आन्तरिक विवादले कांग्रेस कमजोर : निधि
धनगढी — कांग्रेस उपसभापति विमलेन्द्र निधिले पार्टीभित्रको आन्तरिक विवादले लोकतन्त्र कमजोर भएको बताएका छन् । ‘कांग्रेसभित्र गुटबन्दीले समस्या भयो’, प्रेस युनियान कैलालीले मंगलबार धनगढीमा गरेको पत्रकार सम्मेलनमा निधिले भने, ‘महासमिति बैठकपछि सबै विवादको अन्त्य हुन्छ ।’
प्रदेशलाई अधिकार नदिनु पनि उपसभापति निधिले गलत नियत भएको बताए । ‘प्रदेशलाई अधिकार दिन नखोज्नु भनेको सबै अधिकार आफैंमा केन्द्रित गरेर संघीयता मास्न खोज्ने नियत हो’ उनले भने, 'प्रदेश र संघ सरकारले आवश्यक कानुन निर्माण नगर्दा स्थानीय तह र प्रदेश सरकारको औचित्यमाथि प्रश्न उठ्न थालेको छ ।’
प्रदेश बलियो हुनुपर्नेमा जोड दिँदै निधिले निजामती कर्मचारी, प्रहरी नियुक्ति, बढुवा र कारवाहीको अधिकार प्रदेशमै हस्तान्तरण भएमात्रै संघीयता संस्थागत र बलियो हुने बताए । ‘प्रदेशमा कार्यरत कर्मचारीहरु प्रदेश सरकारप्रति उत्तरदायी नभएसम्म काम छैन’ उनले भने ‘प्रहरीको सई सम्म सरुवाको अधिकार मात्र प्रदेशलाई दिइन थालेको समाचार सुनिएको छ, त्यो हास्यास्पद हो’ उनले भने ।
कांग्रेस आगामी निर्वाचनमा पहिलो पार्टी हुने दावी गर्दै निधिले अहिलेको सरकारले दुई तिहाईको नाममा मनपरी गरिरहेको आरोप लगाए । पार्टीको सुदूरपश्चिमस्तरीय भेलामा सहभागी हुन निधि धनगढी पुगेका हुन् ।
प्रकाशित : मंसिर ४, २०७५ १६:३०