विशेष समितिले प्रतिवेदन बुझायो

प्रदेशसभामा पेस हुनुअघि समितिले प्रतिवेदनमा उल्लेख गरेको नाम र स्थायी राजधानी सार्वजनिक गरिएको छैन । स्रोतका अनुसार समितिले प्रदेशको नाम ‘खप्तड’ र स्थायी राजधानी ‘गोदावरी’ उपयुक्त हुने सुझाव दिएको बुझिएको छ ।

सभामुख थापाले प्रतिवेदन बुझ्दै चाँडै प्रदेशसभामा छलफल गराउने बताएका छन् । कार्यव्यवस्था परामर्श समिति बैठकद्वारा उक्त विषय प्रदेशसभामा कहिले प्रवेश गराउने भन्ने तय हुने जनाइएको छ । प्रदेशसभामा पेस भएपछि सुझावमाथि छलफल सुरु हुनेछ । सर्वसम्मत हुन नसके दुई तिहाइ बहुमतबाट पास गर्नुपर्ने प्रावधान छ ।

सुझाव पेस गर्ने क्रममा संघीय संसद्मा प्रतिनिधित्व गर्ने यो प्रदेशसभा सदस्यहरू, यस प्रदेशबाट प्रतिनिधित्व गर्ने विभिन्न दलका केन्द्रीय सदस्य, प्रदेश सरकार, प्रदेशका सबै संसदीय दलसँग सुझाव लिइएको समिति सदस्य बलदेव रेग्मीले बताए । यसअघि राजधानी माग गर्दै आन्दोलन गरेको डोटीस्थित जिल्ला समन्वय समितिको संयोजकत्वमा गठित माग समिति, त्यहाँस्थित उद्योग वाणिज्य संघका प्रतिनिधिसँग पनि परामर्श गरेको समितिले जनाएको छ ।

नेकपाका प्रमुख सचेतक तारा लामा तामाङको संयोजकत्वमा गठित समितिमा चुनकुमारी चौधरी, बलदेव रेग्मी, श्यामलाल राना र प्रेमप्रकाश भट्ट सदस्य थिए । साउन १४ मा गठित समितिलाई सुरुमा एक साताको म्याद दिइए पनि पछि दुईपटक थप गरिएको थियो ।