आत्मनिर्भर बन्न सघाउँदै आमा समूह

त्यही कोषबाट सापट लिएर उनीहरू घरको गुजारा गर्छन् । सामाजिक भेदभाव र महिला स्वास्थ्यलगायत सवालमा उनीहरू सक्रिय बन्छन् ।

समूह गठन गरेपछि धेरै कुरामा सजिलो भएको डिलाशैनी गाउँपालिका ५, खरेली टोलकी देवकी नाथ बताउँछिन् । उनले भनिन्, ‘प्रत्येक महिना सबै दिदीबहिनी बैठक बस्छौं । सामाजिक विकासका सवालमा कुराकानी गर्छौं र मासिक २० रुपैयाँ जम्मा गर्छौं ।’

उनीहरू छरछिमेकका २०/२५ महिला मिलेर गठन गरिएको समूहबाट उठेको रकम आलोपालो गरी लिन्छन् । ‘त्यहीबाटै आफ्नो गर्जो टार्छौं,’ उनले भनिन् । आमा समूहको कोषबाटै लिएको पैसाबाट घरखर्च चलाइरहेको डिलाशैनी ५ कै माया नाथ बताउँछिन् । उनले भनिन्, ‘आलोपालो गरी रकम चलाउँछौं ।’ यसले यहाँका महिलाका सानोतिनो खर्च टर्ने गर्छ । छोराछोरीको पढाइ खर्च पनि यहीबाटै चल्ने चौसेरा आमा समूहकी जानकी नाथ बताउँछिन् ।

सस्तो ब्याजदरमा आफुहरूले ऋण पाउने गरेको दशरथचन्द नगरपालिका २ की मञ्जु विकले बताउँछिन् । वार्षिक १० प्रतिशत ब्याजमा पैसा चलाउने गरेका उनले सुनाइन् । उनले भनिन्, ‘समूहमा हामी आफ्ना समस्या आपसमा सुनाउँछौं र समाधानका लागि एकजुट हुन्छौं ।’ अलग–अलग समूहका महिलाहरू पनि विभिन्न समूहमा एकै ठाउँमा भेला भएर सामाजिक सवालमा छलफल चलाउने गरेका छन् ।

अप्ठ्यारो परेका बेला एकले अर्कोलाई सहयोग गर्ने उनीहरू बताउँछन् । समूहहरू गठन भएर विभिन्न अभियान चलाउन थालेपछि गाउँका दिदिबहिनीमा धेरै परिवर्तन आएको छ ।

–तृप्ति शाही