बजेट सक्न धमाधम सम्झौता

कान्तिपुर संवाददाता

धनगढी — चालु आव सकिन एक साता मात्रै बाँकी रहँदासम्म स्थानीय, प्रदेश र संघीय सरकार मातहतका कार्यालयहरूले योजनाको सम्झौता र चेक भुक्तानी दिन रोकेका छैनन् ।चालु वर्षको बजेट सक्न र योजना कार्यान्वयन गर्न विभिन्न कार्यालयहरूले साताअघिको मिति राखेर सम्झौता गरिरहेका छन् ।

उनीहरूले सम्झौताअनुसार ८० प्रतिशतसम्म पेस्की दिइरहेका छन् । स्थानीय तह, प्रदेश र संघ मातहतका कार्यालयहरूले विभिन्न योजना तथा कार्यक्रम बनाएर रकम भुक्तानी गरिरहेका छन् । सम्झौता गर्नेहरूले नक्कली कागजात तयार गरी कार्यक्रम सम्पन्न भएको देखाउँदै रकम भुक्तानी लिइरहेको स्रोत बताउँछ ।

स्रोतका अनुसार प्रदेश मन्त्रालयहरूमा उद्योग, पर्यटन, वन तथा वातावरण, भौतिक पूर्वाधार, कृषि मन्त्रालयका कार्यक्रम र अध्ययन प्रतिवेदनअन्तर्गतका योजनाको सम्झौता र भुक्तानी लिने काम भइरहेको छ । कोष तथा लेखा नियन्त्रण कार्यालय धनगढीका कोष नियन्त्रक लक्ष्मीराज जोशीले चालुको असार २० र पुँजीगत बजेटको असार २५ गतेसम्म मात्रै चेक भुक्तानी गर्न सकिने बताए ।

तर, कोलेनिकाको स्विकृति लिएर असार ३० गतेसम्म चेक काट्ने व्यवस्था छ । स्थानीय तहमा धनगढी उपमहानगर पालिकाले आइतबार असार २२ गतेसम्म उपभोक्ता समितिसँग सम्झौता गर्न छोडेको छैन । योजना कार्यान्वयनमा लागि एक साताको म्यादसमेत नराखेर भएका सम्झौता बजेट सक्न मात्रै भएको स्थानीय विद्यार्थी नेता पुष्प ओझाले बताए ।

विद्यालय भवन निर्माण र कालोपत्रे गर्न १०/१२ दिनको म्याद राखेर उपभोक्ता समितिसँग सम्झौता गरिएको छ । नगरपालिकाले असार २१ गते सर्वोदय माविको भवन निर्माणको ९ दिनको म्याद राख्दै सम्झौता गरेको छ । धनगढी नगरपालिका प्रमुख नृपबहादुर बडले केहि सानातिना योजनाहरूलाई असारमा आएर सम्झौता गरिएको बताए । ‘जुन योजना १०/१५ दिनमा गर्न सकिन्छ त्यस्ताको सम्झौता भएको हो,’ उनले भने ।

प्रकाशित : असार २४, २०७६ ११:३६
प्रतिक्रिया
पठाउनुहोस्

वन्यजन्तु पीडितले पाएनन् सुविधा

कान्तिपुर संवाददाता

कञ्चनपुर — भीमदत्त नगरपालिका १९ बाग्फाटाका छौंडा रानालाई आँगनमै बसेका बेला चितुवाले आक्रमण गर्‍यो । शुक्लाफाँटा राष्ट्रिय निकुञ्जबाट आएको चितुवाको आक्रमणबाट उनी घाइते भए । उनलाई तत्काल महेन्द्रनगरस्थित महाकाली अञ्चल अस्पताल पुर्‍याइयो । यहाँ निको नभएपछि धनगढीस्थित सेती अञ्चल अस्पताल पठाइयो । केहि दिनको उपचारपछि उनी सञ्चो भए । 

