सुक्खा पहिरोले ५३ परिवार विस्थापित

करिब एक हजार मिटर माथिबाट गएको पहिरोले विस्थापित भएकाहरू गोठमा बसिरहेका छन्
मेनुका ढुंगाना

अछाम — सुख्खा पहिरोले मेल्लेख–७ नन्देगडाको रिठा गाउँमा ५३ घर जोखिममा परेका छन् । केही स्थानीय पहिरोको त्रासले छिमेकी गाउँमा सरेका छन् ।

रिठा गाउँभन्दा करिब एक हजार मिटर माथिबाट पहिरो खसिरहेको छ । तल्लो भेगमा बस्ने ५३ परिवार घर छाडेर छिमेकी गाउँ सरेका छन् । उनीहरूलाई कति बेला के हुने हो भन्ने चिन्ताले सताउन थालेको छ । ‘घरमाथिबाट पहिरो जान थालेपछि केही परिवार छिपेखोलाको छेउमा रहेका गोठमा सरेका छन् भने केही पल्लो टोलमा शरणार्थी भएका छन्,’ स्थानीय टंक साउदले भने, ‘निरन्तर पहिरो झरिरहेकाले हामी निकै त्रासमा छौं ।’


शनिबार बिहानदेखि पहिरो खस्न थालेको हो । हालसम्म मानवीय क्षति भने नभएको स्थानीय द्रौपदी साउदले बताइन् । उनले भनिन्, ‘रातिको समयमा पहिरो गएमा मानवीय क्षति हुने डर थियो । बिहानबाट पहिरो खसेकाले स्थानीय सुरक्षित स्थानमा सरे ।’

Yamaha


अर्का स्थानीय धनवीरे बुढाका अनुसार यसअघि त्यहाँ पहिरोले पुर्दा एकै घरका ३ जनाको मृत्यु भएको थियो । धेरै परिवार विस्थापित भएका थिए । पहिरोसँगै ठूला ढुंगासमेत खसिरहेकाले माथिल्लो भागको बस्ती अति नै जोखिममा हुँदा नबस्न सल्लाह दिएको वडा ७ का वडाअध्यक्ष नरबहादुर साउदले बताए ।


‘जमिन भासिने क्रम नरोकिएकाले बस्तीमा जति बेला पनि ठूलो क्षति हुनसक्ने अवस्था रहेकाले वैकल्पिक व्यवस्था गर्न आग्रह गरेका छौं,’ उनले भने, ‘गाउँपालिकाले विपद् व्यवस्थापनका लागि ३० लाख छुट्याएको छ ।


अहिले नै स्थानीय तहबाट जोखिम बस्तीलाई केही सहयोग भने उपलब्ध गरिएको छैन । कार्यपालिकाको बैठक बसेर राहत दिने निर्णय हुन्छ ।’


जिल्लाका अन्य ठाउँमा बिनामापदण्ड सडक खन्दा पहिरोको घटना भए पनि रिठागाउँमा भने सडकले छोएको छैन । जंगल भए पनि सुक्खा पहिरो गएको छ ।


जिल्ला प्रशासन र प्रहरी लगायतका निकायले शनिबार उक्त क्षेत्रको अनुगमन गरेका थिए । आइतबार नेपाल रेडक्रस सोसाइटीले पहिरो पीडित २० परिवारलाई त्रिपाल वितरण गरेको छ ।

प्रकाशित : भाद्र २६, २०७५ १०:१४
ADVERTISEMENT
ADVERTISEMENT
प्रतिक्रिया
पठाउनुहोस्

अखाद्य वस्तु छ्यापछयाप्ती

मोहन बुढाऐर

धनगढी — प्रमुख चाड दसैं–तिहार सुरु हुने बेला सुदूरपश्चिमका स्थानीय बजारमा मिसावटयुक्त र म्याद गुज्रिएका खाद्य वस्तुको बिक्री बढेको छ । सरोकारवाला निकायले बजार अनुगमन र नियन्त्रणमा ध्यान नदिँदा यस्ता सामानको बिक्री बढेको हो ।

डडेलधुरा जोगबुढा बजारको एक पसलमा म्याद गुज्रेको चिसो पेय पदार्थ । तस्बिर : मोहन

राष्ट्रिय उपभोक्ता मञ्च कैलालीका अध्यक्ष हरि रेग्मीले प्रदेश ७ को प्रमुख व्यापारिक सहर धनगढीमा म्याद गुज्रेका सामान बिक्रीले उपभोक्ता ठगिन थालेको बताए । खाद्यान्नमा मिसावट, नापतौलमा बदमासी र म्याद गुज्रेका वस्तुको बिक्री बढेको उनले जानकारी दिए । जिल्ला प्रशासनको नेतृत्वमा सरोकारवाला सबैको संयुक्त बजार अनुगमन समिति भए पनि नियन्त्रणको प्रयास नगरेको देखिएको छ ।


‘नियमनकारी निकायले नै प्रभावकारी काम गरेनन्,’ रेग्मीले भने, ‘उपभोक्ताहरूले अखाद्य वस्तु खानुपर्ने बाध्यता छ । झन् चाडबाड सुरु भएका बेला बजारमा लुट चलिरहेको छ । नियन्त्रण गर्ने निकाय किन मौन ?’


प्रदेश ७ को खाद्यवस्तु नियमनकारी निकाय खाद्य प्रविधि तथा गुण नियन्त्रण, वाणिज्य र नापतौल कार्यालयको प्रभावकारिता नै नदेखिएको रेग्मीले बताए । ‘विषयगत कार्यालयका वार्षिक क्यालेन्डरअनुसार अनुगमन भए होलान्,’ उनले भने, ‘तर ती अनुगमन उल्टै ब्यापारीलाई तर्साउने, कारबाहीको डन्डा देखाएर पैसा उठाउनेमा सीमित भएका छन् ।’


धनगढीको बजारमा परेको असर सिंगो ७ नम्बर प्रदेशमा पर्ने स्थानीय उपभोक्ता रामचन्द्र भट्टले बताए । सहरबजारका सचेत उपभोक्ताहरूले अखाद्यवस्तु खाइरहेको अवस्थामा यहाँबाट आपूर्ति हुने पहाडी जिल्लामा पनि गुणस्तरहीन र मिसावटयुक्त वस्तु छ्यापछ्याप्ती छन् । ‘पहाडी क्षेत्रमा वैकल्पिक बजार नहुने भएकाले उपभोक्ताहरू मनपरी अखाद्य वस्तुबाट ठगिएका छन् । धनगढी बजार शुद्ध राख्न सकेमा प्रदेश ७ का सबै बजारमा गुणस्तरीय खाद्यवस्तु पुग्नसक्छ,’ उनले भने ।


भट्टले सदरमुकामभन्दा बाहिरका बजारमा ४० प्रतिशत मिसावट र म्याद गुज्रिएका वस्तु भेटिने गरेको बताए । ‘धनगढीको मुख्य बजारका भित्री पसलहरूमा अनुगमन गर्नुस्,’ अर्का स्थानीय सुरेन्द्र विष्टले भने, ‘पसलका आधा समान गुणस्तरहीन भेटिन्छन् ।’ दाल, तेल र घिउमा अत्यधिक मिसावट हुने गरेको छ । म्याद गुज्रेका चिसो पेय पदार्थ र बिस्कुट तथा चाउचाउ जस्ता ड्राइफुडको बिक्री हुने गरेको छ ।


क्षेत्रीय खाद्य प्रविधि तथा गुण नियन्त्रण कार्यालय धनगढीका प्रमुख सुमन धितालले बजार अनुगमन भइरहेको दाबी गरे । उनका अनुसार आर्थिक वर्ष ०७४/०७५ मा प्रदेश ७ को पहाडी र तराईका जिल्लामा १ सय ५ पटक बजार अनुगमन भएको छ । जसमा २ सय ४० खाद्य नमुनाको गुणस्तर जाँच गर्न केन्द्रीय प्रयोगशालामा पठाइएको छ ।


उनका अनुसार गत आर्थिक वर्षमा १४ वटा मुद्दा जिल्ला प्रशासन कार्यालयमा दर्ता भएका छन् । कैलालीमा ९, कञ्चनपुरमा ३, र बझाङ जिल्ला प्रशासनमा २ वटा मुद्दा दर्ता भएका हुन् । कैलालीको धनगढी र कञ्चनपुरका स्थानीय बजारमा धेरै पटक अनुगमन भएको दाबी उनको छ ।


उनी साधन–स्रोत अभावले गाउँघरका पसलहरूको अनुगमन गर्न नभ्याएको बताउँछन् । चाडबाडको समयमा भारतबाट तयारी मिठाईको आयात बढ्ने गरेको छ । तयारी मिठाई भन्सारबाट आयत गर्न पाइँदैन ।

प्रकाशित : भाद्र २६, २०७५ १०:१३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT