सिँचाइ कुलो नमुना
बैतडी — अधिकांश उपभोक्ता समितिलाई समयमै सम्पन्न नगरेको, गुणस्तरहीन काम, आर्थिक अनियमितता, टाढाबाठाको रजाइँलगायतका आरोप लाग्ने गरेको छ । तर, बैतडीमा दुर्गम गाउँको एक उपभोक्ता समितिले गरेको कामको भने चौतर्फी प्रशंसा भएको छ ।
डिलासैनी गाउँपालिका ६ चौसेरामा ३० वर्ष उमेर समूहका युवाहरूले निर्माण गरेको सिँचाइ योजनाको यतिबेला जिल्लाभर प्रशंसा भएको छ । ५ जना पुरुष र ४ महिला रहेको डोलवे सिंचाइ योजनाका अध्यक्ष हरीश नाथ नेतृत्वको युवा समूहको उपभोक्ता समितिले प्रदेश सरकारबाट आएको १८ लाख बजेटबाट नमुना सिंचाइ कुलो निर्माण गरेका हुन् ।
६ सय मिटर लम्बाइको उक्त कुलो २५ सेमी चौडा छ । स्थानीय लिउडे खोलाबाट ल्याइएको कुलो अनुगमन गर्दा अनुगमनकर्ताहरू उत्साहित भएको जिल्ला समन्वय समितिले जनाएको छ ।
जिससका समन्वय अधिकारी नवीनचन्द्र पाण्डेले भने, ‘प्राविधिकको सल्लाहअनुसार गरेको डिजाइनभन्दा मजबुत निर्माण गरेका रहेछन् ।’ युवाहरूले यसरी नै विकास निर्माणका काममा समुदायलाई सघाउनुपर्ने उनले बताए । योजना हेर्ने इन्जिनियर प्रियव्रत जोशीले बैतडीमा भएका राम्रा योजनामध्ये युवाहरूको समूहले निर्माण गरेको उक्त सिंचाइ योजना उत्कृष्ट भएको बताए । उनले भने, ‘गिट्टी, बालुवा, सरिया, सिमेन्टको प्रयोगमा कुनै त्रुटि र कमसल प्रयोग छैन । उनीहरूले जिल्लामै राम्रो सन्देश दिएका छन् ।’
२ सय घरधुरी लाभान्वित हुनेगरी बनेको सिंचाइ कुलोको कामप्रति स्थानीय पनि सन्तुष्ट छन् । राजनीतिक पूर्वाग्रह नराखी गाउँका जनतालाई सुविधा दिनुपर्छ भन्ने सोचका साथ काम भएकाले खुसी लागेको स्थानीय नरेन्द्र नाथले बताए ।
‘आगामी योजनाको जिम्मेवारी यस्तै भावना भएका युवाहरूलाई दिएमा समूदायको विकास हुन्छ,’ उनले भने । तलतिर चौलानी नदी बगे पनि पानीको अभावले यहाँको खेतमा रोपाइँ हुन नसकेर किसानहरू मकै मात्रै लगाउन बाध्य थिए ।
कुलो बनेपछि खेतमा धान फलाउन सकिने भएको भन्दै किसानहरू खुसी छन् । उपभोक्ता समितिका अध्यक्ष हरीश नाथले ढिलो गरी बजेट आएकाले समयमै काम सक्न सकस भएको बताए । गाउँलेलाई मिलाएर काम गराउँदा काम सजिलै पूरा भएको उनको भनाइ छ ।
प्रकाशित : असार २९, २०७६ १५:४९