लोकसेवा तयारी गराउँदै गाउँपालिका

मेनुका ढुंगाना

अछाम — रामारोशन गाउँपालिकाले लक्षित वर्गका लागि छुट्याएको रकमबाट लोकसेवा आयोगको तयारी कक्षा सञ्चालन गर्न थालेको छ । गाउँपालिकाका फरक क्षमताका एक पुरुष, २ दलित पुरुष, १ जनजाति महिला र अन्य ६ महिला गरी १० जनालाई सदरमुकाम मंगलसैन पठाएर लोकसेवाको तयारी कक्षा लिन लगाएको हो ।

मंगलसैनमा सञ्चालन भइरहेको लोकसेवा तयारी कक्षाका सहभागी । तस्बिर : मेनुका/कान्तिपुर

'गाउँपालिकाले साढे ३ लाखबजेट छुट्याएको छ । तर प्रशिक्षार्थीलाई खान, बस्न, यातायात, स्टेसनरी र प्रशिक्षकको खर्च गरी ४ लाख ८६ हजार खर्च हुने देखिन्छ,' उपाध्यक्ष सरस्वती रावलले भनिन्, 'बैठक गोष्ठी गरी रकम सक्नुभन्दा निजामती कर्मचारी उत्पादन गर्नु उपयुक्त ठान्यौं ।' वडाध्यक्ष र गाउँपालिकाले पढ्न इच्छा देखाएकालाई खोजेर पढाउन लागेको उनले बताइन् ।

'दुर्गम मानिने रामारोशन गाउँपालिकामा हामी निर्वाचित भएर आएको लामो समयसम्म कर्मचारी नहुँदा प्रभावकारी कामै गर्न सकिएन । हामीलाई कर्मचारीको आवश्यकता महसुस भयो,' उपाध्यक्ष रावलले भनिन्, 'कर्मचारी खोज्न मन्त्रालय धाउँदा तपाईंको क्षेत्रका कर्मचारी छन् भने भन्नुस् अहिले पठाइदिन्छौं भन्ने कुरा गरे । खोज्दै जाँदा कोही भेटिएनन् । त्यही बेलादेखि लोकसेवाको तयारी गर्नु भन्ने महसुस भएको हो ।' उनका अनुसार एक सचिवले ७ वटा वडा हेर्नुपर्दा भएको असहज मध्यनजर गरी पढाउन पठाइएको हो । 'अबको ३/४ वर्षपछि यतै पढेका कर्मचारीले सेवा दिन पाउने आस गरेका छौं,' उनले भनिन् ।

'लोकसेवा तयारी गर्नलाई धनगढी, नेपालगन्ज, काठमाडौंमा गएर पढ्न सक्ने अवस्था छैन । तयारी गर्ने सोचेकै बेला गाउँपालिकाका अभिभावक बनेको महसुस भएको छ,' रामारोशनका रेवन्त विकले भने, 'जसरी पनि लोकसेवा पास गर्नुपर्छ गाउँपालिकाको लगानी छ भन्ने महसुस हुन्छ । त्यहीअनुसार तयारी गरिरहेको छु ।' छोरीलाई बाहिर पढाउनु हुँदैन भन्ने मान्यता रहेको दुर्गम गाउँमा गाउँपालिकाले नै पढाउँदा खुसी लागेको अर्की प्रशिक्षार्थी हंशकला न्यौपाने बताउँछिन् । 'जसरी पनि पास हुनुपर्छ । गाउँपालिकाको प्रतिष्ठाको विषय हो भन्ने लागेको छ,' उनले भनिन् ।

३५ चल्ने कक्षामा महिलाहरूले चासो देखाइरहेको प्रशिक्षक एवं कारागार कार्यालय प्रमुख छत्र माझीले बताए । 'पुरुषभन्दा महिलाले मिहिनेत गरेको पाइयो । टाढा जान नसक्ने र अवसर नपाएका महिलाको सक्रियता लोभलाग्दो छ,' उनले भने, 'विवाहित महिलाहरू समयको सदुपयोग गर्नपर्छ भन्ने खालका देखिन्छन् ।'

प्रकाशित : वैशाख २१, २०७६ ०९:४७
प्रतिक्रिया
पठाउनुहोस्

स्थानीय तहमा सरकारी साधनको दुरुपयोग

अछामका १० स्थानीय तहका ९१ वडामध्ये ८५ वडाध्यक्षले सरकारी मोटरसाइकलको प्रयोग गर्छन्
मेनुका ढुंगाना

अछाम — अछाममा स्थानीय तहका जनप्रतिनिधिले सरकारी सवारी साधनको अत्यधिक दुरुपयोग गरिरहेका छन् । १० स्थानीय तह रहेको अछाममा ९१ वडा छन् । यी वडा मध्ये ढकारी गाउँपालिकामा ४ र मेल्लेख गाउँपालिकाका २ जना वडा अध्यक्ष बाहेक अन्य ८५ जना वडा अध्यक्षले सरकारी मोटरसाइकल बुझेका छन् ।

अछामका विभिन्न मेला महोत्सवमा भेटिएका वडाअध्यक्षका मोटरसाइकलहरू । तस्बिर : मेनुका

ती मोटरसाइकलहरू नातागोताले प्रयोग गर्दै आएका छन् । कतिपय लाइसेन्स नभएर पनि निर्वाध कुदाइरहेका छन् ।

मंगलसैन नगरपालिकाका १४ वटा वडा मध्ये वडा नम्बर १२ का अध्यक्ष प्रेम रावलको मात्रै सवारी चालक इजाजत पत्र (लाइसेन्स) छ । लाइसेन्स नभएपनि अन्य ४ जना वडा अध्यक्ष मोटरसाइकल आफैं चलाउँछन् । ९ जना अध्यक्षले सरकारी सवारी साधन छोरा, भतिजा, आफन्तलाई चलाउन दिएका छन् ।

सडक नपुगेको वडा नम्बर १३ बस्तीका अध्यक्ष प्रेम थापाले पनि मोटरसाइकल लिएका छन् । नगरपालिकाबाट पाएको मोटरसाइकल कसले चलाउँछ र कहाँ छ उनलाई थाहा छैन । 'सडक नपुगे पनि बाइक लिएकोे छु । आफूलाई चलाउन आउदैन । गाउँका जान्नेहरूले चलाइरहेका छन्' थापाले भने, 'जहाँसम्म सडक पुगेको छ त्यहाँसम्म बाइकमा जाने गरेको छु ।'

११ नम्बर वडाका अध्यक्ष डबल भण्डारी, १४ का अध्यक्ष तेजबहादुर भण्डारी, ३ का अध्यक्ष पदमसिंह भाट, ४ का अध्यक्ष पदम धामी, २ का अध्यक्ष मानबहादुर बोगटी, १ का अध्यक्ष गोपाल थापा ५ का अध्यक्ष हरीप्रसाद ढुंगाना र ७ का अध्यक्ष सिद्धराज ढुंगानाले लिएका सवारीहरू पनि उनीहरूका छोरा, भतिजा र नातेदारहरूको हातमा छन् ।

सवारी लिएका अध्यक्षहरूले मासिक १५ लिटर पेट्रोल पाउने गरेका छन् । 'सरकारी मोटरसाइकलबाट पेट्रोल निकालेर नीजिमा हाल्नेहरू पनि भेटिएका छन् । जनप्रतिनिधिलाई निगरानी गर्ने निकाय कोहि छैन । मनपरी ढंगले सरकारी सम्पत्तिको दुरुपयोग भएको छ' एक स्थानीयले भने । साँफेबगर नगरपालिकाका १४ वडा मध्ये वडा नम्बर ३ का अध्यक्ष कृष्णबहादुर बुढा, ७ का अध्यक्ष मिठुसिंह भाट, १२ का अध्यक्ष प्रेमबहादुर राना र १३ का अध्यक्ष सागरसिंह सोनार आफैं चलाउँछन् ।

वडा नम्बर १ का अध्यक्ष अम्मरबहादुर शाह, २ का अध्यक्ष कालुसिंह कुवँर, ४ का अध्यक्ष बालगिरी कुवँर, ५ का अध्यक्ष उजिर साउँद, ६ का अध्यक्ष प्रेमराज शर्मा, ८ का अध्यक्ष टेकबहादुर कुँवर, ९ का अध्यक्ष धुर्ब थापा, १० का अध्यक्ष लालबहादुर खडाको सरकारी मोटरसाइकल पनि दुरुपयोग भइरहेको छ । यस्तै ११ का अध्यक्ष गणेशबहादुर खडा, १४ का अध्यक्ष कर्णबहादुर साउँदले लिएको मोटरसाइल छोरा, आफन्त र नातागोताले प्रयोग गरिरहेका छन् ।

