अतिथि गृह बेवारिसे

एलपी देवकोटा

जुम्ला — सदरमुकाम खलंगास्थित जिल्ला समन्वय समितिको अतिथि गृह भवन बेवारिसे बनेको छ । जिल्लामा आउने सरकारी अतिथिका लागि निर्माण गरिएको अतिथि गृह संरक्षण अभावमा बेवारिसे बन्दै गएको हो ।

साबिक जिल्ला प्राविधिक कार्यालयले शान्ति तथा पुनर्निर्माण मन्त्रालयको सहयोगमा भवन बनेको थियो ।

टुँडिखेलनजिकै कभर्डहल बन्नुअघि निर्माण भएको वर्षौं बित्दा पनि प्रयोगमा आउन सकेको छैन । निर्माण सम्पन्न भइसकेको अतिथि गृहको स्वामित्व जिल्ला समन्वय समितिले ग्रहण नगर्दा अलपत्र परेको हो । प्रयोगविहीन भवन अहिले खुला शौचालयमा परिणत भएको छ । बाहिरबाट हेर्दा भवन आकर्षक देखिन्छ ।

तर, भित्र जाँदा दुर्गन्धले पस्नै सकिँदैन । भवनभित्रका सबै कोठामा शौच देखिने गरेको स्थानीय नन्दराम जैशी बताउँछन् । ‘भवन सबैको पहुँच र पायक पर्ने स्थानमा भएकाले अधिकांश नागरिक खुला शौच गर्न भवनभित्रै पस्ने गर्छन्,’ उनले भने, ‘संरक्षण नहुँदा सरकारी लगानी खेर गएको छ ।’

भवनभित्र र बाहिरका सबै झ्यालका सिसा फुटाइएको छ । वाइरिङ गरिएका विद्युत्का तार चोरी भइसकेका छन् । स्थानीय रमेश नेपालीका अनुसार भवन लागूऔषध सेवन गर्ने युवाको भेट्ने थलो बनेको छ ।

करोडौंमा निर्माण भएको सरकारी अतिथि गृह दुर्गन्धित बन्दै गएको स्थानीयको भनाइ छ । स्थानीयका अनुसार सरकारी अधिकारीको लापरबाहीले भवन सदुपयोग हुन सकेको छैन । यसलाई व्यापारिक प्रयोजनका लागि भाडामा दिएरसमेत सरकारी आम्दानी बढाउन सकिने स्थानीय बरमबहादुर महतले बताए । उनका अनुसार भवन दिनप्रतिदिन जीर्ण बन्दै गएको छ ।

साबिक जिल्ला प्राविधिक कार्यालयले निर्माण गरेको भवनको जमिन भने समन्वय समितिकै हो । अहिले निर्माणको जिम्मा लिएको कार्यालय खारेज भइसकेकाले स्वामित्व हस्तान्तरणमा अन्योल भएको जिससका जनप्रतिनिधिको भनाइ छ ।

भवन निर्माण गरेको ठेकेदार कम्पनीले पटकपटक भवन बुझिदिन अनुरोध गरे पनि जिससका अधिकारीले मानेका छैनन् । जिसस उपप्रमुख कार्मा बुढाले समितिलाई भवन हस्तान्तरण नभएको बताए । ‘भवन लथालिंग भएकाले प्रयोगमा ल्याउन सकिएको छैन,’ उनले भने, ‘यस विषयमा सरोकारवालासँग आवश्यक छलफल गरी निर्णय गरिनेछ ।’

प्रकाशित : जेष्ठ १०, २०७६ ०९:१८
प्रतिक्रिया
पठाउनुहोस्
ADVERTISEMENT

भारतबाट तारजाली बुन्न सल्यान

दिनभर दुःख गरी काम गरे पनि बिचौलियाकै कारण मजदुरहरू ठगिएको गुनासो
विप्लव महर्जन

सल्यान — नेपालको सीमा क्षेत्रनजिकै कोसी ब्यारेजबाट आएका ४० वर्षीय एकरम मलाखले शारदा नगरपालिका १, शान्तिनगर नजिकै तारजाली बुन्न थालेको वर्षौं बित्यो । उनी सडक र खोलामा बाँध निर्माणका लागि तारजाली बुन्ने गर्छन् ।

नेपाल–भारत सीमाको भारतस्थित कोसी ब्यारेजबाट आएका मजदुर सल्यानको शारदा नगरपालिका १, शान्तिनगरमा तारजाली बुन्दै । तस्बिर : विप्लव/कान्तिपुर 

२२ वर्षदेखि तार जाली बुन्ने काममा लागेका उनी ३ महिनाका लागि सल्यान आउँछन् । उनीसँगै तारजाली बुन्ने काममा आजमान हुसेन पनि दैनिक व्यस्त रहन्छन् ।

उनीहरू मात्र होइन्, भारतका विभिन्न ठाउँबाट दुई दर्जन बढी व्यक्ति बर्सेनि तारजाली बुन्न जिल्लाका विभिन्न ठाउँमा आउने गरेका छन् । ३ जनाको समूह बनाई उनीहरूले दैनिक २ जाली बुन्ने गरेका छन् । आफूहरूको पुर्ख्यौली पेसा भएकाले यसलाई निरन्तरता दिँदै आएको उनीहरूले जनाए ।

तारजाली बुन्दा धेरै दुःख हुने गरेको उनीहरूकै समूहका अमरन अबदुलले बताए । उनका अनुसार विभिन्न पहाडी जिल्लामा गई तारजाली बुनेको रकमले उनीहरूको परिवारको खर्च चलिरहेको छ । उनले सिजनमा ३५ हजार रुपैयाँसम्म कमाइ हुने गरेको जानकारी दिए ।

मलाखले एकै ठाउँमा बसेर वर्षभरि काम गर्न पाए घरपरिवारको खर्च कटाएर वर्षमा १ लाखजति बचत गर्न सकिने जनाए । उनका अनुसार तारजाली बुन्ने काम पहिलेभन्दा धेरै कम भएको छ । ठेकेदारले तारजाली बुन्न विभिन्न जिल्लामा लैजाने गरेको उनी बताउँछन् ।

‘धेरै रकम कमाउन नसके पनि परिवार खर्च धान्न सकेका छौं,’ उनले भने, ‘अन्य काम गर्न नजान्ने भएकाले यसैमा सन्तुष्ट छौं ।’ ठेकेदारले सम्पर्क गरी भारतबाट काम गर्न सल्यान ल्याएको उनले जानकारी दिए । उनले पनि तारजाली बुन्न थालेको २० वर्ष बढी भएको छ ।

अभिभावकले राम्रो शिक्षा दिन नसके पनि सीप सिकाएकाले बेरोजगार बस्नु नपरेको अमरन अबदुलको भनाइ छ । उनका अनुसार तारजाली बुन्ने कामबाट खासै फाइदा नभए पनि पुख्यौली पेसा जोगाउन सजिलो भइरहेको छ । उनले वर्षभरि विभिन्न जिल्ला र ठाउँमा जानुपर्ने भएकाले धेरै रकम बचत गर्न समस्या भएको जानकारी दिए । दिनभर धेरै दुःख गरी काम गरे पनि बिचौलियाकै कारण आफूहरू ठगिएको उनको गुनासो छ ।

आलम तारजाली उद्योगका प्रोपराइटर तारिक अनवरले पहिलाजस्तो काम आउन छाडेकाले उद्योग र मजदुर संकटमा परेको बताए । ठेकेदारले माग गरेपछि मात्रै तारजाली बुन्न विभिन्न ठाउँमा मजदुरलाई पठाउने गरेको उनले जानकारी दिए । उनका अनुसार अहिले अधिकांश विकासे कार्यालयले काम नदिँदा र बाहिरको तारजाली प्रयोग गर्दा समस्या भएको हो ।

प्रकाशित : जेष्ठ १०, २०७६ ०९:१७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT