रांसा कुष्ठरोगको उच्च जोखिममा
जुम्ला — तिला गाउँपालिका ८ र ९ स्थित रांसा गाउँ कुष्ठरोगको उच्च जोखिममा परेको छ । स्थानीय सरकार गठनपछि पहिलोपटक आयोजना गरिएको स्वास्थ्य शिविरमा कुष्ठरोगको लक्षण भेटिएको छ ।
तिला गाउँपालिकाले रांसा, मालापानी, खोप्री र ढिपु गाउँ लक्षित गरी शिविरको आयोजना गरेको थियो । रांसास्थित मालापानीका २ व्यक्तिमा कुष्ठरोगको लक्षण देखिएको तिला गाउँपालिकाको स्वास्थ्य शाखा संयोजक जगदीश नेपालीले वताए ।
उनका अनुसार केहीमा कुष्ठरोगको प्रारम्भिक संकेत देखिएका थिए । शिविर आएका कुष्ठरोगीको लक्षण देखिएकालाई थप उपचारका लागि सुर्खेत रिफर गरिएको उनले जानकारी दिए ।
स्थानीयलाई घरदैलोमै स्वास्थ्य सेवा प्रवाह गर्न विभिन्न गाउँमा शिविर सञ्चालन गर्दै आइरहेको तिला गाउँपालिका उपाध्यक्ष विष्णुमाया बुढाले वताइन् । ‘यस वर्षको बजेटमा पनि स्वास्थ्यलाई विशेष प्राथमिकता दिएका छौ,’ उनले भनिन् ।
प्रकाशित : श्रावण ६, २०७६ ०९:५०