छायानाथ–रारामा मदिरा निषेध
मुगु — छायानाथ रारा नगरपालिकालाई मधिरा निषेध घोषणा गर्ने तयारी गरिएको छ । यसका लागि नगर प्रमुख हरिजंग शाहीको संयोजकत्वमा मूल आयोजक समिति गठन गरिएको छ ।
नगर प्रमुख शाहीले मंसिर १ गतेदेखि मदिरा निषेध गरिने बताए । उक्त दिन कर्णाली प्रदेश प्रमुख महेन्द्रबहादुर शाहीको प्रमुख आतिथ्यतामा मदिरा निषेध कार्यक्रम घोषणा गरिनेछ ।
घोषणा अभियानलाई सफल बनाउन सबै वडाध्यक्ष संयोजक रहने गरी १६ वटा उपसमिति गठन गरिएको शाहीले बताए । नेपाल सरकारको नीतिअनुसार नगरलाई मदिरा निषेध घोषणा गर्न लागिएको नगर प्रमुख शाहीको भनाइ छ ।
शनिबार प्रमुख जिल्ला अधिकारी उमाकान्त अधिकारीको अध्यक्षतामा सुरक्षा निकायका प्रमुख, उद्योग वाणिज्य संघ, होटल व्यवसायी संघ, वडाध्यक्षहरू सम्मिलित छलफल कार्यक्रम आयोजना गरियो ।
हाल नगर क्षेत्रमा २६ व्यवसायीले लाइसेन्स लिई मदिरा बेचबिखन गर्दै आएका छन् । अब ती सबै लाइसेन्स ‘खारेज’ गर्ने नगरपालिकाको तयारी छ । ‘बिक्री नभई गोदाममा स्टक रहेको मदिरा नगरपालिकाले तोकेको मूल्य दिई नियन्त्रणमा लिनेछ,’ नगर प्रमुख शाहीले भने, ‘नगरलाई मदिरा निषेध गर्ने अभियानमा सबैको सकारात्मक सहयोग रहेको छ ।’ मदिराले समाजमा अशान्ति र हिंसा निम्त्याएकाले निषेधको तयारी गरिएको उनले बताए ।
प्रकाशित : कार्तिक २६, २०७५ ११:२४