स्थानीय तहमा सरकारी साधनको दुरुपयोग

अछामका १० स्थानीय तहका ९१ वडामध्ये ८५ वडाध्यक्षले सरकारी मोटरसाइकलको प्रयोग गर्छन्
मेनुका ढुंगाना

अछाम — अछाममा स्थानीय तहका जनप्रतिनिधिले सरकारी सवारी साधनको अत्यधिक दुरुपयोग गरिरहेका छन् । १० स्थानीय तह रहेको अछाममा ९१ वडा छन् । यी वडा मध्ये ढकारी गाउँपालिकामा ४ र मेल्लेख गाउँपालिकाका २ जना वडा अध्यक्ष बाहेक अन्य ८५ जना वडा अध्यक्षले सरकारी मोटरसाइकल बुझेका छन् ।

अछामका विभिन्न मेला महोत्सवमा भेटिएका वडाअध्यक्षका मोटरसाइकलहरू । तस्बिर : मेनुका

ती मोटरसाइकलहरू नातागोताले प्रयोग गर्दै आएका छन् । कतिपय लाइसेन्स नभएर पनि निर्वाध कुदाइरहेका छन् ।

मंगलसैन नगरपालिकाका १४ वटा वडा मध्ये वडा नम्बर १२ का अध्यक्ष प्रेम रावलको मात्रै सवारी चालक इजाजत पत्र (लाइसेन्स) छ । लाइसेन्स नभएपनि अन्य ४ जना वडा अध्यक्ष मोटरसाइकल आफैं चलाउँछन् । ९ जना अध्यक्षले सरकारी सवारी साधन छोरा, भतिजा, आफन्तलाई चलाउन दिएका छन् ।

सडक नपुगेको वडा नम्बर १३ बस्तीका अध्यक्ष प्रेम थापाले पनि मोटरसाइकल लिएका छन् । नगरपालिकाबाट पाएको मोटरसाइकल कसले चलाउँछ र कहाँ छ उनलाई थाहा छैन । 'सडक नपुगे पनि बाइक लिएकोे छु । आफूलाई चलाउन आउदैन । गाउँका जान्नेहरूले चलाइरहेका छन्' थापाले भने, 'जहाँसम्म सडक पुगेको छ त्यहाँसम्म बाइकमा जाने गरेको छु ।'

११ नम्बर वडाका अध्यक्ष डबल भण्डारी, १४ का अध्यक्ष तेजबहादुर भण्डारी, ३ का अध्यक्ष पदमसिंह भाट, ४ का अध्यक्ष पदम धामी, २ का अध्यक्ष मानबहादुर बोगटी, १ का अध्यक्ष गोपाल थापा ५ का अध्यक्ष हरीप्रसाद ढुंगाना र ७ का अध्यक्ष सिद्धराज ढुंगानाले लिएका सवारीहरू पनि उनीहरूका छोरा, भतिजा र नातेदारहरूको हातमा छन् ।

सवारी लिएका अध्यक्षहरूले मासिक १५ लिटर पेट्रोल पाउने गरेका छन् । 'सरकारी मोटरसाइकलबाट पेट्रोल निकालेर नीजिमा हाल्नेहरू पनि भेटिएका छन् । जनप्रतिनिधिलाई निगरानी गर्ने निकाय कोहि छैन । मनपरी ढंगले सरकारी सम्पत्तिको दुरुपयोग भएको छ' एक स्थानीयले भने । साँफेबगर नगरपालिकाका १४ वडा मध्ये वडा नम्बर ३ का अध्यक्ष कृष्णबहादुर बुढा, ७ का अध्यक्ष मिठुसिंह भाट, १२ का अध्यक्ष प्रेमबहादुर राना र १३ का अध्यक्ष सागरसिंह सोनार आफैं चलाउँछन् ।

वडा नम्बर १ का अध्यक्ष अम्मरबहादुर शाह, २ का अध्यक्ष कालुसिंह कुवँर, ४ का अध्यक्ष बालगिरी कुवँर, ५ का अध्यक्ष उजिर साउँद, ६ का अध्यक्ष प्रेमराज शर्मा, ८ का अध्यक्ष टेकबहादुर कुँवर, ९ का अध्यक्ष धुर्ब थापा, १० का अध्यक्ष लालबहादुर खडाको सरकारी मोटरसाइकल पनि दुरुपयोग भइरहेको छ । यस्तै ११ का अध्यक्ष गणेशबहादुर खडा, १४ का अध्यक्ष कर्णबहादुर साउँदले लिएको मोटरसाइल छोरा, आफन्त र नातागोताले प्रयोग गरिरहेका छन् ।

पञ्चदेवल विनायक नगरपालिकामा पनि सवारी साधानको दुरुपयोग उस्तै छ । ९ वटा वडा रहेको नगरका सबै अध्यक्षले सरकारी मोटरसाइकल लिएका छन् । वडा नम्बर २ का अध्यक्ष, पदमबहादुर धामी, ३ का अध्यक्ष सुरेन्द्र शाही, ५ का अध्यक्ष कुलबहादुर बुढा, ६ का अध्यक्ष पुर्णबहादुर रावल र ८ का अध्यक्ष ताराप्रसाद खनालले आफैं चलाउछन् ।

४ का अध्यक्ष सज्जन बहादुर शाहीले कर्मचारीलाई चलाउन दिएका छन् भने १ का अध्यक्ष लक्ष्मिकान्त देवकाटाले वडाको मोटरसाइकल छोराको हातमा दिएका छन् । ७ का अध्यक्ष गोविन्द रावलले लिएको मोटरसाइकल पनि छोराले नै चलाएका छन् भने ९ का अध्यक्ष रामबहादुर शाहिले भतिजालाई दिएका छन् ।

मेल्लेख गाउँपालिकाका ८ वटा वडा मध्ये १ का अध्यक्ष तुलेकामी र २ का अध्यक्ष दानबहादुर बुढाले सवारी साधन लिएका छैनन् । अन्य ५ जना अध्यक्ष मध्ये ८ का अध्यक्ष खगेन्द्रबहादुर साउदले मात्रै आफैं प्रयोग गरेका छन् । ३ का अध्यक्ष केशबहादुर शाह , ४ का अध्यक्ष बीरबहादुर साउद , ५ का अध्यक्ष रामबहादुर बोहरा, ६ का अध्यक्ष नरपती रावल र ७ का अध्यक्ष अम्मरबहादुर लुहारले लिएको मोटरसाइकल पनि नातागोताले प्रयोग गरिरहेका छन् ।

'लाइसेन्स भएका अध्यक्षले मात्रै लैजानुस भनेका हौं । तर सबैले लिनुपर्छ भन्नेहरूको जमात बलियो भयो र दिन बाध्य भयौं' मेल्लेख गाउँपालिकाका अध्यक्ष लोकबहादुर बोहराले भने । ढकारी गाउँपालिकाका ८ वडा मध्ये ४ वटा अध्यक्षले मोटरसाइकल लिएका छन् भने ४ अध्यक्षले लिन बाँकी छ । 'लाइसेन्स भएपछि मात्रै सवारी दिनु पर्ने हो । तर कर्मचारीलाई जनप्रतिनिधिको दबाब छ ।'

एक कर्मचारीले भने ,' बिस वर्षसम्म कर्मचारीले शासन चलाए । अब हाम्रो पालो हो भन्दै थर्काउछन् । लिएका बाइकहरू पनि थोत्रा काम नलाग्ने बनाइसके ।' चौरपाटी गाउँपालिकाका ७ र बान्निगढी गाउँपालिकाका ६ वटा वडाअध्यक्षहरूले लिएको बाइकको हालत पनि उस्तै छ । बान्नगढिका एक जना वडाअध्यक्षसँग लाइसेन्स छैन । 'कतिपय अध्यक्षहरूले लिएका बाइकहरू कहा छन् पत्तो छैन । कर्मचारीले चासो राख्दा दबाब आउँछ' एक कर्मचारीले भने ।

कमलबजार नगरपालिकाका १० वटै अध्यक्षहरूले मोटरसाइकल लिएको र लाइसेन्स कसैसँग नभएको नगरप्रमुख ओमप्रकाश बिष्ट बताउँछन् । तुर्माखाँद गाउँपालिका १ का अध्यक्ष थिरबहादुर रावत र २ का अध्यक्ष शुभ जैसीले पनि मोटरसाइकल लिएका छन् । तर यी दुवै वडामा सडक पुगेको छैन । तुर्माखाद गाउपालिकाका ७ वडाका अध्यक्षले लिएका सवारी पनि आफन्तले नै प्रयोग गरिरहेको स्थानीय बताउँछन् ।

यस्तै रामारोशन गाउँपालिकाका ७ वटा वडा मध्ये २ का अध्यक्ष चक्र साउँद , ३ का अध्यक्ष तारा साउँदले आफैं प्रयोग गरिरहेका छन् । अन्य ५ जना अध्यक्षले नातागोताकै हातमा थमाएका छन् ।

प्रकाशित : वैशाख १९, २०७६ ०९:५७
प्रतिक्रिया
पठाउनुहोस्

सूचनाविहीन सूचना अधिकारी

कान्तिपुर संवाददाता

बाजुरा — स्थानीय तहलगायत विभिन्न कार्यालयमा कार्यरत सूचना अधिकारीहरू आफै सूचनाविहीन हुने गरेको देखिएको छ । उनीहरू आफु कार्यरत कार्यालयका योजना र उपलब्धीमासमेत अनभिज्ञ देखिएका छन् । 

शुक्रबार जिल्ला प्रशासन कार्यालयले आयोजना गरेको स्थानीय तहसहित र्सार्वजनिक निकायमा कार्यरत सूचना अधिकारीको बैठक आयोजना गरेको थियो । कार्यक्रममा स्थानीय तहका सूचना अधिकारीले कार्यालयको प्रगति प्रतिवेदन प्रस्तुत गर्न सकेनन् । जिल्लाका ९ वटै स्थानीय तह र सम्पूर्ण सरकारी तथा गैरसरकारी कार्यालयका सूचना अधिकारी सहभागी थिए ।

बडिमालिका नगरपालिका, गौमुल गाउँपालिका र स्वामिकार्तिक खापर गाउँपालिकाका सूचना अधिकारीले कार्यालयबाट भए गरेका केही कामको प्रगति प्रस्तुत गर्न सकेका भए पनि बुढीनन्दा नगरपालिका, बुढीगंगा नगरपालिका र खप्तड छेडेदह गाउ“पालिकाका सूचना अधिकारीले भने कुनै विवरण प्रस्तुत गर्न सकेनन् । उनीहरूले आफूहरू सूचना अधिकारी भएपनि कार्यालयको कामबारे कुनै जानकारी नभएको बताए ।

प्रमुख जिल्ला अधिकारी गंगाप्रसाद न्यौपाने बोलाएको उक्त बैठकमा त्रिवेणी नगरपालिका, जगन्ननाथ गाउ“पालिका र हिमाली गाउँपालिका भने सहभागी नै भएनन् । सहायक प्रमुख जिल्ला अधिकारी खगेन्द्र मल्लले जिल्लाका नगर तथा गाउ“पालिकाको आर्थिक वर्ष०७५ को माघदेखि चैत मसान्तसम्मको प्रगति प्रतिवेदनसहित सूचना अधिकारीलाई उपस्थित हुन पत्राचार गरिएको भएपन ३ वटा स्थानीय तहका सूचना अधिकारी उपस्थित नभएको बताए ।

जिल्ला समन्वय समिति बाुजरामा भने सूचना अधिकारी नै नभएको पाइएको छ । प्रमुख जिल्ला अधिकारी न्यौपानेले तत्काल जिल्ला समन्वय समितिलाई सूचना अधिकारी नियुक्त गर्न पनि निर्देशन दिएका छन् ।

कार्यक्रममा आएका सूचना अधिकारीहरूले प्रमुख प्रशासकीय अधिकृत नभएकाले कार्यालयका कामकाज र प्रगतिको जानकारी नभएको बताएका हुन् ।

– संगीता तिमल्सेना (प्रशिक्षार्थी)

प्रकाशित : वैशाख १९, २०७६ ०९:५२
पूरा पढ्नुहोस्
प्रतिक्रिया
पठाउनुहोस्