डोटीको रुवसकाँडामा बस दुर्घटना, २४ जना घाइते

क्षेत्रिय ट्राफिक कार्यालय अत्तरियाले दिएको जानकारीअनुसार बिहान ३ बजे बस दुर्घटनामा परेको हो । दुर्घटनामा घाइते भएका १ बालक, २ महिलासहित २२ जनाको सेती अञ्चल अस्पताल धनगढी र अत्तरियाको पद्मा अस्पतालमा उपचार भइरहेको छ । गम्भीर घाइते बसचालक पदम पन्त र बसधनी गंगादत्त जाेशीलाई थप उपचारका लागि भारतीय अस्पताल रिफर गरेकाे छ ।

घटनास्थल पुगेका ट्राफिक प्रहरी सहायक निरीक्षक लोकबहादुर पालका अनुसार सडकबाट २५/३० मिटर तल भीरमा ठूलो रुखमा बस अड्किएको छ । ‘बस रुखमा अड्किदा यात्रुको ज्यान जोगिएको देखियो,’ उनले भने, ‘नत्र धेरै यात्रुको घटनास्थलमै ज्यान जान सक्थ्यो ।’ बस रुखमा अड्किदा यात्रु भुइमा खसेर बाँचेको उनले बताए ।

यात्रुहरुलाई उदृत गर्दै असई पालले चालकको लापरवाहीले बस दुर्घटनामा परेको बताए । दुर्घटनाको एक घण्टाभित्र प्रहरी र उद्धारकर्मी घटनास्थल पुगिसकेका थिए । समयमै उद्धार गरिएकोले घटनामा ज्यान जोगाउन सकिएको पालले बताए ।