अखाद्य वस्तु छ्यापछयाप्ती

मोहन बुढाऐर

धनगढी — प्रमुख चाड दसैं–तिहार सुरु हुने बेला सुदूरपश्चिमका स्थानीय बजारमा मिसावटयुक्त र म्याद गुज्रिएका खाद्य वस्तुको बिक्री बढेको छ । सरोकारवाला निकायले बजार अनुगमन र नियन्त्रणमा ध्यान नदिँदा यस्ता सामानको बिक्री बढेको हो ।

डडेलधुरा जोगबुढा बजारको एक पसलमा म्याद गुज्रेको चिसो पेय पदार्थ । तस्बिर : मोहन

राष्ट्रिय उपभोक्ता मञ्च कैलालीका अध्यक्ष हरि रेग्मीले प्रदेश ७ को प्रमुख व्यापारिक सहर धनगढीमा म्याद गुज्रेका सामान बिक्रीले उपभोक्ता ठगिन थालेको बताए । खाद्यान्नमा मिसावट, नापतौलमा बदमासी र म्याद गुज्रेका वस्तुको बिक्री बढेको उनले जानकारी दिए । जिल्ला प्रशासनको नेतृत्वमा सरोकारवाला सबैको संयुक्त बजार अनुगमन समिति भए पनि नियन्त्रणको प्रयास नगरेको देखिएको छ ।


‘नियमनकारी निकायले नै प्रभावकारी काम गरेनन्,’ रेग्मीले भने, ‘उपभोक्ताहरूले अखाद्य वस्तु खानुपर्ने बाध्यता छ । झन् चाडबाड सुरु भएका बेला बजारमा लुट चलिरहेको छ । नियन्त्रण गर्ने निकाय किन मौन ?’

Yamaha


प्रदेश ७ को खाद्यवस्तु नियमनकारी निकाय खाद्य प्रविधि तथा गुण नियन्त्रण, वाणिज्य र नापतौल कार्यालयको प्रभावकारिता नै नदेखिएको रेग्मीले बताए । ‘विषयगत कार्यालयका वार्षिक क्यालेन्डरअनुसार अनुगमन भए होलान्,’ उनले भने, ‘तर ती अनुगमन उल्टै ब्यापारीलाई तर्साउने, कारबाहीको डन्डा देखाएर पैसा उठाउनेमा सीमित भएका छन् ।’


धनगढीको बजारमा परेको असर सिंगो ७ नम्बर प्रदेशमा पर्ने स्थानीय उपभोक्ता रामचन्द्र भट्टले बताए । सहरबजारका सचेत उपभोक्ताहरूले अखाद्यवस्तु खाइरहेको अवस्थामा यहाँबाट आपूर्ति हुने पहाडी जिल्लामा पनि गुणस्तरहीन र मिसावटयुक्त वस्तु छ्यापछ्याप्ती छन् । ‘पहाडी क्षेत्रमा वैकल्पिक बजार नहुने भएकाले उपभोक्ताहरू मनपरी अखाद्य वस्तुबाट ठगिएका छन् । धनगढी बजार शुद्ध राख्न सकेमा प्रदेश ७ का सबै बजारमा गुणस्तरीय खाद्यवस्तु पुग्नसक्छ,’ उनले भने ।


भट्टले सदरमुकामभन्दा बाहिरका बजारमा ४० प्रतिशत मिसावट र म्याद गुज्रिएका वस्तु भेटिने गरेको बताए । ‘धनगढीको मुख्य बजारका भित्री पसलहरूमा अनुगमन गर्नुस्,’ अर्का स्थानीय सुरेन्द्र विष्टले भने, ‘पसलका आधा समान गुणस्तरहीन भेटिन्छन् ।’ दाल, तेल र घिउमा अत्यधिक मिसावट हुने गरेको छ । म्याद गुज्रेका चिसो पेय पदार्थ र बिस्कुट तथा चाउचाउ जस्ता ड्राइफुडको बिक्री हुने गरेको छ ।


क्षेत्रीय खाद्य प्रविधि तथा गुण नियन्त्रण कार्यालय धनगढीका प्रमुख सुमन धितालले बजार अनुगमन भइरहेको दाबी गरे । उनका अनुसार आर्थिक वर्ष ०७४/०७५ मा प्रदेश ७ को पहाडी र तराईका जिल्लामा १ सय ५ पटक बजार अनुगमन भएको छ । जसमा २ सय ४० खाद्य नमुनाको गुणस्तर जाँच गर्न केन्द्रीय प्रयोगशालामा पठाइएको छ ।


उनका अनुसार गत आर्थिक वर्षमा १४ वटा मुद्दा जिल्ला प्रशासन कार्यालयमा दर्ता भएका छन् । कैलालीमा ९, कञ्चनपुरमा ३, र बझाङ जिल्ला प्रशासनमा २ वटा मुद्दा दर्ता भएका हुन् । कैलालीको धनगढी र कञ्चनपुरका स्थानीय बजारमा धेरै पटक अनुगमन भएको दाबी उनको छ ।


उनी साधन–स्रोत अभावले गाउँघरका पसलहरूको अनुगमन गर्न नभ्याएको बताउँछन् । चाडबाडको समयमा भारतबाट तयारी मिठाईको आयात बढ्ने गरेको छ । तयारी मिठाई भन्सारबाट आयत गर्न पाइँदैन ।

प्रकाशित : भाद्र २६, २०७५ १०:१३
ADVERTISEMENT
प्रतिक्रिया
पठाउनुहोस्
ADVERTISEMENT

तालिम प्राप्त कुकुर खोरमै

किशोरी हत्या प्रकरण
मोहन बुढाऐर

धनगढी — जघन्य अपराधका घटनाको अनुसन्धानमा प्रहरीले तालिम प्राप्त कुकुरको प्रयोग गर्छ । कञ्चनपुरकी १३ वर्षीया निर्मला पन्तको बलात्कारपछि भएको हत्या घटनामा भने कुकुरको प्रयोग नगरेको देखिएको छ ।

प्रदेश ७ को धनगढीस्थित कुकुर शाखामा रहेका तालिम प्राप्त कुकुर । तस्बिर : मोहन

प्रदेश ७ मा तालिम प्राप्त कुकुर छन् । नेपाल प्रहरीको धनगढीस्थित कुकुर शाखाका प्रमुख सई मदन गुरुङकाअनुसार टीकापुरको एउटाबाहेक अन्य कुनै पनि आपराधिक घटनामा कुकुर परिचालन गरिएको छैन् ।

गत फागुनमा टीकापुरका करन थापाको हत्या घटनामा मात्रै अपराधी पत्ता लगाउन कुकुर प्रयोग गरिएको थियो । ‘घटना भएको १४ घन्टाभित्र कुकुर घटनास्थल पुर्‍याएमा अपराधी समात्न सकिन्छ,’ सई गुरुङले भने, ‘अपराधीले घटनास्थलमा छोड्ने गन्ध वा प्रमाण उडिसकेको वा बगिसकेको अवस्था हुनु हँुदैन ।’ आठ महिनाअघि प्रदेश ७ को अस्थायी राजधानी धनगढीमा प्रहरीको कुकुर शाखा स्थापना भएको हो । भीभीआईपी सुरक्षा र अपराध अनुसन्धानमा प्रहरीलाई सहयोग पुर्‍याउने उद्देश्यले प्रदेश राजधानीमा कुकुर शाखा स्थापना गरिएको थियो ।

हाल कुकुर शाखामा खोजतलासमा सघाउन तालिम प्राप्त ४ कुकुर छन् । तीमध्ये अपराधी पत्ता लगाउने एउटा अनुभवी ट्रयाकर कुकुर पनि छ । ‘ट्रयाकर कुकुरमा अपराध भएको स्थानबाट गन्ध पहिचान गरी अपराधी पत्ता लगाउने क्षमता हुन्छ,’ सई गुरुङ भन्छन्, ‘कुकुरले प्रहरीलाई अपराधी नजिक पुर्‍याउन सघाउछ ।’

निर्मला हत्या काण्डमा भने कुकुर परिचालन गर्न सकिने अवस्था नरहेको सइ गुरुङले बताए । उनका अनुसार निर्मलाको शव फेला परेको उखुवारीमा रातभरी पानी परेकाले अपराधीले सबुत प्रमाणका रूपमा छोड्ने गन्ध बगिसकेको अवस्थामा कुकुरको प्रयोगबाट पनि उपलब्धि हुँदैन्थ्यो । तर, नभिजेको सुख्खा कापी किताब फाल्ने व्यक्तिको पहिचान गर्न कुकुरको प्रयोग गर्न सकिने अवस्था रहेको उनको भनाइ छ । ‘उक्त घटनामा कुकुर नै माग भएन,’ उनले भने।

प्रकाशित : भाद्र २४, २०७५ १०:१८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT