अख्तियारमा सल्यानका ७१ उजुरी

कान्तिपुर संवाददाता

सल्यान — झन्डै २ वर्षे अवधिमा अख्तियार दुरुपयोग अनुसन्धान आयोगमा सल्यानका ७१ उजुरी परेका छन् । तीमध्ये ३७ उजुरी फर्स्यौट भएका छन् भने ३४ अनुसन्धान प्रक्रियामा छन् । 

आयोगको सुर्खेत कार्यालयका अनुसार सबैभन्दा बढी शिक्षाका ३२ र स्थानीय तहका १३ परेका छन् । सुर्खेत कार्यालयका सूचना अधिकारी मेघनाथ सापकोटाका अनुसार त्यसमध्ये शिक्षाका २० उजुरी फर्स्यौट भइसकेका छन् ।

उनले दुई वर्षको अवधिमा १८ जनालाई कारवाहीको दायरामा ल्याइएको जानकारी दिए । बाग्चौर नगरपालिकाको बांगेलाखुरीमा विद्युत्को पोल खरिद प्रक्रियामा अनियमितता भएको भन्दै उनीहरूलाई कारबाही प्रक्रियामा ल्याइएको कार्यालयले जनाएको छ ।

विद्युत् लाइन विस्तारका लागि सांसद क्षेत्र विकास कोषबाट १० लाख र साविक गाविस कार्यालयबाट ५ लाख रुपैयाँ विनियोजन गरिएको थियो । अनियमिततामा संलग्नलाई आवश्यक कारबाहीका लागि २०७५ फागुन ७ मा विशेष अदालतमा मुद्दा दायर गरिएको कार्यालयले जनाएको छ ।

स्थानीय तहले खर्च मनपरी गरेको भन्दै उजुरी दर्ता गरेको अख्तियारले जनाएको छ । त्यस्तै शिक्षा क्षेत्रमा भवन निर्माणमा अनियमितता भएको, विद्यालय व्यवस्थापन समिति अवैध तरिकाले गठन गरेको, शिक्षक नियुक्ति र परीक्षामा मनपरी गरेको भन्दै उजुरी परेका छन् । विभिन्न सरकारी कार्यालयले निर्माण प्रक्रियामा लापरबाही गरेको स्टमेटअनुसार काम नगरेको, उपभोक्ता समितिले रकम हिनामिना गरेको लगायत उजुरी दर्ता भएका छन् ।

प्रमुख जिल्ला अधिकारी चूडाराज न्यौपानेले जिल्लाका स्थानीय तहबाट खासै उजुरी नपरेको बताए । उनले स्थानीय प्रशासनमा २/३ वटा स्थानीय तहका मौखिक गुनासा आएको जानकारी दिए । उनले अनियमितता गर्ने कर्मचारीलाई कारबाहीको दायरामा ल्याइने प्रतिबद्धता गरे ।

प्रकाशित : असार ५, २०७६ ०९:४५
प्रतिक्रिया
पठाउनुहोस्

स्थानीय तहका महिला जनप्रतिनिधिको गुनासो–'काम गर्ने जिम्मेवारी दिइएन’

महिला सदस्यलाई बैठकका बेला मात्रै खोजी गरिने र अघिपछि कुनै सल्लाह र छलफलमा समावेश नगर्ने गुनासो 
मेनुका ढुंगाना

अछाम — स्थानीय तहमा निर्वाचित वडा तहसम्मका महिला सदस्यले जिम्मेवारी नपाएको गुनासो गरेका छन् । बैठकका बेला मात्रै खोजी हुने र अघिपछि कुनै सल्लाह र छलफलमा समेत नबोलाइने गरिएको उनीहरूले बताए । 

‘गाउँले र मतदाता हामीले नेता बनायौं । जान्ने बुझ्ने हुनुभयो, अहिले हाम्रा कुरा सुन्नै हुन्न भन्छन्,’ मंगलसैन नगरपालिका १३ बस्तीकी महिला वडा सदस्य सरु धामीले भनिन्, ‘हाम्रा समस्याका बारेमा बोल्नु हुन्न भनेर महिला गुनासो गरिरहेका हुन्छन् ।’

महिलालाई भेटिएपछि के गुनासो गर्ने हुन भन्ने पीर लाग्ने गरेको उनले बताइन् । मंगलसैन नगरपालिका– २ की भुन्टी ढोली दलित महिला सदस्यमा निर्वाचित भइसकेपछि उनीसँग समूदायका महिलाले विभिन्न गुनासो गरिरहेका हुन्छन् ।

तर आफुले वडामा हुने बैठकमा हस्ताक्षर गर्नेबाहेक अन्य कुनै पनि जिम्मेवारी र भूमिका नपाएको बताइन् । ‘दलित वर्गको अधिकारका लागि यो गर्छु, त्यो गर्छु भनेर भोट मागेँ तर अहिले केही पनि गर्न नसक्दा खिन्न भएकी छु,’ उनले भनिन्, ‘वडाअध्यक्षले पनि खासै समन्वय गर्दैनन् । हामीले बोलेको कुरा सुन्ने पनि कोही छैनन् ।’

वडा ५ की सदस्य पारु नगार्जीको गुनासो पनि उस्तै छ । ‘सामान्य परिवेशबाट राजनीतिमा आइयो । केही जानिएला, बुझिएला र समुदायका लागि केही गर्न सकिएला भन्ने लागेको थियो । तर, अहिलेसम्म कुनै अवसर पाएको छैन,’ उनले भनिन्, ‘खुल्लाबाट जितेका वडा सदस्यलाई त कुनै जिम्मेवारी छैन भने हामीले त कोटामा जितेका भएर होला कसैले टेर्दैनन् ।’ दलित कोटाबाट निर्वाचित सदस्य आफ्नो भूमिका र जिम्मेवारीका विषयमा अनभिज्ञ छन् । ‘हाम्रो भूमिका के भन्ने पनि थाहा छैन,’ नगार्जीले भनिन्, ‘बैठकमा बोलाए जाने हो । नत्र घरकै काममा व्यस्त हुन्छु । हस्ताक्षर गर्ने बाहेक अरू काम छैन ।’

आफ्नो जिम्मेवारी खोज्दाखोज्दै कामविहीन बनेको अर्की महिला सदस्य गंगा थापाले बताइन् । ‘वडामा योजना छनोट कसरी हुन्छन्, अनुगमन र भुक्तानी कहिले हुन्छ, हामीलाई केही जानकारी हुँदैन । खोजीनिति गरेपनि जानकारी पाइँदैन ।’ उनले भनिन्, ‘स्नातक तहसम्म अध्ययन गरेकी छु । क्षमता पनि छ । तर मुल्याकंन कसैले गर्दैनन् । जिम्मेवारी दिँदैनन् ।’

वडाका महिलाले आफूहरूलाई के योजना छन् भनेर सोधपुछ गर्दा जवाफ दिन नसकेको उनको भनाइ छ । ‘महिला लक्षित योजना खै भनेर दिदीबहिनी सोध्छन् । कतिपय अवस्थामा त गाली पनि सहनुपरेको छ,’ उनले भनिन्, ‘वडा अध्यक्ष बाहिर हुँदा एक पटक कार्यवाहक अध्यक्षको जिम्मेवारी पाएकी थिएँ । त्यो बेला पनि खासै केही गर्न सकिएन ।’

समुदायमा राम्रो काम गरे पुरुषले गरेको भनिन्छ, तर नराम्रो भयो भने महिलाले गरेको भन्दै भ्रम सिर्जना गर्ने गरिएको मंगलसैन ४ की सदस्य भावना केसीले बताइन् ।

‘अध्यक्ष नहुँदा महिलालाई कार्यवाहक दिन पनि अप्ठ्यारो मान्छन् तर म बोलेरै कार्यवाहक पनि भएँ । वडामा अध्यक्ष र सचिवको मात्रै काम देखिन्छ,’ उनले भनिन् । काम गर्ने जिम्मेवारी नपाएकामा उनीहरू सबैको साझागुनासो छ ।

प्रकाशित : असार ५, २०७६ ०९:४४
पूरा पढ्नुहोस्
प्रतिक्रिया
पठाउनुहोस्