नगरसभाबाट ३ कानुन पारित

तुलाराम पाण्डे

कालीकोट — खाडाचक्र नगरपालिकाको पाँचौं नगरसभा बुधवार सम्पन्न भएको छ । नगरको न्यायिक समिति (कार्यविधि) ऐन, स्वास्थ्य तथा सरसफाई ऐन र सहकारी ऐन पारित गर्दै नगरसभा सकिएको हो  ।

कार्यक्रममा उपप्रमुख विजया विष्टले चालु आर्थिक वर्षको १० महिनामा ५४ प्रतिशत वित्तीय प्रगति भएको जानकारी दिइन् । उनका अनुसार चालु आर्थिक वर्षमा ४२ करोड २८ लाख ८६ हजार रुपैयाँ विनियोजन भएकोमा अहिलेसम्म ७१ प्रतिशत भौतिक र ५४ प्रतिशत वित्तीय प्रगति भएको छ ।


स्वास्थ्यतर्फ एक वर्षको अवधिमा ३५ जना महिला स्वास्थ्य स्वमसेवीकालाई सिमकार्डसहितको मोवाइल वितरण गरेको, ६ वटा सामुदायिक स्वास्थ्य संस्था स्थापना गरेर सेवा प्रवाह सुचारु गरेको, तीन महिनालाई निःशुल्क औषधि खरिद गरी भण्डारण गरिएको उपप्रमुख विष्टको भनाइ छ ।

उनका अनुसार ७० हेक्टर जमीनमा हिउँदे फलफूल र ६५ हेक्टरमा वर्षे फलफूल खेती गरिएको छ । वार्षिक प्रगति प्रतिबेदनमा किसानलाई बीउविजन वितरण, विभिन्न तालिम दिइएको, दुई हजार पाँच सय कुखुराका चल्ला वितरण गरिएको, बजारका मासु पसलका लागि डिफ्रिज खरिद गरिएको जनाइएको छ ।

त्यस्तै मान्म बजारमा पाँच लाख रुपैयाँ लागतमा सीसी क्यामेरा जडान गरेको, नगरका आठ वडामा सामाजिक सुरक्षाका लागि बैक खाता खोलिएको प्रतिबेदनमा उल्लेख छ । नगरले चालु आर्थिक वर्षको अहिलेसम्म १५ लाख राजश्व संकलन गरेको जनाएको छ । बजेटअनुसार प्रगति सन्तोषजनक नभएको नगरसभाका सदस्यको गुनासो छ । वडा नं ५ का सदस्य दुर्गवहादुर शाहीले तीन वडामा सामाजिक सुरक्षा रकम वितरणको लागि बैक खाता खोल्न आग्रह गरे ।

नगरले गरेको सबै खर्चको जानकारी सभामा पेश हुनुपर्ने वडा न २ का सदस्य देवसिंह बिकले बताए । वडा नं ७ का सदस्य पुत्रवहादुर मल्लले नगरले बजेट भागबण्डा गर्ने भन्दा पनि आवश्यकतामा ध्यान दिनुपर्ने सुझाव राखे । खाडाचक्र १ का सदस्य प्रेमवहादुर शाहीले नगरले पेश गरेको प्रगति विवरण स्पष्ट नभएको जनाए ।

अधिकांश जनप्रतिनिधिले पूर्वाधार र कर्मचारी अभावमा सेवाप्रवाह सोचेजस्तो नभएको बताए । आफ्नै कार्यालय नभएर भाडाको घरमा सञ्चालन भइरहेको नगरपालिकाका तीन वडामात्र सरकारी भवनमा छन् । ११ वडामध्ये एक वडामा मात्र सचिव छन् ।

सभामा उठेको सवालको जवाफ दिदै नगर प्रमुख जसीप्रसाद पाण्डेले यस वर्ष नगरको शैक्षिक गुरुयोजना र तीन वर्ष मातृ, नवजात तथा बाल स्वास्थ्य योजना बनाइएको जनाए । उनले नागरिकमैत्री सेवा प्रवाह गर्ने प्रतिबद्धता जनाए ।


सिंजाले बनायो २१ कानुन
जुम्ला– सिंजा गाउँपालिकाको दोस्रो गाउँसभाले २१ कानुन अनुमोदन गरेको छ । सेवा प्रवाहलाई व्यवस्थित बनाउन स्थानीय सरकारले ऐनअनुसार विभिन्न ऐन, नियम र निर्देशिका जारी गरिएको हो ।

गाउँसभाले बजार अनुगमन निर्देशिका, पूर्वाधार व्यवस्थापन ऐन, स्थानीय शिक्षा ऐन सहकारी ऐनलगायत महत्त्वपूर्ण २१ कानुन पारित गरेको गाउँपालिका अध्यक्ष देवलसिंह रावलले बताए । ‘गाउँसभाबाट सेवा प्रवाहलाई व्यवस्थित बनाउन आवश्यक कानुन अनुमोदन गरिएको छ, अब सेवा प्रवाह, नियमन र व्यवस्थापनका काम सहज हुनेछन्,’ उनले भने, ‘तर प्रदेश र संघीय सरकारले धेरै कानुन निर्माण नगरेकाले समस्या भएको छ ।’

आवश्यक कानुन निर्माण गरिसकेकाले अब कार्यान्वयनमा जोड दिइने जनप्रतिनिधिको भनाइ छ । गाउँपालिकाले आर्थिक ऐन, विनियोजन ऐन, शिक्षा ऐन, कृषि(व्यवसाय प्रवर्द्घन ऐन, विपद् जोखिम न्यूनीकरण तथा व्यवस्थापनलगायत कानुन पारित गरेको प्रमुख प्रशासकीय अधिकृत धर्मराज न्यौपानेले जानकारी दिए । ‘स्थानीयको आवश्यकता अनुसार ऐन र नियमावली बनाइएको छ,’ उनले भने, ‘गाउँ कार्यपालिका कार्य सञ्चालन र कार्य विभाजन नियमावलीसमेत पारित गरिसकेका छौं, अब सेवा प्रवाह र विकास निर्माणका काममा थप सहज हुनेछ ।’


स्थानीय सरकार सञ्चालन ऐन २०७४ ले स्थानीय सरकारले जुनसुकै काम कारबाही तथा सेवा प्रवाह गर्दा स्थानीय तह अनुकूल कानुन बनाउनुपर्ने व्यवस्था गरेको छ । विभिन्न ऐन, नियम तथा निर्देशिकाबारे ग्रामीण क्षेक्रमा समेत सचेतनामूलक कार्यत्रम सञ्चालन गरिने गाउँपालिकाले जनाएको छ ।

प्रकाशित : जेष्ठ १, २०७६ ११:१४
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

इन्टरनेटबाटै महिला ‘बेचबिखन’

फेसबुक, इमो, भाइबार, ह्वाट्स अप, म्यासेन्जर जस्ता सामाजिक सञ्जालमार्फत परिचय भएका मानिसकै विश्वासमा जोखिम मोल्दै महिला
मधु शाही

बाँके — दुबईमा कार्यरत आफन्तले सामाजिक सन्जाल इमोमा फोन गरे । वैदेशिक रोजगारमा आउने भए राम्रो अवसर रहेको भन्दै प्रलोभन देखाए । भारतमा चिनेको मान्छे रहेको र उसैले दुबई आउन मद्दत गर्ने जानकारी दिए ।

कुराकानीका लागि इमो नम्बर उलब्ध गराए । त्यसपछि यहाँका दुई जना महिलाले इमोको माध्यमबाट कुराकानी सुरु गरे । दुबई उडने योजना बनाएर भारत जान तयार भए । यहाँस्थित रुपैडिया नाका हुँदै जाने क्रममा उनीहरूलाई माइती नेपालले उद्धार गरेको छ ।

माइती नेपालसमक्ष रुपैडियामा किनमेल गर्न जान लागेको बहाना गरेका थिए । माइती नेपालका कर्मचारी र प्रहरीले विश्वास गरेनन् । बढी नै केरकार गरेपछि जोखिमयुक्त यात्रा गर्न लागेको खुल्यो र सिमानाबाटै फिर्ता भए ।

गत वर्ष मंसिरमा विभिन्न जिल्लाका ४० जना महिलालाई मानव तस्करको कब्जाबाट उद्धार गरिएको थियो । उनीहरूले इमोमार्फत तस्करको सम्पर्कमा आएको बताएका थिए । एकअर्कालाई चिन्दै नचिने पनि इन्टरनेटमार्फत सम्पर्क बढाएका थिए ।

पछिल्लो समय मानव तस्करीमा इन्टरनेटले मुख्य भूमिका खेलिरहेको छ । फेसबुक, इमो, भाइवर, ह्वाट्स अप, म्यासेन्जर मानव बेचबिखनका गतिलो माध्यम बनिरहेका छन् । भोजपुर घर भएकी एक युवतीले फेसबुकमार्फत एक जना केटासँग सम्पर्क गरिन् । कुरा गर्दा गर्दै उनीहरूको सम्बन्ध प्रेममा परिणत भयो । भिडियो कल हुन थाल्यो ।

भारतमा बस्ने ती युवकले युवतीलाई ‘तिमीले धेरै दुःख पायौ, मसँग आऊ’ भन्दै बोलाए । विश्वास गरेर युवती भारततर्फ लागिन् । जोखिमपूर्ण यात्राको आशंकामा नेपालगन्ज सीमामा प्रहरीले उनलाई रोक्यो ।

प्रविधिको प्रयोग गरेर अहिले सजिलै तस्करहरूले मानव बेचबिखनको प्रयास गरिरहेको पाइन्छ । डोल्पा घर भएकी एक युवतीको मोबाइलमा मिस कल आयो । पहिलोपटक उनले ‘मैले चिनिनँ’ भन्दै राखिन् । अर्कोपटक फेरि त्यही नम्बरबाट फोन आयो । नचिने पनि बोलौं र चिनजान गरौं न भन्दै केटाले वार्ता अघि बढाउन खोज्यो ।

बिस्तारै उनीहरूको सम्बन्ध प्रेममा परिणत भयो । परिवारलाई जानकारी नदिई भारततर्फ जाने क्रममा उनीहरू समातिए । त्यस्तै, जागिर खोज्ने क्रममा इन्टरनेटमाथि विश्वास गर्दा काठमाडौंकी एक युवतीले धोका पाइन् । स्नातक तह अध्ययनरत उनी रोजगारको खोजीमा भौंतारिएकी थिइन् ।

इन्टरनेटमा वेबसाइड सर्च गर्दा उनले भारतीय वेबसाइडमा जागिरको भ्याकेन्सी खुलेको पत्ता लगाइन् । त्यही वेबसाइडको लोकेसनमा उनी भारत पुगिन् । तर, त्यहाँ केही थिएन । फेक वेबसाइड थियो । भारतमा अलपत्र परेकी उनलाई पछि उद्धार गरेर काठमाडौं फिर्ता गरिएको माइती नेपाल नेपालगन्जका संयोजक केशव कोइरालाले बताए ।


पछिल्लो समय मानव तस्करका अनेक रूप देखा पर्न थालेका छन् । खुला सिमाना भएकाले तरकारी किन्ने, अस्पताल जाने र पढ्न जाने बहानामा सजिलै मानव तस्करी हुने सम्भावना बढो छ । वैदेशिक रोजगारको आडमा मानव तस्करसँगै यहाँ खुला सिमानामा भारततर्फ उपचार गर्न जान्छु भन्दै बोर्डर पार गर्ने खतरा पछिल्लो अवस्थामा देखापरेको संयोजक कोइरालाले बताए । ‘पेट दुख्यो उपचार गर्न जान्छु भन्दै सीमा पार गर्नेहरू पनि छन्,’ उनले भने, ‘यस्तो बेला हामी धर्मसंकटमा पर्छौं । वयान र हुलिया हेर्दा शंका लागे रोकिहाल्छौं ।’


उनका अनुसार मानव तस्करले इन्टरनेटलाई धारिलो हतियार बनाएका छन् । त्यसबाट पढेलेखेका समेत झुक्किएर बोर्डर पार गर्न आएका छन् । पहिला प्रत्यक्ष भेटेर नाटकीय बिहे गरेर मानव तस्कर गर्ने दलाल थिए भने अहिले सामाजिक सन्जालजस्ता भर्चुअल संसारमा सम्बन्ध गाँसेर युवतीको मन जित्ने मानव तस्कर बढेका छन् । सन् २०१८ मा नेपालगन्ज नाका हुँदै भारत जाने क्रममा ९ सय २० जनालाई जोखिमपूर्ण यात्राको शंकामा माइती नेपालले फिर्ता गरेको छ ।


त्यस्तै, ८२ जना भारत, साउदी र कुवेतमा मानव बेचबिखनको चंगुलमा फसेकालाई उद्धार गरेको तथ्यांक छ । बढो प्रविधिले मानव तस्करलाई थप सहज बनाउँदै गएको र यसमा व्यक्ति आफैं सचेत हुनुपर्ने अवस्था आएको माइती नेपाल नेपालगन्जका संयोजक कोइरालाले बताए ।

प्रकाशित : जेष्ठ १, २०७६ ११:१०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT