अखाद्य सामग्री नष्ट

भीमबहादुर सिंह

जाजरकोट — दसैंको मुखमा जिल्ला प्रशासन कार्यालयले म्याद गुर्जेका र अखाद्य वस्तु नष्ट गरेको छ  । सदरमुकाम खलंगालगायत व्यापारिक केन्द्रका पसलबाट बरामद गरिएका अखाद्य वस्तु बुधबार नष्ट गरिएको हो  ।

बजार अनुगमनका क्रममा नियन्त्रणम लिएका म्याद गुर्जेका खाद्यवस्तु नष्ट गरेको प्रमुख जिल्ला अधिकारी ललितकुमार बस्नेतले बताए ।


कोष तथा लेखा नियन्त्रण कार्यालय, उद्योग वाणिज्य संघ, प्रहरी लगायतको रोहबरमा अखाद्य वस्तु नष्ट गरेको हो । जिल्लाका बजारमा म्याद गुर्जेका खाद्यवस्तुको बिगबिगी बढेपछि बजार अनुगमनलाई तीव्र पारिएको थियो । भुजा, चाउचाउ, कोकाकोला, फ्यान्टा, स्प्राइट, फ्रुटी, मसला, खानेतेल, मिनरलवाटर, बिस्कुट, पिठो, दालमोट, चक्लेट, चिजबललगायत खाद्यवस्तु म्याद गुर्जेको अवस्थामा फेला परेका थिए ।

Yamaha


जिल्ला प्रशासन नेतृत्वको अनुगमन टोलीले खलंगा, छेडा, थलह, मोर्क, कालीमाटी, रिम्नालगायत बजारमा अनुगमन गरेर म्याद गुर्जेका खाद्यवस्तु बरामद गरेको हो । अनुगमनबाट बरामद भएका करिब तीन/चार लाख मूल्यका सामग्री नष्ट गरिएको हो । ‘म्याद गुर्जेका खाद्य बस्तुको बिक्री गरेर उपभोक्ता ठगी गर्ने व्यापारीलाई कारबाहीको प्रक्रिया थालिएको छ,’ उनले भने, ‘कालोबजारी तथा अखाद्य वस्तुको बिक्री वितरण, मूल्य सूची नटाँस्ने र दर्ताबिना पसल सञ्चालन गर्ने व्यापारीलाई उपभोक्ता हकहित संरक्षण ऐनअनुसार कारबाही गरिनेछ ।’


बजारमा मूल्यसूची नराख्ने, इजाजतबिना मदिरा बिक्री वितरण गर्ने, एउटै पसलमा मदिरा तथा खाद्यवस्तु बिक्री वितरण गर्ने, मूल्य एकरूपता नहुने, मनोमानी मूल्य हुने, तोकेका तौलको खाद्यवस्तु फेला नपर्नेलगायत विकृति देखिएको उपभोक्ता किरण भण्डारीले बताए ।


घरेलु मदिरा बरामद
यसैबीच प्रहरीले जिल्लाभर एक हजार चार सय लिटर अवैध घरेलु मदिरा नष्ट गरेको छ । दसैंका बेला मदिरा सेवन गरेर समाजमा आपराधिक घटना बढ्न सक्ने भन्दै प्रहरीले मदिरा नियन्त्रण अभियान सञ्चालन गरिरहेको छ ।


प्रहरीले चार महिनाको अवधिमा जाँड एक हजार लिटर र तयारी मदिरा चार सय लिटर नष्ट गरेको प्रहरी निरीक्षक इन्द्रजित सुनारले बताए । मदिरा उत्पादनमा प्रयोग हुने तीन दर्जन सामग्रीसमेत बरामद गरिएको उनले जनाए । खलंगाबजार, छेडा, पैंकलगायत स्थानमा प्रहरीले अवैध घरेलु मदिरा नष्ट गरेको प्रहरीले जनाएको छ ।


घरेलु मदिरा नियन्त्रण गरेपछि सामाजिक अपराधका घटना न्यूनीकरण हुँदै गएको प्रहरी नायब उपरीक्षक रवीन्द्रबहादुर सिंहले बताए । मदिरा नियन्त्रणले जिल्लाको शान्ति सुरक्षाको प्रबन्धमा सहयोग पुर्‍याएको उनको भनाइ छ । बरामद भएका अवैध घरेलु मदिरामा प्याड, पेन्टीलगायत फोहोर कपडा फेला पर्ने गरेका छन् । घरेलु मदिराको उत्पादन र बिक्री बन्द गर्न प्रहरीको निरन्तर सक्रियता रहने सिंहले जानकारी दिए ।

प्रकाशित : आश्विन २६, २०७५ १०:५६
ADVERTISEMENT
प्रतिक्रिया
पठाउनुहोस्

बसाइ व्यवस्थापनले विद्यार्थी चाप

विप्लव महर्जन

सल्यान — बाल विकास केन्द्रमा बसाइ व्यवस्थापन भएपछि दार्मा र कुमाख गाउँपालिकाका सामुदायिक विद्यालयमा विद्यार्थी संख्या बढ्दै गएको छ  । यहाँका सामुदायिक विद्यालयमा विद्यार्थी बस्नका लागि कुसन, खेलौना, बालमैत्री टेबुल, र्‍याकलगायत व्यवस्था गरिएको छ  ।

बालमैत्री बसाइ व्यवस्थापनसहितको कक्षामा बसेर पढ्दै र खेल्दै सल्यानको जनकल्याण आधारभूत विद्यालय स्यालागाउँ दार्माकोटका बालबालिका । तस्बिर: विप्लव/कान्तिपुर

विद्यार्थीले भुइँमै लेख्न सकिने व्यवस्था मिलाइएको छ । साना विद्यार्थी निद्रा लागेको बेला त्यही सुत्न सक्छन् । बसाइ व्यवस्थापनले विद्यार्थीका कपडा सफा हुने गरेको शिक्षकको भनाइ छ । जनकल्याण आधारभूत विद्यालय स्यालागाउँ, दार्माकोटमा गत वर्षसम्म बाल विकास केन्द्रमा दुई जनामात्र विद्यार्थी नियमित आउने गरेका थिए । बसाइ व्यवस्थापनपछि यस वर्ष ३० जना अध्ययनरत छन् ।

बसाइ व्यवस्थापनका कारण बालबालिकाले विद्यालयमा सजिलै समय बिताउने गरेको विद्यालयकी प्रधानाध्यापक तुलाकुमारी चन्दले बताइन् । ‘बसाइ व्यवस्थापनका कारण बालबालिकाले घरभन्दा विद्यालयको वातावरण मन पराउन थालेका छन्,’ उनले भनिन्, ‘त्यसैले विद्यार्थीको संख्या बढेको छ, सबै बालबालिका नियमित विद्यालय आउँछन् र पूरै विद्यालय समयमा कक्षाकोठामै बस्छन् ।’ १० देखि २ बजेसम्ममात्र कक्षा सञ्चालन हुने भए पनि केही बालबालिका दिउँसो ४ बजेसम्मै विद्यालमा बस्ने गरेको उनको भनाइ छ ।


नियमित विद्यालय आउने बानी पर्न थालेपछि अभिभावकले बालबालिकाको पठनपाठनमा समेत ध्यान दिन थालेका छन् । अभिभावक आफैं विद्यार्थी ल्याएर आउने गरेको बाल विकास सहयोगी कार्यकर्ता देवी केसीले बताइन् । साना बालबालिकालाई पढाइका साथै खेल, चित्र, गीत, अभिनय र नाचबाट शिक्षण गराइने उनको भनाइ छ । विभिन्न खेलौनाको माध्यमबाट बालबालिकाले छिटो सिक्ने गरेको उनले जानकारी दिइन् ।


बसाइँ व्यवस्थापनले बाल बालिकामा धेरै परिवर्तन आएको बालकल्याण आधारभूत विद्यालय घुसखोलाका प्रधानाध्यापक मानबहादुर नेपालीले बताए । उनका अनुसार बाल विकास केन्द्रमा २० जना विद्यार्थी अध्ययनरत छन् । विगतमा कक्षाकोठा व्यवस्थापन राम्रो नहुँदा बालबालिका धुलाम्मेमा बसेर पढ्न बाध्य थिए । धूलोका कारण बालबालिकाको कपडा फोहोर हुने, पढ्न मन नमान्ने जस्ता समस्या थियो । बसाइँ व्यवस्थापन भएपछि बालबालिकाले अतिरिक्त क्रियाकलापमार्फत पाठ्यक्रमको सिकाइ हासिल गर्ने गरेका छन् ।


बसाइँ व्यवस्थापनका लागि सेभ द चिल्ड्रेनले विभिन्न सामग्री उपलब्ध गराएको हो । विद्यालय निरीक्षक चन्द्रबहादुर बुढाका अनुसार बसाइँ व्यवस्थापन र विभिन्न शैक्षिक सामग्रीको व्यवस्था भएपछि बालबालिकाको बानीमा समेत सुधार आएको छ । विद्यार्थीले पढाइमा ध्यान दिन थालेको उनले बताए ।

प्रकाशित : आश्विन २६, २०७५ १०:५६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT