जीर्ण सडकले दुर्घटना बढ्यो

विप्लव महर्जन

सल्यान — जिल्लामा बर्सेनि दुर्घटना बढदै गएको छ । सडक जीर्ण बन्दै जानु, तीव्र गति, ट्राफिक नियम उंलघन, मादक पदार्थ सेवनलगायत कारण दुर्घटना बढेको हो । जिल्ला ट्राफिक प्रहरी कार्यालयका अनुसार आव ०७३/७४ मा ४६ दुर्घटना हुँदा १२ जनाको मृत्यु भयो भने ४२ घाइते भए ।

त्यस्तै ०७४/७५ मा ३७ दुर्घटना हुँदा २० जनाको मृत्यु भयो भने १ सय २९ घाइते भए । चालु आवको साउनदेखि असारसम्म ९१ गाडी दुर्घटनामा हुँदा १८ जनाको ज्यान गएको छ भने १ सय ६० घाइते भएका छन् । मदिरा सेवन गरी मोटरसाइकल चलाउँदा बढी दुर्घटना हुने गरेको प्रहरीको भनाइ छ । जिल्ला ट्राफिक इन्चार्ज प्रहरी नायब निरीक्षक (सई) ज्ञानेन्द्र शर्माले चालकको लापरबाही र यान्त्रिक खराबीले पनि दुर्घटना बढदै गएको जानकारी दिए ।

दुर्घटना न्यूनीकरण गर्न विभिन्न निकायसँग समन्वय गरी सचेतनामूलक कार्यक्रम सञ्चालन गरिरहेको प्रहरीले जनाएको छ । जोखिमयुक्त सडकमा सूचना बोर्ड टाँस गरिएको प्रहरीको भनाइ छ । ‘गत वर्षको तुलनामा यस वर्ष ठूला घटना बढी भएका छन्,’ शर्माले भने, ‘सबैभन्दा बढी मोटरसाइकल दुर्घटना भएका छन् ।’ उनले ठूला गाडीले बढी रकम आम्दानी गर्ने लोभमा तीव्र गतिमा सञ्चालन गर्दा दुर्घटना बढेको बताए । यात्रुबाहक गाडीले क्षमताभन्दा बढी यात्रु र सामान राख्दा पनि दुर्घटनाको जोखिम बढेको उनले बताए ।

चालु आवमा ९ ट्रक, ९ बस, १३ ट्र्याक्टर, १८ जिप र ४२ मोटरसाइकल दुर्घटनामा परेको प्रहरीले जनाएको छ । कार्यालयका अनुसार जिल्लाभर दैनिक २ सय ५० बढी यातायातका साधन सञ्चालन हुने गरेका छन् । विगतको तुलनामा सवारी साधनको चाप बढदै गएका पनि दुर्घटनाको दर बढेको हो । सबैभन्दा बढी दुर्घटना सल्लीबजार आसपास र कपुरकोटदेखि लुहामसम्मको क्षेत्रमा हुने गरेका छन् । जिल्ला प्रहरी कार्यालयका डिएसपी वीरेन्द्रबहादुर शाहीले सडक जीर्ण, साघुँरो र खाल्डाखुल्डीसहितको भएकाले दुर्घटनाको बढेको बताए ।

उनका अनुसार कच्ची सडकमा बढी दुर्घटना हुन थालेका छन् । उनले सोमबार मात्रै कपुरकोट गाउँपालिका ३, मा ना.४ख ९७११ नम्बरको ट्रक दुर्घटना हुँदा १ जनाको मृत्यु र ८ जना घाइते भएको जानकारी दिए । उनले विद्यालयमा समेत सचेतना अभिबृद्धिका कार्यक्रम सञ्चालन गरिएको जनाए । नियम उल्लंघन बढेसँगै राजस्व पनि बढेको प्रहरीको भनाइ छ । कार्यालयका अनुसार गत वर्ष १० हजार ३ सय सवारीसाधन कारबाहीमा पर्दा ५४ लाख रुपैयाँ जरिवाना संकलन भएको छ । यस वर्ष ५० लाख रुपैयाँ बढी राजस्व संकलन भएको इञ्चार्ज शर्माले जानकारी दिए ।

प्रकाशित : असार २५, २०७६ ११:१९
प्रतिक्रिया
पठाउनुहोस्

गाउँपालिकामा श्रम बैंक

ज्योति कटुवाल

दैलेख — भगवतीमाई गाउँपालिकाले डोजरबाट हुने विकास निर्माण रोक्न श्रम रोजगार बैंक स्थापनाको तयारी गरेको छ । गाउँपालिकाका अनुसार विकास निर्माणका नाममा हुने विकृति र वातावरणीय क्षति न्यूनीकरणका लागि डोजर प्रयोग कम गर्न लागिएको हो ।विकासका नाममा हुने डोजरको प्रयोगलाई निरुत्साहित गर्न र स्थानीयस्तरमा रोजगारीका अवसर सिर्जना गर्न श्रम रोजगार बैंक स्थापना गर्न थालिएको गाउँपालिकाका अध्यक्ष दानबहादुर थापाले बताए ।

‘असारे विकासको चटारोमा डोजरको प्रयोग गर्दा विनाश निम्त्याएको छ,’ उनले भने, ‘डोजर प्रयोगकै कारण सामान्य पानी परे पनि गाउँहरू पहिरोको उच्च जोखिममा पर्न थालेका छन् ।’ डोजरको विस्थापनसँगै बेरोजगार युवाले गाउँमै रोजगार पाउने उनको भनाइ छ । गाउँपालिकाका सम्पूर्ण योजनामा वडाबाट छनोट भएका श्रमिक परिचालन गरिने उनले जानकारी दिए । उनका अनुसार गाउँपालिकाले १८ देखि ४० वर्ष उमेर समूहका बेरोजगार युवा/युवतीलाई उच्च प्राथमिकतामा राखी रोजगारी दिने योजना बनाएको हो । सबै वडाबाट छनोट भएका श्रमिकको समूह बनाएर विकास निर्माणका काममा परिचालन गरिने गाउँपालिका अध्यक्ष थापाले जनाए ।

प्रमुख प्रशासकीय अधिकृत बखतबहादुर खडकाले श्रम रोजगार बैंक स्थापना गरेपछि युवालाई गाउँपालिका बाहिरका विकास निर्माणका काममा समेत लगाउन सकिने जनाए । ‘अन्य स्थानीय तहलाई आवश्यक परेको खण्डमा सम्झौता गरी श्रमिक उपलब्ध गराउन सकिनेछ,’ उनले भने, ‘वार्षिक नीति तथा कार्यक्रम अनुसार बैक स्थापनाको तयारी थालेका छौं ।’ रोजगार बैंक स्थापनापछि १ वडामा २० बेरोजगारले रोजगारी पाउने उनले जानकारी दिए । कार्यक्रमअनुसार गाउँपालिकाका १ सय ४० जनाले रोजगार पाउने उनको भनाइ छ ।

श्रम रोजगार बैंक स्थापनापछि रोजगारी खोज्दै भारतका विभिन्न ठाउँमा जानुपर्ने बाध्यताको अन्त्य हुने स्थानीयको भनाइ छ । भगवतीमाई ५ का गोविन्द थापाले यसअघि करोडौं रकम डोजर प्रयोगका नाममा बाहिरिएको बताए । ‘अब स्थानीयस्तरमै रोजगारीका अबसर सिर्जना हुने अपेक्षा छ,’ उनले भने, ‘श्रम रोजगार बैंकले विकासमा हुने विकृति रोक्नसमेत भूमिका खेल्नेछ ।’
‘गाउँपालिकाको समृद्धिको आधार, सामाजिक विकासमा हरेक पक्षमा युवाहरूको हात’ नारासहित कार्यक्रम सञ्चालन गर्न लागिएको हो ।

गाउँपालिकाका इन्जिनियर शैलेश शर्माले आगामी आवमा अप्ठ्यारो स्थानमा मात्र डोजरको प्रयोग गरिने जानकारी दिए । उनका अनुसार गाउँपालिकामा जुनसुकै काम पनि छनोट भएका श्रमिकबाट गराउने योजना छ । सडक, कुलो, पर्खाल, नालीजस्ता काममा स्थानीय जनशक्ति परिचालन गरिने उनी बताउँछन् ।

श्रम रोजगार बैंकको सदस्य भएपछि गाउँपालिकाले चाहेको खण्डमा आवश्यकीय, निःशुल्क/सशुल्क, सुरक्षा सेवा, प्रकोप न्यूनीकरणजस्ता कामहरू गर्नुपर्ने प्रमुख प्रशासकीय अधिकृत खडकाले जनाए । उनका अनुसार बैंकलाई व्यवस्थित गर्न कार्यविधिसमेत बनाएको छ ।

श्रम रोजगार बैंकमा अन्य श्रमिक वडाबाट छनोट गरे पनि अध्यक्ष र मुख्य व्यवस्थापक भने गाउँपालिकाले छनोट गर्ने कार्यविधि बनाइएको छ । ‘प्रत्येक वडामा २० जनाको समूह बनाइनेछ, जसमा एकजना प्राविधिक र व्यवस्थापक अनिवार्य हुनेछन्,’ उनले भने, ‘श्रमिकका लागि १० लाख रुपैयाँको बिमा गर्ने हाम्रो तयारी छ ।’

प्रकाशित : असार २५, २०७६ ११:१७
पूरा पढ्नुहोस्
प्रतिक्रिया
पठाउनुहोस्