पुस्तकालय संचालनले विद्यार्थी बढे

बिप्लब महर्जन

सल्यान — ग्रामीण क्षेत्रका सामुदायिक विद्यालयमा पुस्तकालय स्थापना भएपछि विद्यार्थीको पठनपाठन सहज बनेको छ । पुस्तकालय स्थापनापछि विद्यार्थीमा पठन सीपको विकास हुँदै गएको छ । उनीहरू नियमित विद्यालय उपस्थित हुन थालेका छन् । 

पढाइ सीपअर्न्तगत बालबालिकामा ध्वनी सचेतना, अक्षर पहिचान, शब्दको भण्डार, पठनको गति, पठनबोध र लेखन शैलीको विकास गराउन सामुदायिक विद्यालयमा पुस्तकालय स्थापना गरिएको हो ।

छत्रेश्वरी गाउँपालिकाको भोटेचौरस्थित त्रिभुवन जनता माविमा कक्षा ३ मा अध्ययनरत सुनीता ओली र उनका साथीहरू दैनिकजसो खाजा समयमा पुस्तकालयमै भेटिन्छन् । ‘आफूलाई मन परेका पुस्तक सजिलै पढ्न पाइने भएकाले खाजा समय पुस्तकालयमै बिताउने गरेका छौं,’ उनले भनिन्, ‘चित्रकथासहितका पुस्तक पढ्न मन पराउँछु, पुस्तक पढै विभिन्न चित्रसमेत पुस्तकालयमै बनाउने गरेकी छु ।’

पुस्तकालय सञ्चालन गरेपछि कक्षा १ का विद्यार्थीसमेत विभिन्न पुस्तक अध्ययनमा आकर्षित भएको प्रधानाध्यापक जीतबहादुर भण्डारीले बताए । उनका अनुसार बालबालिकाकै रुची अनुसारका विभिन्न पुस्तक राखिएकाले विद्यार्थीको आकर्षण बढेको हो ।

‘बालबालिकाले आफ्नो रुचीका विभिन्न पुस्तक विद्यालयमै अध्ययन गर्न थालेपछि शिक्षण सिकाइ क्रियाकलाप प्रभावकारी बन्न थालेका छन्,’ उनले भने, ‘विद्यालयमा बालबालिकाको स्तरीकरण गरिएको छ, त्यही अनुसार बालबालिकाले पुस्तक पढ्ने गरेका छन् ।’

कक्षामा पठनपाठन नभएको बेला कम्तिमा दुई दर्जन बढी बालबालिका पुस्तकालयमै भेटिने गरेको उनले जानकारी दिए । विद्यालयमा अध्ययनरत कक्षा १० सम्मका विद्यार्थीलाई लक्षित गरी पुस्तकालय सञ्चालन गरिएको हो । विद्यालयमा चार सय ५१ बालबालिका अध्ययनरत छन् । पुस्तकालयमा करिव चार हजार पुस्तक राखिएको विद्यालयले जनाएको छ ।

पुस्तकालय सञ्चालनपछि बालबालिकामा पढ्ने बानीको विकास भएको विद्यालयले जनाएको छ । विद्यार्थीको उपस्थिति नियमित गराउन पुस्तकालयले सहयोग गरेको शिक्षकहरूको भनाइ छ । शिक्षक चन्द्रबहादुर पुनले साना कक्षाका बालबालिकामा पढाइ सीपको विकास गराउन पुस्तकालय स्थापना गरिएको जनाए ।

‘पुस्तकालय सञ्चालन गरेपछि बालबालिकामा पढ्नुपर्छ भन्ने भावनाको विकास भएको छ, पाठ्यक्रम बाहेकका पुस्तक पढ्न रुची बढेको छ,’ उनले भने, ‘केही समय पुस्तकालयका किताव पढ्न प्रेरणा दियौं, अहिले विद्यार्थी आफै पुस्तकालय जाने गरेका छन् ।’

विद्यार्थीमा पठन सीपको विकास गराइ शैक्षिक गुणस्तर बढाउन पुस्तकालय स्थापनामा सहयोग गरिएको रुम टु रिडका संयोजक टेकराज शाहीले बताए । उनका अनुसार रुम टु रिडले जिल्लाका ३० सामुदायिक विद्यालयमा पुस्तकालय स्थापनामा सहयोग गरेको छ ।

