अस्पतालमा बिचौलियाको बिगबिगी
धनगढी — सुदूरपश्चिम प्रदेशको एक मात्रै ठूलो र सुविधायुक्त सरकारी सेती अञ्चल अस्पताल भित्र बिरामी बिचौलियाको फन्दामा पर्ने गरेका छन् । सस्तो र राम्रो उपचार सेवा लिन अस्पताल भर्ना हुन आउने बिरामी बिचौलियाको फन्दामा परेर नजिकका निजी अस्पतालमा ठगिने गरेको गुनासो सेवाग्राहीको छ ।
गत भदौमा डडेल्धुरा जोगबुढा–६ तातोपानी घर भएका पुस्कर नाथले अस्पताल भित्रका बिचौलियाको कारण आफू एक निजी अस्पतालमा ठगिनुपरेको पीडा सेती अञ्चल अस्पतालका मेडिकल सुपरिटेन्डेन्टलाई निवेदनै दिएर घर फर्केका थिए ।
उनले आफ्नो निवेदनमा सेती अस्पतालमा एनआईसीयू हँुदाहुँदै मेरी नवजात छोरीलाई नजिकको एक निजी अस्पतालमा किन रिफर गर्यो ? नवजात छोरीलाइ रिफर गर्नु थियो भने पनि सेती अस्पतालभन्दा ठूलो र राम्रो अस्पतालमा किन गरिएन ?’ पत्रमा उल्लेख गरेका छन् । नाथले निवेदनमा रिफर गरिएको निजी अस्पतालले छोरीको उपचार शुल्कको नाममा आफूलाई ठगेको र छोरीलाई बचाउन पनि नसकेको आरोप लगाएका छन् ।
‘एउटा दुर्गम टाढाको गाउँबाट श्रीमतीलाई धनगढी ल्याउने मेरो आर्थिक हैसियत थिएन,’ नाथले निवेदनमा भनेका छन्, ‘तर पनि श्रीमती र उनको गर्भमा रहेको शिशुको ज्यान जोगिएला भन्ने आशा बोकेर प्रदेशकै ठूलो र सुविधा सम्पन्न सेती अञ्चल अस्पतालमा ऋण सापटी लिएर ल्याएको थिएँ । यहाँबाट आखाँभरि आँसु र मुटुभरि पीडा बोकेर म घर फर्कनुपर्यो ।’
डडेल्धुराको अति विकट दुर्गम कुनाको बस्ती तातोपानीमा अझै पनि गर्भवती अवस्थामा महिलाले अस्पतालको सेवा पाउन सकेका छैनन् । महिलाहरू गाउँघरमै सुत्केरी हुन्छन् । यो परिवेशका नाथले अस्पतालभित्रका चिकित्सक र कर्मचारीको फन्दामा परेर आफ्नी २४ वर्षीया श्रीमती राधा र नवजात शिशुको मृत्यु भएपछि टाउकोमा बाँध्ने कफन किन्ने पैसासमेत नभएको पीडासहित घर फर्कनुपरेको निवेदनमा उल्लेख गरेका छन् ।
उक्त घटनाका सम्बन्धमा सेती अञ्चल अस्पतालका मेडिकल सुपरिटेन्डेन्ट डा. हेमराज पाण्डेयले पीडितले दिएको निवेदन माथि छानबिन गर्दा यथार्थ फरक भएको बताए । उनका अनुसार भदौ १६ गते भर्ना भएकी नाथकी श्रीमती राधिकाको ‘डेलिभरी केस’ लाई नेपालगन्ज वा अन्य कुनै ठूलो अस्पताल लगी सुरुमै रेफर गरेको बताए ।
‘नाथले आर्थिक अवस्थाका कारण अन्त कतै लैजान नसक्ने जिद्धी गरेपछि उनकी श्रीमतीलाई भर्ना गरिएको हो,’ डा. पन्तले भने, ‘अप्रेसनपछि श्रीमतीको स्वास्थ्य अवस्था बिग्रियो र नवजात शिशु पनि स्वस्थ जन्मेन ।’ उनले अस्पतालभित्र बच्चालाई कृत्रिम श्वासप्रश्वास दिने भेन्टिलेटर नभएकाले रिफर गरेको बताए । दुर्भाग्य यता सेतीमा पनि उनकी श्रीमतीलाई बचाउन नसकिएको डा. पन्तले बताए ।
सुदूरपश्चिम प्रदेशको रिफर सेन्टर सेती अञ्चल अस्पतालमा बिरामीले भोग्नुपरेको पीडा यो एउटा प्रतिनिधि घटना मात्रै हो । स्रोतका अनुसार सेती अञ्चल अस्पतालको पर्चा काटेर बिरामीलाई बेड भर्ना गर्ने बेला निजी अस्पतालमा पुर्याइरहेका दृश्य दिनहुँ देख्न पाइन्छ । दिल्लीका बसपार्कको जस्तो यात्रुलाई अस्पतालको गेटबाटै तानिरहेका हुन्छन् । अस्पतालभित्रकै स्टाप नर्स, कर्मचारी र ओजीटी गर्न आउनेहरू पनि निजी अस्पताल, क्लिनिक र मेडिकल पसलका दलाल छन् ।
मेडिकल सुपरिटेन्डेन्ट हेमराज पाण्डेयले अस्पतालभित्र जानिने र थाहा पाउने गरी कसैबाट बिचौलियाको काम नभएको दाबी गरे । ‘आउनुहोस्, अनुगमन गर्नुहोस् । कतै गल्ती वा कमजोरी छ भने सच्याउने छौं र बिचौलिया फेला परे ‘वन द स्पट’ कारबाही गर्ने छौं’ डा. पाण्डेयले भने, ‘यहाँका चिकित्सकहरूले आफ्नो ड्युटीको समय बाहेक साँझ बिहान अन्यन्त्र क्लिनिक र अस्पतालमा काम गर्न पाउँछन् । त्यसलाई रोक्न सकिंदैन ।’
लामो समय सेती अस्पतालमा विशेषज्ञ सेवा दिएका डा. गणेशबहादुर सिंहले अस्पतालभित्रको प्रशासनिक तथा प्राविधिक व्यवस्थापनमा देखिएको कमीकमजोरीको फाइदा बिचौलियाले उठाउने गरेको बताए ।
‘अस्पतालभित्रका चिकित्सक, कर्मचारीको लागनी भएको बाहिरपट्टि क्लिनिक र अस्पताल र औषधि पसल छन्’ डा. सिंहले भने, ‘उनीहरूले क्लिनिक र अस्पताल र औषधि पसल चलाउनुपर्छ । अस्पतालभित्रको कमजोरीहरूको फाइदा उठाएर बिरामीलाई आफ्नो क्लिनिक र अस्पतालमा लैजाने गरेका हुन् ।’
उनका अनुसार अस्पतालभित्र उपकरण छन्, तर बिग्रेका र मर्मत नभएका छन् । चिकित्सक छन्, उपलब्ध हुँदैनन् । यो अवस्थामा बिरामी पर्खन सक्दैनन् । यही कमजोरीको फाइदा त्यहाँका बिचौलिया कर्मचारीले उठाउने गरेका छन् ।
उनी सेती अञ्चल अस्पतालले विश्वसनीय र गुणस्तरीय सेवा दिन ‘फिजिकल फेसलेटी’ र जनशक्तिलाई बढाउनुपर्ने बताउँछन् । उनले सेती अस्पतालमा हाल भएका उपकरणहरू पनि बिग्रेको बताए । ‘बिग्रेका उपकरणको मर्मत गर्दै नयाँ उपकरण ल्याउनुपर्छ,’ उनले भने, ‘अर्काेतिर भएका जनशक्तिलाई उपयोग गर्न जान्नुपर्छ ।’
उनले डाक्टर भेटिंदैनन्, अस्पताल फोहोर छ, कर्मचारी र नर्सको व्यवहार राम्रो छैन जस्ता सानातिनादेखि ठूला गुनासो सम्बोधन प्रशासनिक सुधारबाट मात्रै गर्न सकिने बताए । ‘जनशक्तिको उपभोग भनेको पनि भएका कर्मचारी, चिकित्सकबाटै बढीभन्दा बढी सेवा अर्थात् काम लिने नीति अवलम्बन गर्नु हो,’ उनले भने, ‘तब मात्रै अस्पतालले विश्वसनीय र गुणस्तरीय सेवा दिन सक्छ ।’
सेवा निवृत्त सुपरिटेन्डेन्ट डा. सिंहका अनुसार प्रदेशको एक मात्र ठूलो सरकारी अस्पतालमा ४ वटा मात्रै आईसीयू छ । ३० वर्षदेखि दरबन्दीअनुसार चिकित्सक छैनन् । स्थानीयस्तरमा बस्ने विशेषज्ञ चिकित्सक नै छैनन् । जिल्ला अस्पतालबाट उपक्षेत्रीय अस्पतालमा बिरामी रेफर हुन्छन् । नामको मात्रै उपक्षेत्रीयमा झन् जिल्ला अस्पताल जतिको पनि सेवा छैन । यो प्रदेशको सेती अस्पताल रेफरल अस्पताल हो । यहाँ सिटी स्क्यान, एमआरआई, टाउको, मुटु, मृगौला रोगका विशेषज्ञहरू छैनन् । कार्डियोलोजिष्ट दरबन्दी भए पनि पदपूर्ति भएको छैन । अन्यन्त्र पठाउनै पर्ने भएको छ । यस कारण सेती अस्पतालले विश्वास गुमाउनुपरेको बताए ।
‘निजी स्तरमा खुलेका अस्पतालहरू पनि ‘कम्प्लिट’ प्याकेजमा कुनै चीजको सुविधा छैन,’ उनले भने, ‘हालसालै खुलेका ४/५ वटा निजी अस्पतालले आईसीयू/ एनआईसीयूलगायत विविध सेवा प्रचार गरेको अवस्था हो । तर सुविधा छैन ।’
उनले कुनै पनि निजी अस्पतालमा २४ घण्टा चिकित्सक नै उपलब्ध नभएको बताए । निजी अस्पताले बिरामीअनुसार चिकिसत्कहरू बाहिरबाट बोलाउने गरेको बताए । निजीमा आउने चिकित्सक पनि सरकारी अस्पतालकै हुने गरेको उनी बताउँछन् । ‘प्राइभेटका संरचनाहरू बढ्दै छन् तर उनले एउटा बिरामीले प्याकेजमा पाउने सेवासहितको सुविधा सम्पन्न अस्पतालमा निजी स्तरबाट लगानी नभएको बताए । नर्सिङ होममा मात्रै लगानी भएको छ । ती पनि सरकारी अस्पतालका डाक्टरबाट चलिरहेका छन् ।
प्रकाशित : कार्तिक १०, २०७५ १०:०७