सुनसान मार्तडी

कान्तिपुर संवाददाता

बाजुरा — स्थानीय तहमा चहलपहल बढेपछि सदरमुकाम मार्तडी सुनसान भएको छ । मार्तडी बजारको माथिल्लो भागमा सरकारी तथा गैरसरकारी कार्यालयहरू भएकाले फाट्टफुट्ट ओहोरदोहोर गर्ने देखिन्छन् । दुनीमा हाटबजार छ । कुनैबेला निकै भीडभाड हुने दुनी हाटबजार यतिबेला ग्राहक नपाएर सुनसान बनेको छ । 

सुनसान बनेको बाजुरा सदरमुकाम मार्तडी बजार । तस्बिर : कान्तिपुर

जिल्लाको उत्तरी क्षेत्रका ४ स्थानीय तहका बासिन्दा जिल्ला बाहिर जान सदरमुकम भएर आवतजावत गर्ने भए पनि बस्दैनन् । उनीहरू सिधै गाडीमा आउँछन् र गाडीमै जान्छन् । ‘वर्ष दिनयता व्यापार शून्य भएको छ,’ मार्तडीमा फेन्सी पसल सञ्चालन गर्दै आएका गौमुलका लोकेन्द्र धामीले भने, ‘के गरुँ, कसो गरुँ भइसक्यो ।’ उनी ५ वर्षदेखि मार्तडीमै व्यापार गर्दै आएका थिए । ‘केही समय त फाटफुट चलेकै थियो, अहिले त फिटिक्कै बन्द भयो,’ उनले भने ‘मासिक ७ हजार पसलको भाडा तिर्न पनि समस्या भएको छ ।’

गाउँ तथा नगरका केन्द्रमा स्थानीय बजार स्थापना भएका छन् । सदरमुकाममा नागरिकतालगायत कामबाहेक अरू केही पर्दैन । ग्रामीण क्षेत्रमा यातायत सेवा विस्तार भएपछि नागरिकता बनाउन आएकाहरू पनि काम सकेर घर फर्किन्छन् । मार्तडीमै होटल सञ्चालन गर्दै आएकी बूढीनन्दा नगरपालिका ६ की राजकला देवकोटाले भनिन्, ‘होटल बिक्री गरेर हिँड्न खोज्दा पनि बिक्री हुँदैन ।’

गौमुल गाउँपालिकाको घट्मुना, हिमाली गाउँपालिकाको धुलाचौर, जगन्नाथ गाउँपालिकाको पिलुचौर, खप्तड छेडेहद गाउँपालिकाको डोगडी, त्रिवेणी नगरपालिकाको तोलीमा नयाँ बजार स्थापना भएका छन् । स्थानीय बासिन्दा आफ्नै पालिकाको केन्द्रमा बजार खुलेपछि खुसी भएका छन् । सदरमुकाम आवतजावत गर्न लाग्ने खर्चसमेत जोगिएको हिमाली गाउँपालिका ५ की विमला पाण्डेको भनाइ छ ।

प्रकाशित : जेष्ठ २८, २०७६ ०९:४२
प्रतिक्रिया
पठाउनुहोस्

अस्पतालको लिफ्ट बिग्रँदा सास्ती

कान्तिपुर संवाददाता

धनगढी — धनगढीस्थित सेती अञ्चल अस्पतालमा बिग्रिएको लिफ्ट मर्मत नहुँदा बिरामीले सास्ती खेप्नु परेको छ । बिरामीलाई माथिल्लो तलामा बोकेर लानुपर्ने बाध्यता छ । ‘बिरामी भएर आएँ,’ डडेल्धुराबाट खुट्टाको उपचारका लागि आएकी कलावती बलले भनिन्, ‘दुई तलासम्म हिँडेर जाँदा साह्रै दुःख भयो ।’ 

सेती अञ्चल अस्पतालमा लिफ्ट बिग्रिएपछि बिरामी बोक्दै कुरुवा । तस्बिर : निर्मला खडायत/कान्तिपुर

अस्पतालमा आउने अधिकांश बिरामीलाई माथिल्लो तला आउजाउ गर्न सकस परेको छ । हिँड्न नसक्नेलाई बोकेर लैजानुपर्ने बाध्यता छ । ‘छातीमा पानी भरिएर उपचार गर्न आएका बेला २ तलामाथि उक्लिँदा श्वास फुलेर झन् गाह्रो भयो,’ उपचारका लागि आएका टेकराज भट्टले भने । उनले सामान्य बिरामीलाई त्यति गाह्रो नभए पनि सिकिस्त, बालक र वृद्धहरूलाई लिफ्ट नहुँदा निकै सास्ती हुने बताए ।

‘एक तलासम्म त हवील चेयरमा राखेर ल्याएँ, यसपछि मुटुरोगी आमालाई हिँडाएर माथिल्लो तलामा ल्याउनुपर्‍यो,’ बैतडी सिगास गाउँपालिका १ बाट आमाको उपचारका लागि आएकी निर्मला भुलले भनिन्, ‘अस्पतालमा भएको लिफ्ट नबनाउँदा धेरै गाह्रो भएको छ ।’

लिफ्ट बिग्रएको डेढ महिना नाघेको अस्पतालका सुरक्षाकर्मी लोकेन्द्र शाही बताउँछन् । उनी भन्छन्, ‘मर्मत गरेको केही समयमै बिग्रिहाल्छ, ‘काठमाडौंबाट प्राविधिक आउँछ बनाउँछ, फेरि केही दिनमै बिग्रिन्छ ।’ चीनबाट झिकाइएको लिफ्ट बिग्रेका बेला मर्मत गर्ने प्राविधिक काठमाडौंबाटै बोलाउनुपर्ने भएकाले ढिलाइ भएको अस्पतालका सूचना अधिकारी दिलीप श्रेष्ठ बताउँछन् । ‘धेरैपटक बोलाएर मर्मत गरिसक्यौं, हरेकपटक महँगो शुल्क तिरेर काठमाडौंबाट प्राविधिक बोलाउँछौं,’ उनले भने, ‘बिरामीहरूको समस्या अस्पताल प्रशासनले पनि बुझेको छ । यो महिनाभित्रै मर्मत गरी सञ्चालन गर्छौं ।’

प्रकाशित : जेष्ठ २८, २०७६ ०९:४१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT