७ वर्ष बित्यो, पुल निर्माण भएन

वसन्तप्रताप सिंह

तल्कोट (बझाङ) — ठेक्का स्विकृत भएको ७ बर्ष बितिसक्दा पनि जिल्लाको उत्तरी क्षेत्रलाई यातायात संजालमा जोड्ने मोटरेबल पुलको निमार्ण अझै सुरु भएको छैन् ।

पुल निर्माणस्थल बझाङको तल्कोट गाउँपालिकाको देवसैन । तस्बिर : वसन्तप्रताप

विभिन्न बहाना बनाएर वर्षाैसम्म ठेक्का ओगटेर राख्ने ठेकेदारलाई सम्बन्धित निकायले कार्वाही गर्नुको साटो वर्षैपिच्छे म्याद थप्दै आएको छ ।

तल्कोट गाउँपालिकाको देवसैनमा सेती नदीमा निमार्ण हुनुपर्ने पुलको ०६८ मा ठेक्का स्विकृत भएको थियो । याक्थुहाङ निमार्ण सेवा प्रालिले निमार्णको जिम्मा लिएपनि अहिलेसम्म काम सुरु नगरेको हो । देवसैनको पुल बनेपछि यातायात संजालमा जोडिने तल्कोट र मष्टा गाउँपालिकाका अधिकांश वस्तीमा सडक निमार्ण भैसकेको छ । तर नदीमा पुल नबन्दा करोडौ खर्च गरेर निमार्ण गरिएको सडक प्रयोगमा आउन सकेको छैन ।

Yamaha

‘देबसैनको भन्दा धेरै वर्ष पछि ठेक्का भएका पुल निर्माण भएर गाडी चल्न थालिसके,’ तल्कोट गाउँपालिकाका जनककुमार बिष्टले भने, ‘यो पुलको ठेकेदारले ७ वर्षसम्म काम सुरु नगर्दा पनि कोही केही बोल्दैनन् ।’

पुल नबनेकोले गाँउलेले चन्दा उठाएर बनाएको सडकसमेत प्रयोगमा आउन नपाएको स्थानीयले बताए । ‘गाडीको सुविधा होला भनेर घरघरबाट पैसा उठाएर सडक बनायौ,’ रिलुका धनबहादुर बोहराले भने, ‘सबै गाउँमा सडक पुगेको छ । पुल नभएका कारण गाडी चल्न सकेको छैन् । हामीले खाइ नखाई पैसा उठाएको कामै भएन ।’

निमार्ण कम्पनी याक्थुहाङका प्रमुख तेजकुमार कुरुमवाङले ठेक्का भएको केही वर्ष पुल निमार्णका लागि आवश्यक पर्ने मेसिनहरू लैजान फराकिलो बाटो नभएकोले काम सुरु गर्न नसकेको बताए । निमार्ण व्यवसायी संघका केन्द्रिय उपाध्यक्षसमेत रहेका उनी वर्षा सकिने बित्तिकै काम सुरु गर्ने बताउँछन् ।

ठेकेदारले वर्षै पिच्छे कुरा फेर्दै आएका छन् । गत वर्षसम्म उनी ठेक्का पुरानै कबोल लागतमा काम गर्न नसक्ने बताउँदै आएका थिए । गत वर्ष भनेका थिए, ‘राष्ट्र बैंकले निकाल्ने बजार मुल्यबृद्धिको सुचक अनुसार लागतमा बृद्धि गरियो भने हामी पुल बनाउन तयार छौ । अन्यथा सकिदैन ।’

यो पुलको ठेक्का भएको एक वर्षपछि नै चैनपुर रुवातोलासम्म नियमित यातायात सञ्चालन हुदै आएको छ । विभिन्न वहाना बनाएर ठेकेदारले पुल निर्माणमा आलटाल गर्न थालेपछि गाउँपालिकाको टोली पटक पटक डेलिगेसन लिएर काठमाडौं पुगेको थियो ।

गत असारमा सडक विभागका महानिर्देशक, गाउँपालिकाको टोली र ठेकेदारबीच सिंहदरबारमा छलफल भएपछि ०७६ सालको पुसभित्र पुल निर्माण कार्य सम्पन्न गर्ने प्रतिबद्धता ठेकेदारले गरेको डेलिगेसनमा सहभागी पुर्व सभासद अफिलाल ओखेडाले बताए ।

‘ठेकेदारले विभिन्न वहाना बनाउँदै पुल निर्माणको काम सुरु नगरेकाले हामीले पटकपटक काठमाडौंसम्म डेलिगेसन जानु परेको छ,’ गाउँपालिका अध्यक्ष लालबहादुर खडकाले भने, ‘समयमै पुल निर्माण नभएर हाम्रो सम्पुर्ण विकास नै अवरुद्ध भएको छ । ठेकेदार भने विभिन्न वहानामा उम्किदँै आएको छ ।’ कहिले सडक नभएको र कहिले मुल्यबृद्धि भएको भन्नु ठेकेदारको लापरबाही गर्ने बहाना मात्र भएको उनले बताए ।

करिब १२ करोडको लागतमा निमार्ण हुने उक्त पुलको काम सुरु गर्नका लागि ठेकेदारले सात वर्ष अघि १ करोड रुपैया पेश्की पनि लिइसकेका छन । काम गर्न भने आलटाल गर्दै आएको चैनपुर–ताक्लाकोट सडक आयोजना कार्यालयले जनाएको छ ।

आयोजना कार्यालयका एक कर्मचारीले भने, ‘पहिले सडक छैन भन्यो, अहिले लागत बढाउनु पर्छ भनेर रोकिराखेको छ । पहुँचवाला ठेकदारहरू यस्तै हुन् । विभागले प्रत्येक वर्ष म्याद थपेको थपै छ ।’

प्रकाशित : भाद्र १४, २०७५ ०९:३३
प्रतिक्रिया
पठाउनुहोस्
ADVERTISEMENT

कर्णाली बस्ती पस्ने खतरा

नदीले करिब ५० मिटर कटान गरिसक्यो । अब बाँकी रहेको ३ फुट डिल कटान गरेमा नदी गाउँ पस्ने खतरा
कान्तिपुर संवाददाता

टीकापुर — टीकापुर नगरपालिका–५ शाहीपुरमा कर्णाली नदीको कटानले जोखिम बढेको छ । बाँकी रहेको ३ फुट डिल कटान गरेमा नदी गाउँ पस्ने खतराले स्थानीय त्रसित छन् ।

टीकापुर नगरपालिका–५ शाहीपुरमा कर्णाली नदीले गरेको कटान । तस्बिर : गणेश चौधरी

स्थानीय प्रेम दर्लामी मगरले वर्षा रोकिएर पानीको सतह घटेन भने कर्णाली गाउँ पस्ने जोखिम कायम रहने बताए । ‘हेर्दाहेर्दै करिब ५० मिटर बढी कटान गरिसक्यो । अब बचेको ३ फिट काट्न कति समय लाग्ला ?’ उनले भने । स्थानीयले नदी कटान नियन्त्रणको प्रयास गरिरहेका छन् ।

प्रहरी र सेनाको टोलीले जैविक तटबन्ध निर्माणमा सहयोग गरिरहेको छ । तर कटान रोक्न लगाइएका झालापाता सबै नदीले बगाइदिने गरेको छ । ‘अझै वर्षाको समय गुज्रिसकेको छैन । नदीको पानी खासै घटेको छैन । यस्तै अवस्था रहेमा खतरा बढ्छ,’ प्रेदर्लामी मगरले भने ।

रानी जमरा र कुलरिया कुलो सिँचाइ आयोजनाले पनि नदी कटान रोक्न ‘स्पर’ बनाउन सुरु गरेको छ । नदी किनारको बलौटे माटोको डिल झर्न भने छोडेको छैन । करिब ३ फिट बाँकी रहेको नदीको डिल कटान भएमा कर्णालीको पानी टीकापुर नगरपालिकाका ५, ७, ८ र ९ नम्बर वडामा पस्ने वडाध्यक्ष रामशंकर डगौराले बताए । ‘नियन्त्रणको प्रयास भइरहेकै छ । तर नदीले के गर्छ भन्न सकिन्न,’ वडा नं ५ का वडाध्यक्ष डगौराले भने । कर्णाली कटान नरोकिएपछि नदी तटीय टीकापुरका बासिन्दा भयभीत छन् । वडा ७ सत्तीका सन्तोष नेपालीले भने, ‘दिउँसो फुटे त अलि कम नोक्सान होला । राती फुटे धनजनको ठुलो क्षति हुन सक्छ ।’ पक्की तटबन्ध निर्माण हुन बाँकी रहेको दौलतपुर घाट नजिकै करिब एक किलोमिटरमा कर्णाली नदीले कटान तिव्र बनाएको हो । जैविक तटबन्ध निर्माणमा श्रमदान गरेका स्थानीय तटबन्ध बगाइदिएपछि निरास बनेका छन् ।

वर्षापछि पक्की तटबन्धको काम सुरु हुने रानी जमरा कुलरिया सिचाई आयोजनाले जनाएको छ । पक्की तटबन्ध बनेको ठाउँमा नदी कटान छैन् । तटबन्ध नभएको ठाउँबाट भने नदी गाउँमा पस्ने खतरा छ ।

कर्णाली नदीमा बर्षेनि आउने बाढीका कारण यहाँको खेतीयोग्य जग्गा कटान र डुबानमा पर्दै आएको छ । नदी नियन्त्रणका लागि रानी जमरा र कुलरिया कुलो सिँचाइ आयोजनाले कर्णाली, मोहना र पथरैया नदीमा तटबन्ध काम पनि गर्दै आएको छ ।

प्रकाशित : भाद्र १४, २०७५ ०९:३२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT