खाल्डाखुल्डी पुरेर विरोध
टीकापुर — यहाँका कांग्रेस कार्यकर्ताले विरोधको नयाँ शैली अपनाएका छन् । नारा जुलुस, र्याली बन्द होइन, विकासका काम गरेर विरोध जनाएका हुन् ।
कांग्रेस कार्यकर्ता आफैंले रकम संकलन गरे । भजनी–सुखड सडक खण्डमा रहेका खाल्डाखुल्डी पुरे । ‘नगरपालिकाले लाज मानोस् । सडकमा भएको खाल्डाखुल्डी पुरोस्,’ स्थानीय कांग्रेस कार्यकर्ता जयबहादुर बुढाले भने । भजनी नगरपालिकालाई राजमार्गसित जोड्ने सडक हिँड्नै नहुने भएपछि खाल्डाखुल्डी पुरेर विरोध जनाइएको बुढाले बताए ।
उनले भने, ‘सडकका कारण सवारी आवागमनमा समस्या भएको छ । भजनी अस्पतालबाट रिफर भएका बिरामी धनगढी र नेपालगन्ज लान पनि अप्ठ्यारो छ ।’ सडक मर्मत गरिनुपर्ने माग राख्दै विरोधस्वरूप गरिएको आन्दोलनमा २४ घनमिटर ग्राभेलबाट खाल्डा पुरिएको थियो ।
‘सडक मर्मतका लागि पटकपटक नगरपालिकामा डेलिकेसन गयाैं । भजनी नगरपालिकाले वास्ता गरेन,’ कांग्रेसका नगर सभापति टेकराज न्यौपानेले भने, ‘आन्दोलनमा जानुको विकल्प रहेन । बन्द हडतालबाट सास्ती हुन्छ भनेर विरोधका कार्यक्रमको स्वरूप फेर्यौं । फेरि पनि सुनुवाइ नभए अन्य यस्तै विरोधका कार्यक्रम गर्छौं ।’
प्रकाशित : भाद्र १८, २०७५ ०९:४७