धनी गरिबको सूचीमा परेको भन्दै विरोध

मेनुका ढुंगाना

अछाम — गरिब परिचयपत्र बाँड्ने क्रममा जिल्लाको पञ्चदेवल विनायक नगरपालिका– ६ तोलीका स्थानीयले वास्तविक गरिबले परिचयपत्र नपाई मापदण्डमा नपर्नेहरूले पाएको भन्दै वडा कार्यालय तोडफोड गरेका छन् । कार्यालयका कर्मचारीलाई हातपातसमेत गरे ।

‘तोलीमा १० वटा गरिबी परिचयपत्र वितरण गसिकेपछि ६ जना स्थानीयले कर्मचारीलाई कुटपिट गरे’ पञ्चदेवल विनायक नगरपालिकाका निमित्त प्रसाशकीय अधिकृत अष्टराज गौतमले भने ‘विवादका कारण त्यो ठाउँमा गरिबी परिचयपत्र बाँड्न सक्ने स्थिति छैन ।’

वडा कार्यालयमा संकलित राजस्वसमेत तोडफोडका बेला हिनामिना भएको बताउँदै गौतमले क्षतिको यकिन वितरण नआएको बताए । घटनामा संग्लग्न स्थानीय ६ जनालाई प्रहरीले नियन्त्रणमा लिएको छ । हाल अन्य वडामा गरिबी परिचयपत्र वितरण सुरु गरिएको गौतमले बताए । ०६८/६९ मा सर्वेक्षण गर्दा गरिब भएका परिवारका सदस्य अहिले सरकारी जागिरे र आर्थिक स्थिति बलियो भइसकेकाले पनि विरोध हुन थालेको उनले बताए ।

पूर्वयोजनाअनुसार नै तोलिमा कर्मचारीमाथि हातपात भएको बताउँदै पञ्चदेवल विनायक नगरपालिकाका उपप्रमुख अम्बिका चलाउनेले गरिबी परिचयपत्र वितरणमा कठिनाइ भएको बताइन् । ‘धनीले गरिबी परिचयपत्र पाएको हो भने उजुरी आउनुपर्‍यो, छानबिन गरेर गरिबलाई दिने प्रक्रिया अघि बढाउँछौं ।’ उनले भनिन् ‘परिचयपत्र वितरणको लागि सर्वेक्षण गरिसकेपछि मात्रै नगरपालिका गठन भएकाले यसमा नगरपालिकाको कुनै संलग्नता छैन ।’ जिल्लाका अन्य स्थानीय तहहरूमा पनि वास्तविक गरिबले परिचयपत्र नपाएको र धनीले पाएको भन्दै विरोध भइरहेको छ ।

गरिब घरपरिवार पहिचान तथा परिचयपत्र वितरण बोर्डले संकलन गरेको तथ्यांकअनुसार अछाममा झन्डै ४७ प्रतिशत गरिबी रहेको पाइएको छ । तथ्यांकअनुसार यस जिल्लामा १० हजार ७१ घरपरिवार अति गरिब, ६ हजार ४ सय ६४ मध्यम र ४ हजार ३ सय १९ घरपरिवार सामान्य गरिब रहेको तथ्यांकमा उल्लेख छ । अछाममा १० वटा स्थानीय तह छन् । यीमध्ये सबैभन्दा बढी ढकारी गाउँपालिकामा ६९ प्रतिशत गरिबी रहेको पाइएको छ । उक्त गाउँपालिकामा २ हजार २ सय ५७ परिवार गरिबीको रेखामुनि देखिएका छन् ।

पञ्चदेवल विनायक नगरपालिकामा ६६ दशमलव ७ प्रतिशत गरिबी देखिएको छ । यस नगरपालिकामा २ हजार ६ सय ७२ गरिब रहेको बोर्डका सूचना प्रविधि अधिकृत भीमबहादुर चलाउनेले बताए । तथ्यांकअनुसार तुर्माखाद गाउँपालिकामा गरिबी दर सबैभन्दा न्यून भएको स्थानीय तह देखिएको छ । तुर्माखाँद गाउँपालिकामा ३१ दशमलव ४ प्रतिशत रहेको छ ।

गरिब घरपरिवारलाई रातो, पहेंलो र नीलो गरी ३ प्रकारको परिचयपत्र तयार गरी हरेक घरपरिवारको विवरणसहित १० वटै स्थानीय तहमा वितरणका लागि हस्तान्तरण भइसकेको जिल्ला समन्वय समितिको कार्यालयले जनाउके छ । अति गरिबले रातो, मध्यमले पहेंलो र सामान्य गरिबले निलो परिचयपत्र पाउनेछन् । उक्त परिचयपत्र आफ्नो गाउँ तथा नगरपालिकाबाट लिन सक्ने व्यवस्था मिलाइएको छ ।

बोर्डले तथ्यांकहरूलाई विभिन्न १८ वटा सूचकहरूमा मापन गरेर तीन तहको गरिबीमा राखेको बताएको छ । तीनै तहका गरिब परचियपत्र पाएका व्यक्तिहरूलाई हाललाई स्वास्थ्य बिमा नि:शुल्क गरिएको बताइएको छ ।बोर्डले जिल्लामा आर्थिक वर्ष ०६८/६९ मा सामाजिक परिचालकहरूद्वारा तथ्यांक संकलन गराएको थियो । त्यही तथ्यांकलाई विश्लेषण गरी अति गरिब, मध्यम, सामान्य र गैरगरिबमा विश्लेषण गरिएको कार्यालयले जनाएको छ ।

Yamaha

तथ्यांक संकलनका क्रममा गरिबीको सूचीमा पर्नेहरू गैरगरिब तथा गैरगरिबीको सूचीमा पर्नेहरू गरिबमा परेको भेटिए उजुरी दिन सकिने अधिकृत चलाउने बताउँछन् । परिचयपत्र ५/५ वर्षमा पुनरावलोकन हुने चलाउनेले बताए । हाल केही स्थानीय तहले परिचयपत्र वितरण गर्न सुरु गरेका छन् ।

Esewa Pasal

प्रकाशित : श्रावण २७, २०७५ १०:३०
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

पर्यटन विकास समिति गठन

अर्जुन शाह

धनगढी — जिल्ला समन्वय समिति कैलालीको दोस्रो साधारणसभाले ‘जिल्ला पर्यटन विकास समिति’ गठन गरेको छ । समिति गठन भएपछि पर्यटन क्षेत्रका विकास लागि सञ्चालन हुने गतिविधिहरू एकीकृत तथा योजनाबद्ध रुपमा संचालन हुने बताइएको छ ।

जिल्लामा रहेका १३ वटै स्थानीय तहले तर्जुमा गरेका पर्यटनसम्बन्धी कार्यक्रमहरू अब जिल्ला पर्यटन समितिको समन्वयमा एकीकृत रुपमा संचालन हुने जिल्ला समन्वय समितिका संयोजक सूर्यबहादुर थापाले बताएका छन् ।

थापाले भने ‘सबै तहका योजनाहरूलाई एकीकृत गरी गुरुयोजना बनाएर कार्य सञ्चालन गर्नेछौं ।’ कैलाली जिल्लाको पर्यटन प्रवद्र्धन गर्न जिल्ला समन्वय समितिले हाल ‘कैलाली भ्रमण वर्ष ०७५’ सञ्चालन गरिरहेको छ ।

जिल्ला सभाले उक्त विकास समिति परिचालनका लागि ‘जिल्ला पर्यटन विकास समिति गठन तथा परिचालन निर्देशिका २०७५’ समेत गरेको छ । समिति जिल्ला समन्वय समितिका संयोजक अध्यक्ष रहने गरी गठित पर्यटन विकास समितिमा सबै स्थानीय तहका प्रमुखहरू, निजी क्षेत्र, पर्यटन व्यवसायी संस्थाहरू, सञ्चार क्षेत्र लगायतको प्रतिनिधित्व छ ।

प्रदेश–७ को प्रवेशद्वार रहेको कर्णाली चिसापानीदेखि उत्तरमा त्रिवेणीधाम क्षेत्र यस जिल्लाका पर्यटकीय गन्तव्य हुन् । टीकापुर पार्क पहिल्यैदेखि प्रसिद्ध छ । अहिले पनि बर्सेनि हजारौं आन्तरिक पर्यटकहरू टीकापुर पार्क अवलोकन गर्न त्यहाँ पुग्छन् । उत्तरपश्चिममा राजकाँडा क्षेत्र कैलाली जिल्लाको अर्को महत्त्वपूर्ण पर्यटकीय गन्तव्य हो । राजकाँडाबाट सूर्य उदाएको हेर्न सकिने मालिका मन्दिर क्षेत्र छ ।

मध्यवर्ती क्षेत्रमा अवस्थित घोडाघोडी ताल, घोडाघोडी मन्दिर, बेहेडाबाबा मन्दिर, गोदावरी धाम, कम्पासेधुरा डाँडा कैलालीका पर्यटकीय गन्तव्य हुन् । खानीडाँडा, बुढीतोला क्षेत्र, नैनादेवी वनदेवीजस्ता प्राचीन मन्दिर, जाखोर ताल, बेहेडा बाबा क्षेत्र प्रदेशकै प्रख्यात गन्तव्य हुन् । धार्मिक पर्यटनका लागि निकै प्रख्यात क्षेत्रको रूपमा लिन सकिन्छ ।

‘कैलाली जिल्ला ताल तलैया, वन जंगलले भरिपूर्ण जिल्लाको रूपमा स्थापित छ,’ जिससका संयोजक थापाले भने, ‘यो जिल्ला प्राकृतिक सौन्दर्यका लागि निकै उर्वरभूमि पनि हो । सबै स्थानीय तह मिलेर एकीकृत योजनका साथ कार्य गर्न सकियो भने जिल्लाको पर्यटन विकासले फड्को मार्नेछ ।’जिल्ला सभाले पर्यटन विकासको योजनाका साथै कृषि, औद्योगिक, वन तथा भूसंरक्षणको योजना विकासमा जोड दिएको छ । छरपस्ट योजनालाई एकीकृत विकास योजनामा लैजान स्थानीय तहसँग समन्वय गरी अघि बढ्ने समन्वय समितिको दोस्रो भेलाले निर्णय गरेको छ ।

जिल्ला सभाले चुरे र मोहन्याल गाउँपालिकामा एकीकृत बस्ती विकास कार्यक्रम लागू गर्न प्रदेश र केन्द्र सरकारसमक्ष अनुरोध गरेको छ । यस्तै डल्फिन संरक्षण तथा प्रजनन केन्द्र स्थापना, टीकापुरदेखि कर्णाली सेती दोभानसम्म जलयात्राको सुरुआत गर्न, चिसापानीदेखि महेन्द्रनगर गड्डाचौकीसम्मको सडकलाई ६ लेनको निर्माण गर्नसमेत संघ तथा प्रदेश सरकारलाई आग्रह गरेको छ ।

प्रकाशित : श्रावण २७, २०७५ १०:२९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT