कामदारले पाएनन् ज्याला

कान्तिपुर संवाददाता

धनगढी — प्रधानमन्त्री रोजगार कार्यक्रमअन्तर्गत धनगढी उपमहानगरपालिका १८ र १९ मा काम गर्ने कामदारले ज्याला पाएका छैनन् । नगरले समयमै ज्याला नदिई आफूहरूलाई दुःख दिएको उनीहरूको भनाइ छ । धनगढी १४, १८ र १९ का सुपरभाइजर प्रकाश विकले काम थालेको १५ दिनमा पहिलो किस्ता दिने बताएका थिए । तर समय नाघिसकेपछिभने ज्याला दिने कुरा नगरिएको उनले बताए ।

‘वडाध्यक्ष र मैले समयमै ज्याला पाइन्छ भनेर कामदार खोज्यौं । तर नपाएपछि हामीसँग कामदार कराइरहेका छन्,’ विकले भने, ‘संयोजकले खासै चासो दिइरहेका छैनन् ।’ समयमै ज्याला नदिए धनगढी उपमहानगरपालिका घेराउ गरेर आन्दोलन गर्ने उनको चेतावनी छ ।

तर रोजगार कार्यक्रम संयोजक चन्द्रबहादुर महराले आवको अन्त्यतिरको चाप भएकाले समयमै प्राविधिक व्यस्त भएर ज्याला दिन ढिलाइ भएको बताए । असारभित्र सबैलाई ज्याला उपलब्ध गराइने उनको भनाइ छ । सरकारले प्रधानमन्त्री स्वरोजगार कार्यक्रमका लागि कामदार माग गरेपछि आवेदन दिनेको घुइँचो लाग्यो । असारदेखि प्रत्येक वडामा ३० जनाका दरले धनगढी उपमहानगरपालिकाका १९ वटै वडामा कार्यक्रम सुरु भएको हो ।

‘प्रत्येक वडामा ३० जनाका दरले ५ लाख विनियोजन गरिएको थियो,’ धनगढी १ का वडाध्यक्ष सन्तोष मुडभरीले भने, ‘सुरुमा आवेदन दिनेमध्ये ३० जना छानेर उनीहरूलाई नाली सफाइको काममा लगाइएको छ ।’ आफ्नो वडामा कार्यक्रम अन्तिम चरणमा पुगेको उनले बताए । ‘यस वर्ष ३० दिनका लागि भनेर यो कार्यक्रम ल्याइएको छ । अर्को आवको सुरुदेखि नै दक्ष एवं अदक्ष सबैका लागि यो कार्यक्रम आउनेछ,’ उनले भने ।

बेरोजगारलाई उनीहरूको क्षमताका आधारमा वर्षमा सय दिन रोजगारी दिने भनेर सरकारले कार्यक्रम सुरु गरेको थियो । तर अहिले रोजगार कार्यक्रमको बहानामा युवालाई ३० दिनका लागि नाली सफाइमा लगाएर बजेट सक्ने काम भइरहेको सर्वसाधारणको गुनासो छ ।

‘असार मसान्तमा आएर बजेट सक्ने काम मात्र भएको छ । ३० दिनको नाली सफाइ कार्यक्रमले बेरोजगार युवाको समस्या समाधान गर्न सक्दैन,’ धनगढी उपमहानगरपालिका १६ का हेमराज जोशीले भने । सरकारले बेरोजगारलाई जीविकोपार्जनमा सघाउने खालका कार्यक्रम ल्याउनुपर्ने उनले बताए ।

प्रधानमन्त्री रोजगारीका कार्यक्रममा बजेट सक्ने मात्रै काम भएको धेरैको भनाइ छ । ‘रोजगारीका नाममा असारमा आएर नाली सफाइ गरी झारा टार्नु उचित होइन,’ धनगढी उपमहानगरपालिका ३ का शेरसिंह रावलले भने, ‘सरकारले स्वरोजगार कार्यक्रमका नाममा जनताको बजेट गलत रूपमा प्रयोग गरिरहेको छ । यसबाट बेरोजगारीको दिगो समाधान हुन सक्दैन ।’

वैशाख मसान्तसम्म रोजगारीका लागि भनेर धनगढीमा १४ हजार ४ सय ६७ जनाले आवेदन दिएका थिए । तर १८ वटा वडाका ५ सय ६२ जनाले मात्रै काम पाएको रोजगार संयोजक महराले बताए । १४ नम्बर वडामा निर्धारित काम गर्न इच्छुक नभएपछि कार्यक्रमै लागू हुन सकेन ।

प्रकाशित : असार २४, २०७६ ११:३८
प्रतिक्रिया
पठाउनुहोस्

बजेट सक्न धमाधम सम्झौता

कान्तिपुर संवाददाता

धनगढी — चालु आव सकिन एक साता मात्रै बाँकी रहँदासम्म स्थानीय, प्रदेश र संघीय सरकार मातहतका कार्यालयहरूले योजनाको सम्झौता र चेक भुक्तानी दिन रोकेका छैनन् ।चालु वर्षको बजेट सक्न र योजना कार्यान्वयन गर्न विभिन्न कार्यालयहरूले साताअघिको मिति राखेर सम्झौता गरिरहेका छन् ।

उनीहरूले सम्झौताअनुसार ८० प्रतिशतसम्म पेस्की दिइरहेका छन् । स्थानीय तह, प्रदेश र संघ मातहतका कार्यालयहरूले विभिन्न योजना तथा कार्यक्रम बनाएर रकम भुक्तानी गरिरहेका छन् । सम्झौता गर्नेहरूले नक्कली कागजात तयार गरी कार्यक्रम सम्पन्न भएको देखाउँदै रकम भुक्तानी लिइरहेको स्रोत बताउँछ ।

स्रोतका अनुसार प्रदेश मन्त्रालयहरूमा उद्योग, पर्यटन, वन तथा वातावरण, भौतिक पूर्वाधार, कृषि मन्त्रालयका कार्यक्रम र अध्ययन प्रतिवेदनअन्तर्गतका योजनाको सम्झौता र भुक्तानी लिने काम भइरहेको छ । कोष तथा लेखा नियन्त्रण कार्यालय धनगढीका कोष नियन्त्रक लक्ष्मीराज जोशीले चालुको असार २० र पुँजीगत बजेटको असार २५ गतेसम्म मात्रै चेक भुक्तानी गर्न सकिने बताए ।

तर, कोलेनिकाको स्विकृति लिएर असार ३० गतेसम्म चेक काट्ने व्यवस्था छ । स्थानीय तहमा धनगढी उपमहानगर पालिकाले आइतबार असार २२ गतेसम्म उपभोक्ता समितिसँग सम्झौता गर्न छोडेको छैन । योजना कार्यान्वयनमा लागि एक साताको म्यादसमेत नराखेर भएका सम्झौता बजेट सक्न मात्रै भएको स्थानीय विद्यार्थी नेता पुष्प ओझाले बताए ।

विद्यालय भवन निर्माण र कालोपत्रे गर्न १०/१२ दिनको म्याद राखेर उपभोक्ता समितिसँग सम्झौता गरिएको छ । नगरपालिकाले असार २१ गते सर्वोदय माविको भवन निर्माणको ९ दिनको म्याद राख्दै सम्झौता गरेको छ । धनगढी नगरपालिका प्रमुख नृपबहादुर बडले केहि सानातिना योजनाहरूलाई असारमा आएर सम्झौता गरिएको बताए । ‘जुन योजना १०/१५ दिनमा गर्न सकिन्छ त्यस्ताको सम्झौता भएको हो,’ उनले भने ।

प्रकाशित : असार २४, २०७६ ११:३६
पूरा पढ्नुहोस्
प्रतिक्रिया
पठाउनुहोस्