनियर अनमी यशोदा ओझाले बताइन ।


उनले चार पाँच वर्षअघि वर्षातको समयमा झाडापखालाका बिरामीको उपचार गर्न औषधि र स्लाइन पानीको अभाव हुने गरेको तर अहिले अवस्था सन्तोषजनक रहेको बताइन् । बोगटान गाउँपालिकामा पनि दैनिक १०/१२ जना टाइफाइडका बिरामी देखा परिरहेका छन् ।


बड्डीकेदार गाउँपालिकाको घांगल, बर्छैन, मान्नाकापडीमा टाइफाइडका बिरामी साता दिन यताबाट बढ्न थालेको गाउँपालिकाका स्वास्थ्य शाखाका योगेन्द्र शाहीले बताए । उनले भाइरल ज्वरोका बिरामी साउन महिनामा बढी आएको भए पनि अहिले टाइफाइडका बिरामी बढेको जानकारी दिए ।

प्रकाशित : भाद्र २७, २०७५ १०:१९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT