५ वटा कक्षाका विद्यार्थी एउटै कोठामा

विप्लव महर्जन

सल्यान — छत्रेश्वरी गाउँपालिकाको भोटचौरस्थित त्रिभुवन जन माविमा सञ्चालित सुस्तश्रवण स्रोत कक्षाका विद्यार्थी एउटै कोठामा बसेर अध्ययन गर्न बाध्य छन्  । स्रोत शिक्षाअन्तर्गत कक्षा १ देखि ५ सम्मका बालबालिका एउटै कक्षामा बसेर पढिरहेका छन्  ।

एउटै कक्षामा बसालेर पढाउँदा विभिन्न समस्या आउने गरेको छ । शिक्षक अभावले ५ वटै कक्षाका बालबालिकालाई सँगै राखेर पढाउनुपर्ने बाध्यता भएको विद्यालयको भनाइ छ । ‘सँगै राखेर पढाउँदा बुझिँदैन,’ एक विद्यार्थीले सांकेतिक भाषामार्फत भने, ‘हामीले पटकपटक छुट्टाछुट्टै कोठामा पठनपाठन गराउन माग गरे पनि सम्भव भएको छैन ।’

प्रधानाध्यापक जितबहादुर भण्डारीका अनुसार कक्षा १ देखि ५ सम्म ११ छात्र र ४ छात्रा अध्ययनरत छन् । विद्यार्थी संख्या बर्सेनि बढ्दै गए पनि सुस्तश्रवणका बालबालिकालाई पढाउने एक मात्र शिक्षक हुँदा पठनपाठनमा समस्या भएको उनले जनाए । ‘स्रोत कक्षाका लागि एक मात्र शिक्षक कार्यरत भएकाले समस्या भएको हो,’ उनले भने, ‘स्रोतकक्षाका बालबालिकालाई अध्ययन गराउन शैक्षिक सामग्री, पाठ्यपुस्तक, फर्निचर, खेलकुद सामग्रीलगायत समस्या पनि छ ।’

२०५९ सालमा साबिक जिल्ला शिक्षा कार्यालयले विद्यालयमा सांकेतिक कक्षा सञ्चालन गरेको थियो । विद्यालयमा १० विद्यार्थीको मात्र कोटा कायम गरिए पनि अहिले १५ जना अध्ययनरत छन् । गाउँपालिकाको सहयोगमा स्मार्ट टीभीअन्तर्गत पठनपाठन हुन थालेपछि सुस्त श्रवण कक्षाका बालबालिकासमेत थपिएको विद्यालयले जनाएको छ ।

भाषा शिक्षकै नहुँदा पठनपाठन अन्योलमा परेको उनले जनाए । ‘पहिले बालबालिकाले हाउभाउबाटै पठनपाठन गर्दै आइरहेका थिए,’ उनले भने, ‘सांकेतिक भाषाकै शिक्षिका आएपछि पठनपाठनमा धेरै परिवर्तन आएको छ ।’ उनले विभिन्न अभावबीच पनि बालबालिकाको शैक्षिक गुणस्तर बढ्दै गएको दाबी गरे ।


सांकेतिक भाषा शिक्षक शान्ता केसीले सबैलाई सँगै राखेर पढाउँदा कठिनाइ हुने बताइन् । अरू शिक्षकको व्यवस्था भए छुट्टाछुट्टै कक्षामा बालबालिकालाई पढाउन सकिने उनले बताइन् । अहिले गाउँपालिकाको सहयोगमा स्मार्ट टीभीमार्फत आफूले अध्यापन गराइरहेको उनले जानकारी दिइन् । सुस्तश्रवण कक्षा सञ्चालन गरेपछि बालबालिकालाई खान–बस्न व्यवस्था सरकारले गर्दै आएको उनको भनाइ छ ।

प्रकाशित : फाल्गुन २९, २०७५ १२:२१
ADVERTISEMENT
प्रतिक्रिया
पठाउनुहोस्

आंगिक बन्यो रारा क्याम्पस

राजबहादुर शाही

मुगु — गमगढीस्थित रारा बहुमुखी क्याम्पसलाई मध्यपश्चिमाञ्चल विश्वविद्यालय (एमयू) को आंगिक क्याम्पसको रूपमा हस्तान्तरण गरिएको छ  । यसअघि त्रिभुवन विश्वविद्यालयसँग सम्बन्धन लिएर सञ्चालन भएको क्याम्पस एमयूको आंगिक बनेको हो  ।

क्याम्पस सञ्चालनको १२ वर्षपछि आंगिक बनेको हो । क्याम्पसमा मंगलबार आयोजित कार्यक्रममा मध्यपश्चिमाञ्चल विश्वविद्यालयका निमित्त रजिस्ट्रार यमबहादुर कार्कीलाई क्याम्पस व्यवस्थापन समिति अध्यक्ष जितबहादुर मल्लले बैठक पुस्तिका हस्तान्तरण गरे ।

मल्लले कार्कीलाई भौतिक संरचना विवरण, कर्मचारी र प्राध्यापक विवरण, चन्दादाताको नामावलीलगायत महत्वपूर्ण कागजपत्र हस्तान्तरण गरेसँगै क्याम्पस आंगिक बनेको हो । रजिस्ट्रार कार्कीले क्याम्पसलाई आंगिक बनाएको निर्णयसहित कर्मचारीको तलब र भौतिक व्यवस्थापनका लागि १९ लाख २१ हजार रुपैयाँको चेक हस्तान्तरण गरे । अब क्याम्पसको भौतिक संरचना निर्माण, कर्मचारी व्यवस्थापन, विषयगत शिक्षकको व्यवस्थालगायत काम एमयूले गर्ने निमित्त रजिस्ट्रार कार्कीले जनाए ।

क्याम्पस आंगिक बनेसँगै विद्यार्थी भर्ना शुल्क ६ हजार रुपैयाँबाट घटेर ४ हजार ५ सय हुने क्याम्पसले जनाएको छ । क्याम्पसका अनुसार अब विद्यार्थीले मासिक शुल्क ५ सय रुपैयाँ मात्र बुझाउनुपर्नेछ । विश्वविद्यालयको व्यवस्थापन संकायका डिन मस्तबहादुर गरन्जाले क्याम्पस एमयू मातहत आएपछि विद्यार्थीको भर्ना र मासिक शुल्कमा भारी कटौती गरिएको बताए ।

उनले करिब १२ वर्षसम्म चन्दा संकलनबाट सञ्चालन भएको क्याम्पसको सबै खर्च अब एमयूले बेहोर्ने जनाए । कार्यक्रममा परीक्षा प्रणाली सुधार्नुपर्ने, चिट चोरे पास हुने प्रवृत्ति अन्त्य हुनुपर्ने, क्याम्पसमा नियमविपरीत कर्मचारी भर्ना रोकिनुपर्नेलगायत माग सरोकारवालाले राखेका छन् ।


व्यवस्थापन समिति अध्यक्ष मल्लले विद्यार्थीलाई सस्तो, सुलभ र गुणस्तरीय शिक्षा प्रदान गर्न क्याम्पस तयार रहेको बताए । उनले स्नातक तहसम्म सञ्चालित क्याम्पसमा स्नात्तकोत्तरको पढाइ सुरु गर्न पहल भइरहेको जनाए । क्याम्पसबाट अहिलेसम्म १ सय ५० विद्यार्थीले स्नातक तह पूरा गरिसकेका छन् । यस वर्ष ३ सय विद्यार्थी अध्ययनरत रहेको क्याम्पस प्रशासनले जनाएको छ ।

क्याम्पसमा अहिले शिक्षा र मानविकी संकायमा पठनपाठन भइरहेको छ । क्याम्पस प्रमुख सुशीलकुमार भामले क्याम्पसमा प्राविधिक शिक्षा सञ्चालन गर्न पहल भइरहेको बताए । उनका अनुसार पर्यटन, विज्ञान, इन्जिनियरिङलगायत विषय अध्यापनका लागि पहल भइरहेको छ । नगर प्रमुख हरिजंग शाहीले क्याम्पस आंगिक भएसँगै विद्यार्थीले सस्तो शुल्कमा गुणस्तरीय शिक्षा पाउने विश्वास व्यक्त गरे ।

प्रकाशित : फाल्गुन २९, २०७५ १२:२०
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT