असिनाले तरकारी नष्ट

घरपरिवार पाल्ने एक मात्र माध्यम तरकारी खेती भएको बताउदै कृष्णदत्तले भने, ‘असिनाले सबै बाली नष्ट गरिदियो’ उनले भने ‘मिहिनेत गरी फलाएको बन्दा, प्याज, सागलगायत तरकारी बाली पनि सखाप भएको छ ।’ आइतबार डेढ घण्टा लगातार परेको असिनापानीले पाक्नै लागेको गहुँबाली त झनै केही नरहनेगरी सखाप भएको दशरथचन्द नगरपालिका १ कै वीरबहादुर टेरले बताए ।

तरकारीका बेर्नाहरू पनि पूर्णरुपमा नष्ट भएका अर्का किसान देवदत्त भट्टले बताए । राम्रो फस्टाएको हिउँदे फलफूलका बेर्ना सबै काम नलाग्ने भएको उनी बताउँछन् । व्यवसायिक रुपमा कृर्षि गरेर गुजारा चलाउने किसानहरूलाई असिनापानीले बाली सखाप भएपछि के गरौ के भन्ने भइरहेको उनले बताए ।

गुरुखोलाका १८ निजी नर्सरी किसानहरूले राखेको बेर्ना पनि असिनाले नष्ट गरेको भट्ट बताउँछन् । यस्तै पाटन नगरपालिकाका विभिन्न स्थानमा पनि असिनाले उत्तिकै क्षति पुर्‍याएको स्थानीय लोकेन्द्रप्रसाद पन्तले बताए । वडा नम्बर ५ को वसन्तपुरमा सुन्तलाका फुलहरू नष्ट भएका स्थानीयले बताए । भर्खर दाना लाग्न लागेका सुन्तला पूर्ण रुपमा नष्ट भएका वडा अध्यक्ष फुनीसिंह बोहराले बताए ।

दशरथचन्द नगरपालिका १ मा ६० लाख बराबरका फलफूलका बिरुवा नष्ट भएका छन् । सुख्खा फलफूल विकास केन्द्र सतबाँझले संकलन गरेको प्रारम्भिक तथ्यांकअनुसार अनुमानित ६० लाख बराबरको बोटबिरुवा नष्ट भएका हुन् ।

बोटविरुवाका बेर्ना पूर्ण रुपमा नष्ट भएका सुख्खा फलफूल विकास केन्द्र सतबाँझका निमित्त प्रमुख चन्द्रबहादुर ठगुन्नाले बताए । सुख्खा फलफूल विकास केन्द्रमा पनि करिब ३ लाख ६० हजार बराबरका फलफुलका बिरुवा नष्ट भएका उनले बताए । यस्तै २ लाख जतिको बन्दा गोबी नष्ट भएको उनको भनाई छ । उनले भने, ‘निजी नर्सरीमा राखेका बिरुवा मध्ये कम्तीमा एकजनाको ३ लाखको बराबरको क्षति भएको तथ्यांक छ ।

वर्षाले खेतमै थन्कियो गहुँ

लगातारको वर्षाले गहुँ खेती काट्न नपाएको किसानहरूले बताएका छन् । विहान घाम लागे पनि एक सातादेखि हरेक दिन वर्षा हुने गरेकोले पाकेको गहुँ खेतमै थन्किएको डिलाशैनीकी धाना जोशीले बताईन् । उनले भनिन्, ‘वर्षभरिको मिहिनेले फलाएर पाकेको गहुँ भित्र्याउनै मुस्किल भइसक्यो ।’ यहाँका डिलाशैनी, सिगास, दोगडाकेदारलगायतका ठाउँमा यतिबेला गहुँ काट्ने समय हो ।