शक्तिपीठमा भक्तजनको घुइँचो

नवरात्रिको दिनदेखि देवस्थलहरूमा पूजाअर्चना सुरु हुन्छ । बैतडीका देहीमाण्डौस्थित प्रसिद्ध निङ्गलासैनी भगवती मन्दिरमा बलिसहित पूजा चलेको छ । स्थानीय भक्तजनहरू आ–आफ्नो गाउँटोलबाट भाकल पूजा गर्न राँगा, बोका लिएर मन्दिर जाने गर्छन् । मन्दिरमा दिइएको बलिलाई कठै बिचराभन्दा भन्न हुँदैन भन्ने मान्यता छ । त्यसो भन्दा पाप लाग्ने मान्यता रहेको सुर्नया गाउँपालिकाकी पवित्रा भट्ट बताउँछिन् । उनले भनिन्, ‘म सधैं मेलामा जान्छु । तर कहिल्यै कठै भन्ने शब्द बोल्दिनँ, त्यसो भन्दा अनिष्ट हुने विश्वास रहिआएको छ ।’

चैतेदसैंमा यहाँका शक्तिपीठहरूमा पूजाअर्चना गर्दा मनले चाहेको पूरा हुने जनविश्वास रहिआएको छ । यही मान्यताले जिल्लाबाहिर टाढाटाढाबाट पनि भक्तालुहरू आउने गरेको पुजारी देवदत्त भट्ट बताउँछन् । उनले भने, ‘करिब एक हजारभन्दा बढी स्थानीय वर्षको अन्तिम दिन परेको चैतेदसैंको मेला भर्न आएका छन् ।

त्रिपुरासुन्दरी, मेलौली भगवती, डिलासैनी भगवतीलगायतका मन्दिरहरूमा समेत सनिबार बिहानैदेखि पूजाआजामा आएकाहरूको भीड लागेको मेलौलीका लक्ष्मण पार्कीले बताए । उनले भने, ‘मिठोमसिनो खाई, पूजाआजा गरी चैतेदसैं मनाइन्छ । यो पर्व विजयादशमीजस्तै भव्यताका साथ मनाइन्छ ।’ घरबाहिर भएकाहरू पनि यतिबेलै आउने गरेको उनले बताए । यस पर्वका अवसरमा देउडा खेल्ने चलन पनि कायमै छ ।

मेलामा आएका युवायुवतीहरू भागेर बिहे गर्ने प्रचलन रहेको पाटनका धनी बोलीले बताए । उनले भने, ‘यो चलन पछिल्लो समयमा केही घटेको भए पनि कतिपय केटाकेटीले यसै दिन भागेर बिहे गर्छन् ।

मन्दिरहरूमा लाग्ने मेलालाई शान्तपूर्ण रूपमा सम्पन्न गर्नका लागि मेला अवधिभर मेलास्थललाई मदिरा निषेधित क्षेत्र घोषणा गरीएको दशरथचन्द नगरपालिका २ का वडा अध्यक्ष रनबहादुर बोहराले बताए । उनले भने, ‘यो दिन अत्यधिक घुइँचो हुने भएकाले कुनै अप्रिय घटना हुन नपाओस् भनेर मदिरा सेवनमा रोक लगाएका हौं ।’

मेलाहरूलाई मध्यनजर गर्दै सुरक्षा व्यवस्थामा पनि कडाइ गरिएको प्रहरीले जनाएको छ । सबै ठाउँमा आवश्यक प्रहरी परिचालन गरिएको जिल्ला प्रहरी कार्यालयका प्रहरी प्रवक्ता प्रहरी निरीक्षक दीपक पातलीले बताएका छन् ।

–तृप्ति शाही (प्रशिक्षार्थी)