पञ्चदेवल विनायक नगरपालिकामा पनि सवारी साधानको दुरुपयोग उस्तै छ । ९ वटा वडा रहेको नगरका सबै अध्यक्षले सरकारी मोटरसाइकल लिएका छन् । वडा नम्बर २ का अध्यक्ष, पदमबहादुर धामी, ३ का अध्यक्ष सुरेन्द्र शाही, ५ का अध्यक्ष कुलबहादुर बुढा, ६ का अध्यक्ष पुर्णबहादुर रावल र ८ का अध्यक्ष ताराप्रसाद खनालले आफैं चलाउछन् ।

४ का अध्यक्ष सज्जन बहादुर शाहीले कर्मचारीलाई चलाउन दिएका छन् भने १ का अध्यक्ष लक्ष्मिकान्त देवकाटाले वडाको मोटरसाइकल छोराको हातमा दिएका छन् । ७ का अध्यक्ष गोविन्द रावलले लिएको मोटरसाइकल पनि छोराले नै चलाएका छन् भने ९ का अध्यक्ष रामबहादुर शाहिले भतिजालाई दिएका छन् ।

मेल्लेख गाउँपालिकाका ८ वटा वडा मध्ये १ का अध्यक्ष तुलेकामी र २ का अध्यक्ष दानबहादुर बुढाले सवारी साधन लिएका छैनन् । अन्य ५ जना अध्यक्ष मध्ये ८ का अध्यक्ष खगेन्द्रबहादुर साउदले मात्रै आफैं प्रयोग गरेका छन् । ३ का अध्यक्ष केशबहादुर शाह , ४ का अध्यक्ष बीरबहादुर साउद , ५ का अध्यक्ष रामबहादुर बोहरा, ६ का अध्यक्ष नरपती रावल र ७ का अध्यक्ष अम्मरबहादुर लुहारले लिएको मोटरसाइकल पनि नातागोताले प्रयोग गरिरहेका छन् ।

'लाइसेन्स भएका अध्यक्षले मात्रै लैजानुस भनेका हौं । तर सबैले लिनुपर्छ भन्नेहरूको जमात बलियो भयो र दिन बाध्य भयौं' मेल्लेख गाउँपालिकाका अध्यक्ष लोकबहादुर बोहराले भने । ढकारी गाउँपालिकाका ८ वडा मध्ये ४ वटा अध्यक्षले मोटरसाइकल लिएका छन् भने ४ अध्यक्षले लिन बाँकी छ । 'लाइसेन्स भएपछि मात्रै सवारी दिनु पर्ने हो । तर कर्मचारीलाई जनप्रतिनिधिको दबाब छ ।'

एक कर्मचारीले भने ,' बिस वर्षसम्म कर्मचारीले शासन चलाए । अब हाम्रो पालो हो भन्दै थर्काउछन् । लिएका बाइकहरू पनि थोत्रा काम नलाग्ने बनाइसके ।' चौरपाटी गाउँपालिकाका ७ र बान्निगढी गाउँपालिकाका ६ वटा वडाअध्यक्षहरूले लिएको बाइकको हालत पनि उस्तै छ । बान्नगढिका एक जना वडाअध्यक्षसँग लाइसेन्स छैन । 'कतिपय अध्यक्षहरूले लिएका बाइकहरू कहा छन् पत्तो छैन । कर्मचारीले चासो राख्दा दबाब आउँछ' एक कर्मचारीले भने ।

कमलबजार नगरपालिकाका १० वटै अध्यक्षहरूले मोटरसाइकल लिएको र लाइसेन्स कसैसँग नभएको नगरप्रमुख ओमप्रकाश बिष्ट बताउँछन् । तुर्माखाँद गाउँपालिका १ का अध्यक्ष थिरबहादुर रावत र २ का अध्यक्ष शुभ जैसीले पनि मोटरसाइकल लिएका छन् । तर यी दुवै वडामा सडक पुगेको छैन । तुर्माखाद गाउपालिकाका ७ वडाका अध्यक्षले लिएका सवारी पनि आफन्तले नै प्रयोग गरिरहेको स्थानीय बताउँछन् ।

यस्तै रामारोशन गाउँपालिकाका ७ वटा वडा मध्ये २ का अध्यक्ष चक्र साउँद , ३ का अध्यक्ष तारा साउँदले आफैं प्रयोग गरिरहेका छन् । अन्य ५ जना अध्यक्षले नातागोताकै हातमा थमाएका छन् ।

प्रकाशित : वैशाख १९, २०७६ ०९:५७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT