बढ्दै भैंसी तस्करी

कान्तिपुर संवाददाता

जाजरकोट — भेरी नगरपालिका २, दारका विष्णुजंग शाहले भे.१ख १८५६ को ट्रकमार्फत १० भैंसी नेपालगन्ज लैजाँदै थिए । प्रहरीले शान्तिचौतारास्थित चेक प्वाइन्टमा भैंसी बोकेको ट्रकलाई २४ घण्टासम्म रोक्यो । ट्रकमा ८ भैंसी र २ राँगा थिए ।

प्रहरीले भैसी नेपालगन्ज लैजाँदै गरेका शाहसँग चलानी, सिफारिस, पशु स्वस्थ्य परीक्षण प्रतिवेदनलगायत कागजात माग्यो । तर, शाहसँग नलगाड नगरपालिकाको सिफारिसपत्रबाहेक केही थिएन । प्रहरीले कागजातसहित शाहलाई प्रशासनमा मंगलबारै बुझायो ।

प्रजिअ ललितकुमार बस्नेतले स्त्री चौपाया काटमारका लागि ओसापसार गर्न नपाइने भएकोले भैंसी लिन नदिने भन्दै सम्बन्धित निकायमा फिर्ता गरीदिन प्रहरीलाई निर्देशन दिए । तर प्रजिअ बस्नेतले भैंसी लिन नदिनू भन्ने निर्देशन गरेको करिव ४ घण्टा नबित्दै भैंसी लोड गरिएको ट्रक बुधबार निर्वाध नेपालगन्जतर्फ हिँड्यो । भेरी नगरपालिका पशुपंक्षी शाखाले प्रजिअ बस्नेतको निर्देशनविपरीत निकासी सिफारिस दिँदा ब्यापारीले भैंसी लिन पाएका हुन् ।

त्यस्तै २ साताअघि प्रहरीले छेडाबजार चेक प्वाइन्टमा १० भैंसी बोकेको ट्रक नियन्त्रणमा लियो । प्रहरीले उक्त भैंसी लोड ट्रक भेरी नगरपालिकाको कार्यालयमा पठायो । भेरीले भैंसी व्यापारीलाई भैंसी लिन नपाउने कागज गरी सम्बन्धित किसानलाई फिर्ता दिन निर्देशन गर्‍यो । तर व्यापारीले उक्त भैंसी नेपालगन्ज पुर्‍याई बिक्री गरेरै छाडे ।

जाजरकोटदेखि नेपालगन्ज लिएर भैंसी बिक्री गर्ने यी उदाहरण मात्र हुन् । जाजरकोटबाट भैंसी तस्करी हुन थालेको महिनौं बितेको छ । सयौं भैसीको तस्करी भइसकेको छ । स्थानीय तहले भैसी संरक्षण गर्ने र काटमारका लागि बाहिर लैजान नदिने निर्णय गरे पनि उक्त निर्णयविपरीत तस्करी हुने गरेको हो ।

संरक्षणको निर्णय गर्ने भेरी र नलगाड नगरपालिकाबाटै भैसी बाहिर पठाउने क्रम बढ्दो छ । जाजरकोटमा ३० देखि ४० हजार रुपैयाँमा किनिएको भैंसी बाँकेको हवाल्दरपुरमा ७० हजारसम्ममा बिक्री हुने गरेको छ । स्थानीय दानबहादुर ओलीका अनुसार नेपालगन्ज पुग्ने अधिकांश भैंसी मासुका लागि जाने गरेको छ ।

जिल्लाबाट ६ सय बढी भैंसीको तस्करी भएको पाइएको छ । आजभोलि गाउमा भैंसी नै पाउन छाडेको उनले वताए । आर्थिक प्रलोभनमा भैंसी बाहिर पठाउने क्रम बढदै गएको छ । नलगाड नगरपालिकाले भैंसी बाहिर लैजान रोकेको नगरप्रमुख टेकबहादुर रावलले वताए । ‘मैले यसअघि २ पटक भैंसी बाहिर जान लागेको थाहा पाएपछि रोकेको थिए,’ उनले भने, ‘पटकपटक किन बदमासी भइरहेको छ, यसबारे बुझिरहेको छु ।’

प्रकाशित : श्रावण २८, २०७६ ०९:५७
ADVERTISEMENT
प्रतिक्रिया
पठाउनुहोस्

समयमै बनेन थालीगाड सबस्टेसन

‘केही बाहिरी संरचना निर्माणबाहेक अन्य काम सकिएको छ, सबस्टेसन चार्ज गर्न मात्र बाँकी हो, यसका संरचना निर्माण गरेरै २ महिनाअघि ११ केभी प्रसारण लाइन चार्ज गरिएको थियो’
मनोज बडू

दार्चुला — थालीगाड सबस्टेसनको निर्माण अझै पूरा भएको छैन । चमेलियामा उत्पादित विद्युत् दार्चुलाका विभिन्न ठाउँमा वितरण गर्न सबस्टेसन निर्माण सुरु भएको हो । काममा ढिला हुँदा चमेलियामा उत्पादन भएको विद्युत् स्थानीय उपभोग गर्नबाट वञ्चित छन् ।

२०७३ मा इनर्जी प्याक इन्जिनियरिङ नरेन्द्र निर्माण जेभीसित १ वर्षभित्र निर्माण सक्ने गरी सम्झौता भएको थियो । झन्डै ७ करोडमा निर्माण भइरहेको थालीगाड सबस्टेसन समयमै पूरा नहुँदा जिल्लावासीले अहिले पनि भारतीय बिजुली उपभोग गरिरहेका छन् ।
सबस्टेसनमा सिभिल, हाइड्रो मेकानिकल, इलेक्ट्रेनिकल लगायतको काम सकिएर वाइरिङ र स्टेसनमा रङ लगाउने काम भइरहेको प्राधिकरण क्षेत्रीय कार्यालय अत्तरियाले जनाएको छ । सबस्टेसनको हालसम्म कन्ट्रोल हाउस र ट्रान्सफर्मर स्विचलगायतका उपकरण राख्ने संरचना निर्माण भइसकेको क्षेत्रीय कार्यालयका इन्जिनियर चिजबहादुर गुरुङले बताए । ‘केही बाहिरी संरचना निर्माणबाहेक अन्य सबस्टेसनको काम सकिसकेको छ,’ उनले भने, सबस्टेसन चार्ज गर्न मात्र बाँकी हो । सबस्टेसनका संरचना निर्माण गरेरै २ महिनाअघि ११ केभी प्रसारण लाइन चार्ज गरिएको हो ।’

क्षेत्रीय कार्यालयले नै निर्माण गरिरहेको २५ किमि गोकुलेश्वर थालीगाड ३३ केभी प्रसारण लाइन निर्माणमा सकिएर शैल्यशिखर र महाकाली नगरपालिकाको सीमा क्षेत्र बडमुडे क्षेत्रमा ठूला रूख ढलेर लाइन निर्माण समस्या देखिएको उनको भनाइ छ । बीच जंगलमा ठूलो रूख ढल्दा गोकुलेश्वर थालिगाड प्रसारण लाइनमा ३ पोल ढलेका छन् ।

प्रसारण लाइन निर्माण कम्पनी र दार्चुला वितरण केन्द्रका कर्मचारीहरू अहिले बडमुडे जंगलको प्रसारण लाइन निर्माणमा खटिएको ५/७ दिन भएको दार्चुला वितरण केन्द्रका निमित्त प्रमुख मीनराज पन्तले बताए । प्राधिकरणलाई उक्त प्रसारण लाइन हस्तान्तरण नभए पनि आफूले चाँडै ३३ केभी प्रसारण लाइन चार्ज गरेर चमेलियाको उत्पादनमा जोड्ने उनको भनाइ छ ।

गोकुलेश्वर थालीगाड २५ किमि ३३ केभी प्रसारण लाइन तारुपारे खानी जेभीले निर्माण गरिरहेको छ । ३३ केभीको प्रसारण लाइनमुनिबाट ११ केभी प्रसारण तानिएको हुनाले जेठको सुरुमा राष्ट्रिय प्रसारणबाट सदरमुकाममा बिजुली बलेको वितरण केन्द्रले जनाएको छ । बडमुडे जंगलमा ३३ केभीको प्रसारण लाइन बिग्रेपछि २ साता नेपाली बिजुली उपभोग गर्न नपाउँदै फेरी
भारतीय नै बाल्न बाध्य भएको महाकाली नगरपालिका ९, दत्तुका रमेश डागाले बताए । प्रसारण लाइन र थालीगाड सबस्टेसन निर्माण सम्पन्न नहुँदा दिनहुँ अनियमित हुने भएकाले भारतीय बिजुली बाल्नुपरेको उनको भनाइ छ ।

चमेलियाले उत्पादन गरेको विद्युत् गत माघबाट राष्ट्रिय प्रसारण लाइनमा जोडिएको हो । लघु जलविद्युत् आयोजनाबाट दार्चुलामा झन्डै साढे ५ सय किलोवाट उत्पादन हुन्छ । त्यसबाहेक जिल्लाका लाली, जौलजिवी र हुतीबाट भारतीय विद्युत् खरिद गरी उपभोग गर्दै आएका छन् । दार्चुलामा प्रतियुनिट भारतबाट ११.२ रुपैयाँका दरले वार्षिक झन्डै साढे २१ लाख युनिट बिजुली खरिद गरी वितरण गरिने वितरण केन्द्रले जनाएको छ ।

प्रकाशित : श्रावण २८, २०७६ ०९:५६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT