उमेर नपुगेका ७ विवाह बदर

कान्तिपुर संवाददाता

रुकुम पश्चिम — रुकुम जिल्ला अदालतले ७ विवाह बदर गरेको छ । उमेर नपुगी गरिएका ती विवाह बदर गरिएको अदालतले जनाएको छ । विवाह बदरका लागि परेका १४ मध्ये ०७५/७६ मा ७ वटा मुद्दा फर्स्यौट भएका हुन् ।

बाँकी ७ मुद्दा चालु वर्ष ०७६/७७ का लागि सरेर आएका छन् । उमेर नपुगी भएका विवाह बदरका लागि परेका मुद्दामध्ये ७ वटा विवाह बदर भएको रुकुम जिल्ला अदालतले जनाएको छ । गत भदौभन्दा अघि परेका केही र भदौ पछि परेका दुबै खाले मुद्दा अदालतमा परेका थिए । गत भदौ १ देखि लागि भएको देवानी संहितामा उमेरनपुगी भएको विवाह स्वत बदर हुने उल्लेख छ ।

विवाह स्वत बदर भएको घोषणा अदालतले गर्ने भएकाले त्यस्ता मुद्दा गत आर्थिक वर्षमा परेको जिल्ला न्यायाधीश आत्मदेव जोशीले बताए । उमेर नपुग्दै विहे गर्ने र उमेर पुगेपछि सबै कुरा बुझै जाँदा विवाह बदर माग गरेर अदालत जाने गरेका छन् । ‘उमेर नपुग्दै विहे भयो, जीवनमा धेरै गर्न बाँकी जस्तो महसुस भएर विवाह बदरको मुद्दा दिएको थिएँ,’ मुसीकोट नगरपालिकाकी मनकला पुन मगरले भनिन्, ‘अदालतबाटै विवाह बदर भएपछि फेरि पठनपाठनमा जोडिएकी छु ।’ उनले सानै उमेरमा सबै ख्याल नगर्दा अन्जानमै विहे भएकाले पछि पछुतो भएको बताइन् ।

रुकुम जिल्ला अदालतले लक्ष्यभन्दा बढी मुद्धा फर्स्यौट गरेको जनाएको छ । अदालतका अनुसार आर्थिक वर्ष २०७५/०७६ मा अदालतबाट ५० प्रतिशत मुद्धा फर्स्यौट भएका हुन् । आर्थिक वर्ष २०७५/०७६ मा राखिएको लक्ष्यभन्दा ६६ थान बढी मुद्धा फर्स्यौट गरेको अदालतले जनाएको छ ।

अदालतले आर्थिक वर्ष २०७५/०७६ मा २ सय ७४ थान मुद्दा फर्स्यौट गर्ने लक्ष्य राखेकामा ३ सय ४० जान मुद्दा फर्स्यौट गरेको थियो । अदालतमा रहेका ५ सय २९ मुद्धा मध्य ३ सय ४० मुद्धा फर्स्यौट गरिएको हो । अदालतको तथ्याङ्क अनुसार आर्थिक वर्ष २०७५/०७६ मा परेका ४१ किसिमका मुद्धामध्ये सबैभन्दा बढी १ सय ९६ मुद्धा सम्बन्ध विच्छेदका छन् ।

त्यसमध्यमा ६५ मुद्धा फर्स्यौट भएका छन् भने ५१ मुद्धा यो आर्थिक वर्षमा जिम्मेवारी सरेर आएका छन् । जसमध्ये १ सय १७ थान मुद्धा महिलाको तर्फबाट सम्बन्ध विच्छेदको लागि माग गर्दै परेका थिए भने ३७ थान मुद्दा पुरुषको तर्फबाट परेका थिए । छुट्टै ४२ जना महिलाले अंशसहित सम्बन्ध विच्छेदको लागि मुद्धा दर्ता गरेका थिए ।

पुरुष बादी बनेर दर्ता भएका ३७ मुद्धामध्ये १९ फर्स्यौट भएका छन् भने १८ बाँकी छन् । गत भदौ १ गतेदेखि लागु भएको संहिता अनुसार सम्बन्ध विच्छेदका लागि पुरुषले पनि सोझै अदालतमा मुद्दा दर्ता गर्न पाउने व्यवस्था छ ।

प्रकाशित : श्रावण २, २०७६ ०९:३६
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

नीति तथा कार्यक्रम घोषणामै सीमित

राजबहादुर शाही

मुगु — छायाँनाथरारा नगरपालिकाले गत आर्थिक वर्षमा नीति तथा कार्यक्रममा समाबेश गरेका अधिकांश कार्यक्रम घोषणामै सीमित भएका छन् । बढी महत्वाकांक्षी कार्यक्रम समावेश गर्दा कार्यान्वयनमा समस्या देखिएको हो । 

छायाँनाथरारामा वडाध्यक्षको विरोधका कारण नगरसभा ढिलोगरी भएको हो । वडाध्यक्षले सबै वडामा समान रुपले बजेट विनियोजन गरिनुपर्ने भन्दै यसअघि नगरसभा वहिष्कार गरेका थिए ।

सोमबार नगरपालिकाले सार्वजनिक गरेको आर्थिक वर्ष २०७६/७७ को बजेटमा पनि गत वर्षजस्तै केही महत्वाकांक्षी योजना अघि सारिएको छ । गत वर्ष पुरा नभएका कार्यक्रमलाई फेरि कार्यान्वयन गर्नेगरी नीति तथा कार्यक्रममा समाबेश गरेपछि बजेट कार्यान्वयनमा थप चुनौती देखिएको छ । गत वर्ष घोषणा गरिएको ‘नमस्ते रारा’, ‘रारा जाऔं अभियान’ ‘एक छोरी एक खाता’, ‘नगर प्रमुख रोजगार’, ‘गरिबसँग नगर प्रमुख कार्यक्रम’, ‘दुई सन्तान’ लगायत कार्यक्रम कार्यान्वयन हुन सकेनन् । यस वर्ष पनि ती कार्यक्रम समाबेश गरिएको छ ।

चालु आर्थिक वर्षका लागि नगर प्रमुख रोजगार कार्यक्रममा १ करोड, गरिबसँग नगर प्रमुख कार्यक्रममा ५० लाख, कवर्ड हल तथा खेल मैदान निर्माणमा ७० लाख, एक छोरी एक खाताअन्तर्गत ५ लाख रुपैयाँ विनियोजन गरिएको छ । यी सबै कार्यक्रम गत वर्ष पनि घोषणा गरिएको थियो । त्यस्तै भ्यू टावर तथा पार्क निर्माणमा ५१ लाख बजेट विनियोजन गरिएको छ ।

यस वर्ष करिव ७५ प्रतिशत योजना टुक्रे बनाइएको छ । गत वर्षकै अधिकांश कार्यक्रम अलपत्र परेपछि नगरले विभिन्न योजनामा ३० हजारदेखि १ करोड रुपैयाँ विनियोजन गरेको छ । यस वर्षको नीति तथा कार्यक्रममा ‘एक गाउँ एक सडक’, ‘हिलोमुक्त गाउँ’, ‘उच्च शिक्षा अभियान’ लगायतका महत्वाकांक्षी कार्यक्रम समावेश गरेको छ । नगर सभामा नीति तथा कार्यक्रम पेश गर्दै प्रमुख हरिजंग शाहीले यो वर्ष ‘महिलासँग उप प्रमुख’ कार्यक्रम पनि थप गरिएको जानकारी दिए । कार्यक्रममा महिला शसक्तिकरण, हिंसा न्यूनीकरण, क्षमता अभिबृद्धिलगायत योजना समाबेश गरिएको छ ।

नगरले लोकप्रिय हुने नाममा केही कार्यक्रम तयारी बिना ल्याएकाले कार्यान्वयनमा चुनौती देखिएको वडा नं ७ का वडाध्यक्ष हरिचन्द्र शाहीले बताए । ‘स्थानीयको आवश्कतालाई वेबास्ता गरी कार्यक्रम ल्याइदा गत वर्ष पनि केही कार्यक्रम कार्यान्वयन हुन सकेनन्,’ उनले भने, ‘हामीले यसबारे ध्यानाकर्षण पनि गराएका हौं तर वास्ता नगरी नीति तथा कार्यक्रममा महत्वाकांक्षी कार्यक्रम ल्याइयो ।’

विगत वर्षका टुक्रे कार्यक्रमलाई यस वर्ष प्राथमिता नदिएको नगर प्रमुख शाहीले दावी गरे । यस वर्ष नगर सभामार्फत केही नगर गौरवका योजनासहित ३१ करोड ८५ लाख रुपैयाँको बजेट विनियोजन गरिएको उनले जानकारी दिए । उनका अनुसार १४ वडामा ४५ लाख रुपैयाँका दरले भागबन्डा गरिएको छ ।

प्रकाशित : श्रावण २, २०७६ ०९:३५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT