ब्लकमा बीउ उत्पादन

हरि गौतम

रुकुम पश्चिम — जिल्लाका दुई समूहले पहिलोपटक ब्लकमार्फत बीउ उत्पादनको प्रक्रिया सुरु गरेका छन्  । मुसीकोट नगरपालिका–४, सोलाबाङस्थित खाद्यान्न बीउ उत्पादन महिला कृषक समूह र चौरजहारी नगरपालिका–१०, को समशितोष्ण उन्नत तरकारी बीउ उत्पादन सहकारीले ब्लकमार्फत उन्नत बीउ उत्पादनको प्रक्रिया सुरु गरेका हुन्  ।

रुकुम पश्चिम मुसीकोट नगरपालिका–४, सोलाबाङको खाद्यान्न बीउ उत्पादन महिला कृषि समूहले ब्लकमा गहुँको बीउ उत्पादनका लागि तयार पार्दै गरेको जग्गा । तस्बिर : हरि/कान्तिपुर

समूहले गहुँको बीउ र सहकारीले रायोको उन्नत बीउ ब्लकमार्फत उत्पादन गर्न थालेका हुन् ।


समूहले २५ रोपनी क्षेत्रफलमा ब्लक स्थापना गरी गहुँको उन्नत बीउ उत्पादन सुरुवात गरेको छ । २० जना महिला सम्मिलित समूहले बीउ उत्पादनका लागि आवश्यक जग्गाको व्यवस्थापन तथा चाहिने सीपका लागि अभिमुखीकरणसमेत लिइसकेको छ । ‘फरकफरक तरिकाले बीउ उत्पादन गर्दा गुणस्तरमा तलमाथि हुने जस्तो देखियो यसैले एकै ठाउँमा ब्लक नै बनाएर बीउ उत्पादन गर्न लागेका छौं,’ समूहकी सचिव चित्रा शर्माले भनिन्, ‘यसबाट छरिएर बीउ उत्पादन गर्नेबीच सामूहिक भावनाको विकास हुने र बीउ उत्पादनमा पनि सुधार हुने अपेक्षा छ ।’ उनले डब्ल्यु के बाह्र सय चार जातको गहुँको उन्नत बीउ उत्पादन गर्न थालेको बताइन् । साढे ३ मेट्रिक टन बीउ उत्पादनको लक्ष्य राखिएको समूहले जनाएको छ ।

Yamaha


सहकारीले खुमल चौडा पात जातको रायोको उन्नत बीउ उत्पादन गर्न लागेको हो । १० रोपनी जग्गामा रायोको बीउ उत्पादन हुने जनाइएको छ । ३ क्विन्टल उन्नत बीउ उत्पादनको लक्ष्यसहित ब्लक बनाएरै रायोको उन्नत बीउ उत्पादन गर्न लागिएको सहकारी संस्थाकी अध्यक्ष गोपा विएमले बताइन् । उनका अनुसार लामो समयदेखि तरकारीको बीउ उत्पादन गर्दै आए पनि एकै क्षेत्रमा एउटै बीउ ब्लकमार्फत उत्पादन गर्न लागेको यो पहिलो पल्ट हो ।


दुबै समूहलाई केयुविकेले प्राविधिक सहयोग गर्नेछ । केयुविकेले गहुँका लागि एक सय ७० किलो र सहकारीलाई २ किलो रायोको मूल बीउ उपलब्ध गराइसकेको जनाएको छ । त्यसका लागि रासायनिक मल तथा विषादी, स्प्रे, ट्यांकीलगायत सामग्री प्रदान गरिनेछ । बीउ उत्पादन, प्रशोधन र बजारीकरणमा पनि सहयोग गर्ने केयुविके, कृषि उद्यम केन्द्र जिल्ला लगानीद्वार कार्यालयका सल्लाहकार राजु लामिछानेले बताए । जिल्ला बीउ संयोजक शंकर न्यौपानेले बीउ लगाउने बेलादेखि नै बिक्री नहुँदासम्म ब्लकमार्फत गरिने उन्नत बीउ खेतीलाई पूर्ण रूपमा प्राविधिकको निगरानीमा राखिने न्यौपानेले बताए ।


छरिएर खेती गर्ने परम्पराको अन्त्य, एकीकृत खेतीको प्रोत्साहन तथा व्यावसायिक खेती र गुणस्तरीयता कायम गर्न ब्लकमार्फत उन्नत बीउ उत्पादनको अभ्यास सुरु गरिएको केयुविकेका केन्द्रीय बीउ संयोजक लीलाराम पौडेलले बताए । रुकुम पश्चिमसहित सल्यान, रोल्पा, गुल्मी, प्युठान र अर्घाखाँचीमा समेत ब्लकमार्फत खेती गर्ने समूह तथा सहकारीलाई सहयोग गरिने पौडेलले जनाए ।

प्रकाशित : कार्तिक १७, २०७५ ०९:२८
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

वडाध्यक्षको पारिश्रमिक विपन्नलाई

कान्तिपुर संवाददाता

रुकुम पश्चिम — बाँफिकोट गाउँपालिका–३ का वडाध्यक्ष चन्द्रबहादुर केसीले जनप्रतिनिधिको हैसियतमा प्राप्त गरेको ६ महिनाको सेवा सुविधा विपन्नलाई प्रदान गरेका छन्  ।

जनप्रतिनिधिको हैसियतमा सेवासुविधाबापत आफूले प्राप्त गरेको रकम अपाङ्गलाई हस्तान्तरण गर्दै रुकुम पश्चिमको बाँफिकोट गाउँपालिका–३ का अध्यक्ष चन्द्रबहादुर केसी । तस्बिर : कान्तिपुर

उनले गाउँपालिकाको १० वडाका २५ विपन्न, अपाङ्ग, असहाय, टुहुरा र दीर्घ रोगीलाई आफूले पाएको सुविधाको रकम प्रदान गरेका हुन् ।


केसीले ३ नम्बर वडा कार्यालमा एक कार्यक्रम आयोजना गरी हरेकलाई चार हजारका दरले सहयोग रकम हस्तान्तरण गरे । उनले विपन्नलाई एक लाख रुपैयाँ सहयोग गरेको जानकारी दिए । केसीले मासिक १९ हजारका दरले एक वर्षको दुई लाख २८ हजार रुपैयाँ सेवा सुविधाबापत बुझेका थिए । यसअघि प्राप्त बैठक भत्ताको आठ हजार रुपैयाँ पनि दुई दीर्घ रोगीलाई सहयोग गरेको केसीले जनाए ।

केसीले ३ नम्बर वडाका १५, ५ नम्बर वडाका २ र अन्य वडाका एक/एक जनालाई आर्थिक सहयोग गरे । सहयोग पाउनेमा चार टुहुरा, चार अपाङ्ग, आठ दीर्घरोगी र ९ जना गरिब तथा विपन्न छन् ।

ठूलो रकम प्रदान गर्न नसके पनि मतदातासँग जोडिन भावनात्मक रूपमा सानो आर्थिक सहयोग गरिएको वडाध्यक्ष केसीको भनाइ छ । ‘मैले सहयोग गरेको ४ हजारले खासै फरक त नपर्ला,’ केसीले भने, ‘तर हामीले जिताएका जनप्रतिनिधि हामीसँगै छन् भन्ने सन्देशका लागि सहयोग गरेको हुँ ।’

प्रकाशित : कार्तिक १७, २०७५ ०९:२७
पूरा पढ्नुहोस्
प्रतिक्रिया
पठाउनुहोस्
ADVERTISEMENT