प्रकाशित : चैत्र ७, २०७५ ०९:५१
ADVERTISEMENT
प्रतिक्रिया
पठाउनुहोस्
ADVERTISEMENT

शारदामा बन्यो पुल

बिप्लब महर्जन

सल्यान — शारदा नगरपालिका १३, फल्लेज्युलास्थित शारदा नदीमा फलामे रेलिङ पुल निर्माण भएपछि जोखिम मोलेर नदी वारवार गर्नुपर्ने बाध्यता टरेको छ  । पुल नहुँदा स्थानीयलाई वर्षातको ६ महिना जोखिम मोलेर नदी वारपार गर्नुपर्ने बाध्यता थियो  ।

शारदा नगरपालिकाको चार लाख लगानीमा तीनवटा पिलरसहितको २० मिटर लम्बाइको फलामे पुल निर्माण गरिएको हो । नगरपालिकाले पुल निर्माण गरेपछि फल्लेज्युलासहित आसपासका झन्डै सय घर परिवार लाभान्वित भएका छन् । खलंगा आउँदा जोखिम उठाइ नदी तर्न नसके एक घण्टा हिंडेर श्रीनगर नजिकैको झोलुंगेपुलबाट वारपार गर्नुपर्ने बाध्यता हटेको छ । पुलबाट वारपार गर्न पाएका स्थानीयवासी अहिले नजिकैको राप्ती लोकमार्गमा आई गाडी चढ्न थालेका छन् ।


पुल बनेपछि धेरै कामकाज सहज बनेको स्थानीय दलबहादुर खड्काले बताए । उनका अनुसार वर्षातको समयमा स्कुले बालबालिकालाई नदी वारपार गर्न बढी समस्या थियो । ‘वर्षायामका दुई महिना बालबालिका विद्यालय जानबाट वञ्चित हुने गरेका थिए,’ उनले भने, ‘अब बाह्रै महिना बालबालिका विद्यालय जान सक्ने भएका छन् ।’स्थानीय रामबहादुर थापाका अनुसार पुल नहुँदासम्म बिरामीलाई अस्पताल पुर्‍याउन समस्या हुने गरेको थियो ।

‘गाउँमा कोही बिरामी भए एक घण्टा बढी हिंडेर श्रीनगरको झोलुंगेपुल मार्फत अस्पताल लैजानुपर्ने बाध्यता थियो,’ उनले भने, ‘अहिले पुल तर्नेबित्तिकै राप्ती लोकमार्ग आउँछ । बिरामीलाई गाडीमै अस्पताल पुर्‍याउन सहज भएको छ ।’ उनका अनुसार गाउँमा उत्पादित विभिन्न कृषिजन्य सामग्री बजार पुर्‍याउन पुलले सहज बनाएको छ । विभिन्न उपभोग्य सामग्री ढुवानीसमेत सहज बनेको उनी बताउँछन् ।


लामो र ठूलो पुल बनाउन बजेट अभाव भएपछि स्थानीयलाई आउजाउमा सहयोग पुर्‍याउन फलामे रेलिङ पुल निर्माण गरिएको शारदा नगरपालिका प्रमुख सुरेश अधिकारीले बताए । ‘पुल निर्माण भएपछि स्थानीयलाई राप्ती लोकमार्ग र सदरमुकाम आउजाउ सहज बनेको छ,स्थानीय कृषि उत्पादनले बजार पाउन थालेको छ,’ उनले भने,‘अब विद्यार्थीले नदी तर्न नसक्दा पठनपाठनबाट बञ्चित हुनुपर्ने छैन, निर्माण सामग्री र दैनिक उपभोग्य सामग्री सजिलै गाउँमा पुग्नेछन् ।’

उनका अनुसार मोटरसाइकल वारपार हुनेगरी पुल निर्माण गरिएको हो । शारदा नदीमा दुई ठूला पुल बनाउन संघीय सरकारले यो वर्ष बजेट विनियोजन गरेको उनले जानकारी दिए ।

प्रकाशित : चैत्र ६, २०७५ १४:३८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT