५ किलो चरेससहित पक्राउ
दार्चुला — भारतको धारचुलाबाट ५ किलोग्राम चरेससहित महाकाली–३ बाजका बलदेवसिंह महर पक्राउ परेका छन् ।
चरेस मुद्दामै जेल बसेर ९ महिनाअघि दार्चुला कारागारबाट छुटेका महर लाई उत्तराखण्ड प्रहरीले धारचुलाको घट्टेधार टीभी टावर नजिकबाट पक्राउ गरेको हो ।
महरलाई यसअघि ०७३ मंसिरमा खलंगाको बंगाबगडबाट प्रहरीले पक्राउ गरेको थियो । करिब २ किलो चरेससहित समातिएका महरविरुद्ध जिल्ला अदालत दार्चुलामा मुद्दा चलाइएको अभिलेख छ ।
जिल्ला अदालतले महरलाई ०७३ चैतमा दोषी ठहर गरेको थियो । १ वर्ष कैद र ६ हजार नगद जरिवाना तोकिएको थियो ।
महरले जरिवाना रकम तत्काल बुझाएका थिए भने २०७४ मंसिर ५ गतेसम्म सजाय भोगेको जिल्ला कारागारले जनाएको छ । गत मंसिरमा कारागारबाट छुटेका महर ९ महिनापछि दोस्रो पटक चरेससहित भारतीय प्रहरीबाट समातिएका हुन ।
४२ वर्षीय महरको साथबाट ४ किलो ८ सय २५ ग्राम चरेस बरामद भएको छ । चरेससहित समातिएका महरलाई थप अनुसन्धानका लागि पिथौरागढ लगिएको छ । महाकाली नदीमा सञ्चालित तिग्रम पुल वा तुइनमार्फत नेपालबाट चरेस लगेको हुन सक्ने आशंका गरिएको छ ।
महरसँगै धारचुला तहसिलअन्तर्गतको खेला गाउँका अर्का एकजना पनि पक्राउ परेको तर उनलाई छोडिएको स्रोतले जनाएको छ ।
प्रकाशित : भाद्र ११, २०७५ ०९:५९