उपचारपछि राना निको त भए, तर उपचारका क्रममा लागेको खर्च अझै तिर्न सकेका छैनन् । राहतका लागि निकुञ्ज कार्यालयमा निवेदन पनि दिए । हालसम्म उनले राहत पाउन सकेका छैनन् । ‘बाह्र/तेह्र हजार जति खर्च भएको थियो, अझै तिर्नै बाँकी छ,’ छौंडाका छिमेकी जयराम रानाले भने, ‘रिनदान गरेर उपचार गरेको, अब केले तिर्नु ।’

छौंडा जस्तै वन्यजन्तुबाट खेतीबाली, घर तथा अन्य भौतिक र मानवीय क्षति भएका धेरैले राहत रकम पाउन सकेका छैनन । करिब २ सय फायलहरू तत्कालिन क्षेत्रिय वन निर्देशनालयमै हराएका कारण शुक्लाफाँटा राष्ट्रिय निकुञ्जको मध्यवर्ती क्षेत्रका पीडितले राहत रकम पाउन नसकेका हुन् । २०७५ कार्तिकसम्म वन्यजन्तु राहत निर्देशिकाअनुसार पीडित परिवारलाई निकुञ्ज वा वन कार्यालयको सिफारिसमा क्षेत्रिय वन निर्देशनालयबाट राहत रकम निकासा हुने गर्थ्यो । मध्यवर्ती क्षेत्रका थुप्रै फायलहरू निकुञ्ज कार्यालयले पनि क्षेत्रिय वन निर्देशनालयमा पठाएको थियो । अहिले निर्देशिका फेरिएर निकुञ्जले नै राहत दिने भएको छ ।

तर क्षेत्रिय वन निर्देशनालयमा पठाइएको २ सय फायल हराएर राहत रकम नै फ्रिज हुने अवस्था आएको शुक्लाफाँटा मध्यवर्ती क्षेत्र व्यवस्थापन समितिका अध्यक्ष पुष्कर बहादुर सिंहले बताए । ‘दुई सय जति फायल हराएका छन्, पैसा आएर निकुञ्जमा थन्किएको छ, तर वालीनाली क्षति भएका, शारिरीक र भौतिक क्षति भएकाहरू राहतबाट बञ्चित भएका छन्,’ अध्यक्ष सिंहले भने, ‘पीडितहरू अधिकांस विपन्न छन्, कतिपयले ऋण निकालेर उपचार गरेका छन् उनीहरू उक्त रकम कहाँबाट तिर्छन ? ।’

क्षेत्रिय वन निर्देशनालय प्रदेश वन निर्देशनालयमा फेरिएसँगै उक्त ठाउँमा प्रदेश वन मन्त्रालयको कार्यालय राख्दा फायलहरू हराएको हुनसक्ने अनुमान गरिएको छ । निकुञ्ज कार्यालयले पनि फायल ल्याउँदा गणना नै नगरी ल्याएको देखिन्छ । ‘धेरै समय फायलहरू निर्देशनालयमै रहे, अहिले उक्त कार्यालय नै नरहँदा खोजी गर्न सकिने अवस्था पनि छैन,’ शुक्लाफाँटा राष्ट्रिय निकुञ्जका प्रमुख संरक्षण अधिकृत लक्ष्मणप्रसाद पौड्यालले भने, ‘हामीहरू राहत वितरणका लागि प्रयास गरिरहेका छौं ।’

प्रमुख संरक्षण अधिकृत पौड्यालले उपभोक्ता समितिको निर्णयहरूका आधारमा विभागबाट स्विकृति लिएर राहत वितरणको प्रयास गरिने बताए । उनकाअनुसार राहतका लागि ११ लाख रकम आएको छ । उक्त रकम फ्रिज नहुने खातामा राखिएको उनले बताए ।

प्रकाशित : असार २४, २०७६ ११:३५
पूरा पढ्नुहोस्
प्रतिक्रिया
पठाउनुहोस्