खाल्डाखुल्डी पुरेर विरोध

कान्तिपुर संवाददाता

टीकापुर — यहाँका कांग्रेस कार्यकर्ताले विरोधको नयाँ शैली अपनाएका छन् । नारा जुलुस, र्‍याली बन्द होइन, विकासका काम गरेर विरोध जनाएका हुन् ।

कांग्रेस कार्यकर्ता आफैंले रकम संकलन गरे । भजनी–सुखड सडक खण्डमा रहेका खाल्डाखुल्डी पुरे । ‘नगरपालिकाले लाज मानोस् । सडकमा भएको खाल्डाखुल्डी पुरोस्,’ स्थानीय कांग्रेस कार्यकर्ता जयबहादुर बुढाले भने । भजनी नगरपालिकालाई राजमार्गसित जोड्ने सडक हिँड्नै नहुने भएपछि खाल्डाखुल्डी पुरेर विरोध जनाइएको बुढाले बताए ।

उनले भने, ‘सडकका कारण सवारी आवागमनमा समस्या भएको छ । भजनी अस्पतालबाट रिफर भएका बिरामी धनगढी र नेपालगन्ज लान पनि अप्ठ्यारो छ ।’ सडक मर्मत गरिनुपर्ने माग राख्दै विरोधस्वरूप गरिएको आन्दोलनमा २४ घनमिटर ग्राभेलबाट खाल्डा पुरिएको थियो ।

Yamaha

‘सडक मर्मतका लागि पटकपटक नगरपालिकामा डेलिकेसन गयाैं । भजनी नगरपालिकाले वास्ता गरेन,’ कांग्रेसका नगर सभापति टेकराज न्यौपानेले भने, ‘आन्दोलनमा जानुको विकल्प रहेन । बन्द हडतालबाट सास्ती हुन्छ भनेर विरोधका कार्यक्रमको स्वरूप फेर्‍यौं । फेरि पनि सुनुवाइ नभए अन्य यस्तै विरोधका कार्यक्रम गर्छौं ।’

Esewa Pasal

प्रकाशित : भाद्र १८, २०७५ ०९:४७
प्रतिक्रिया
पठाउनुहोस्
ADVERTISEMENT

तरकारीले बजार पाएन

कान्तिपुर संवाददाता

सल्यान — बन्गाडकुपिण्डे नगरपालिका–४, गर्चेका किसानले उत्पादन गरेको तरकारीले बजार पाउन सकेको छैन । वर्षाका कारण यातायातका साधन नचल्दा तरकारी बिक्रि हुन नसकेको हो । बारीमै तरकारी कुहिन थालेपछि किसान चिन्तित भएका छन् ।

सल्यान गर्चेकी एक महिला तरकारी गोड्मेल गर्दै । तस्बिर : विप्लव

हिमालय ताजा तरकारी तथा बीउ उत्पादन समूह, सिस्ने बराखेत, बन्गाड कृषि सहकारी संस्थामा आबद्ध झन्डै एक सय घरधुरीको तरकारी बिक्री हुन सकेको छैन । स्थानीय देवबहादुर रानाले चार वर्षदेखि व्यावसायिक तरकारी खेती गरिरहेका छन् ।

बर्सेनि दुई लाखभन्दा बढी रकम कमाउँदै आएका उनले यस वर्ष तरकारी बिक्री नहुँदा समस्या भएको बताए । चार रोपनीमा टमाटर, काउली, बन्दा, सिमी, बोडी, काँक्रो लगाउँदै आएका उनले यस वर्ष तरकारी बिक्री नहुँदा आम्दानी आधा घटेको बताए ।

सुरुमा राम्रो आम्दानी भए पनि तरकारी खरिद गर्न व्यापारी गाउँमा आउन छोडेपछि समस्या भएको किसानको भनाइ छ । तरकारी राम्रो फले पनि सल्लीबजारमा धेरै तरकारी खपत नहुने भएकाले समस्या भएको किसानले गुनासो गरे ।

स्थानीय किसान रमेश बुढाले गाउँबाट केही स्थानीयले व्यापारीले खरिद गर्न खोजेपनि भाउ कम भनेकाले बिक्रीमा समस्या भएको बताए । तरकारी बिक्रीका लागि संकलन केन्द्र स्थापना गरिएको भए पनि व्यापारी नआउँदा र राम्रो भाउ नपाउँदा समस्या भएको स्थानीय विजय नेपालीको भनाइ छ ।

उनले उत्पादन धेरै हुने भए पनि बजारीकरणको राम्रो व्यवस्था नहुँदा समस्या भएको बताए । ‘बाहिर लैजान यातायातको समस्या छ,’ उनले भने, ‘यहाँ आउने स्थानीय व्यापारीले राम्रो भाउ दिंदैनन् ।’ नजिकैका व्यापारिक केन्द्रहरू सुर्खेत, नेपालगन्ज र रुकुमको चौरजहारीसम्म पुर्‍याउन सके तरकारीले राम्रो भाउ पाउने उनको भनाइ छ ।

प्रकाशित : भाद्र १८, २०७५ ०९:४६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT