बलात्कार गर्न खोज्ने युवक पक्राउ
बझाङ — युवतीलाई बलात्कार गर्न खोजेको आरोपमा एक युवक पक्राउ परेका छन् । बलात्कार प्रयासको आरोपमा मष्टा गाउँपालिका–२ का २५ वर्षीय दिपक फडारालाई सोमबार प्रहरीले पक्राउ गरेको हो ।
उनले जंगलमा घाँस काटिरहेकी एक १९ वर्षीया युवतीलाई बलात्कारको प्रयास गरेका थिए । युवतीले प्रतिकार गरेका कारण बलात्कार हुन नपाएको प्रहरीले जनाएको छ । बलात्कारको प्रयास गर्ने युवकसँग प्रतिकार गर्ने क्रममा युवतीको लुगाहरु च्यातिएको र शरिरमा सामान्य चोट लागेको प्रहरी निरिक्षक मिनबहादुर साउदले बताए ।
बलात्कारको प्रयास भए लगतै युवती चिच्याउँदै प्रतिकार गरेका कारण फडारा भागेका थिए । पीडित युवतीको मौखिक निवेदनका आधारमा बलात्कार प्रयास गर्नेलाई पक्राउ गरिएको जिल्ला प्रहरी कार्यालयले जनाएको छ । बलात्कार प्रयास गर्नेलाई जबरजस्तीकरणी प्रयास सम्बन्धी मुद्दा चलाउने तयारी भैरहेको निरिक्षक साउदले बताए ।