कर्णाली नदीमा जिप खोज्दै गोताखोर

कान्तिपुर संवाददाता

(हुम्ला) — कर्णाली नदीमा खसेर १० यात्रुसहित मंगलबारदेखि बेपत्ता जिप खोज्न खापुनार्थ गाउँपालिका(५ कैलावालुमा गोताखोरको टोली पुगेको छ । जिप नदीमा खस्दा खापुनार्थ गाउँपालिकाका उपाध्यक्षसहित कम्तीमा १० जना बेपत्ता छन् ।  

बुधबार दिउँसो नेपाली सेनाको हेलिकप्टरबाट चितवन कुरिनटारका गोताखोरको टोली हुम्ला पुगेको हो । सशस्त्रका प्रहरी निरीक्षक लक्ष्मण बस्नेतसहित १० जनाको टोली घटनास्थल पुगेको निमित्त प्रमुख जिल्ला अधिकारी महेशकुमार पोखरेलले बताए । गोताखोर टोलीले कर्णाली नदीका तीन ठाउँमा खोजी कार्य जारी राखेको छ । ‘गोताखोर टोलीले खोजी कार्य सुरु गरेको छ,’ उनले भने, ‘दुर्घटनामा परेको जिप र यात्रु फेला परिसकेका छैनन् ।’

खार्पुदेखि गाउँपालिकाको केन्द्र याङचु जाने क्रममा लु१ज ७१६६ नम्बरको जिप सडकबाट करिब २० मिटर तल कर्णाली नदीमा खसेको थियो । जिपमा कति जना चढेका थिए भन्ने अझै यकिन हुन नसकेको प्रहरीले जनाएको छ । बेपत्ता हुनेमा खार्पुनाथ गाउँपालिका उपाध्यक्ष सिन्धु हमाल शाही, जिपचालक मणिराज शाही, यात्रुहरू काठमाडौं थानकोटका राजु श्रेष्ठ, खार्पुनाथ ४ का चन्द्र हमाल, नैनसिंह भण्डारी, खार्पुनाथ ५ की वसन्ती शाही, नन्ददेवी सिंह, गोकुल सुनार, खार्पुनाथ १ का कौर दमाईं र उनका २ वर्षीय छोरालगायत छन् ।

दुर्घटनास्थल सिमकोटदेखि १४ किमि टाढा पर्छ । २ वर्षअघि नेपाली सेनाको हेलिकप्टरबाट ल्याइएको गाडी दुर्घटनामा परेको हो । उक्त जिप खार्पुनाथ यातायात प्रालिले सञ्चालन गरेको थियो । प्रालिका नाममा चारवटा बोलेरो जिप छन् । जिपहरू एउटामा १६ जना यात्रु क्षमताको रहेको प्रालिका अध्यक्ष सरोज रावतले बताए ।

खापुनार्थ गाउँ कार्यपालिकाको बुधबार भएको बैठकले दुर्घटनाप्रति शोक व्यक्त गरेको छ । अध्यक्ष कर्ण रावलका अनुसार बैठकले १३ दिनसम्म गाउँपालिकाभित्र कुनै औपचारिक कार्यक्रम नगर्ने निर्णय गरेको छ । दुर्घटनामा मृत्यु भएकाका परिवारलाई काजकिरिया खर्चबापत १० हजार रुपैयाँ दिने निर्णय गरेको रावलले जानकारी दिए ।

प्रकाशित : असार ४, २०७६ २१:५९
प्रतिक्रिया
पठाउनुहोस्

जिप दुर्घटना : शोकमा सार्वजनिक बिदा

सबै मृतकको सामूहिक अन्त्येष्टि, परिवारलाई क्षतिपूर्तिबापत ३ लाख
वसन्तप्रताप सिंह

बझाङ — जिल्लामा सोमबार भएको जिप दुर्घटनाका मृतकहरुको सामूहिक दाहसंस्कार गरिएको छ । कोटदेवल गाउँका ९ जनाको बुधबार सदरमुकामनजिक सेतीकिनारको धौलाबगरमा र जिन्नाडा घर भएका जिप चालक सुरेन्द्र थापाको जिन्नाडीगाडमा अन्त्येष्टि गरिएको हो ।

बझाङमा भएको यो अहिलेसम्मकै ठूलो सडक दुर्घटना हो ।

कोटलदेवल तथा जिल्लाका विभिन्न ठाउँबाट सयौंको संख्यामा आएका स्थानीय शवयात्रामा सहभागी थिए । विभिन्न राजनीतिक दलका नेता, स्थानीय तहका जनप्रतिनिधिसमेत जिल्ला अस्पताल सिमखेतबाट धौलाबगर, आर्यघाटसम्म पुगे । दुर्घटनामा आमाबुबा र भाइ गुमाएका कोटदेवलका सन्देश खडाले मृतकहरुलाई सामूहिक दागबत्ती दिएका थिए ।

यस्तो दृश्य देख्दा मृतकका आफन्त र परिवार सदस्य मूर्च्छितजस्तै हुन पुगेका थिए । उनीहरुको स्थानीय स्वास्थ्यकर्मीले उपचार गरिरहेका छन् । ‘यस्तो डरलाग्दो घटना कहिल्यै नहोस्,’ कोटदेवलका ७० वर्षीय गोर्ख खडाले भने, ‘हाम्रो त गाउँ नै सोत्तर भयो ।’ एउटा परिवारका २ जना सदस्यबाहेक सबैको मृत्यु भएको र ५ परिवारका नाबालक केटाकेटीले अभिभावक गुमाएको उनले बताए ।

दुर्घटनाले गाउँपालिका शोकमा डुबेको भन्दै मष्टा गाउँपालिकाले बुधबार सार्वजनिक बिदा दिएको छ । मंगलबार बसेको गाउँ कार्यपालिका बैठकले शोक प्रस्ताव पारित गर्दै सरकारी, गैरसरकारी कार्यालय र विद्यालय बिदा दिने निर्णय गरेको थियो ।

बैठकले मृतकका परिवारलाई क्रिया खर्च बापत नगद ५ हजार र घाइतेको उपचारका लागि प्रतिव्यक्ति ५० हजार आर्थिक सहयोग गर्ने निर्णयसमेत गरेको गाउँपालिका अध्यक्ष कर्णबहादुर कठायतले बताए । अभिभावक गुमाएर बिचल्ली परेका बालबालिकाको पालनपोषण र शिक्षादीक्षाबारे पनि गाउँपालिकामा छलफल भइरहेको उनले जानकारी दिए ।

क्षतिपूर्ति र उपचारका विषयमा मंगलबार दिनभर भएको छलफलमा साँझ अबेर मात्र सहमति जुटेको थियो । जिल्ला प्रशासन र जिल्ला समन्वय समितिको रोहबरमा भएको छलफलमा जिप मालिकले मृतकको परिवारलाई नगद तीन लाख क्षतिपुर्ति र घाइतेको सम्पुर्ण उपचार खर्च व्यहोर्ने सहमति भएको मष्टा–१ का वडाध्यक्ष राजेन्द्र खडाले जानकारी दिए ।

प्रकाशित : असार ४, २०७६ २०:२९
पूरा पढ्नुहोस्
प्रतिक्रिया
पठाउनुहोस्