टीकापुरमा निःशुल्क रगत अभियान

कान्तिपुर संवाददाता

टीकापुर — नेपाल रेडक्रस सोसाइटी टीकापुर शाखाले निःशुल्क रगत अभियान सुरु गरेको छ । टीकापुर अस्पतालमा आउने बिरामीलाई आवश्यक रगतको प्रोसेसिङ खर्च स्थानीय तहले दिने भएपछि निःशुल्क उपलब्ध गराउन थालेको शाखा प्रमुख जगदीश पण्डितले बताए ।

उनले भने, ‘रगत त पहिले पनि निःशुल्क नै हो, तर एक पिन्ट रगत प्रोसिसिङका लागि साढे ८ सय रुपैयाँ लाग्छ । त्यो रकम स्थानीय तहले दिने भएपछि बिरामीले तिर्नु नपर्ने भएको छ ।’

टीकापुर नगरपालिकाबाट सुरु भएको यो अभियान जानकी गाउँपालिकाको वडा २ र ५ मा पूरा भएको र अन्य ठाउँका बासिन्दाका लागि पनि यो जारी रहेको पण्डितले बताए । यहाँको टीकापुर नगरपालिका, जानकी गाउँपालिकाको वडा २ र ५ का बासिन्दाका लागि त्यहाँको स्थानीय तहले प्रोसेसिङ खर्च व्यहोरिदिने शाखाले जनाएको छ । पण्डितका अनुसार अस्पतालमा उपचाररत कतिपय बिरामीले रगत प्रोसेसिङको पनि रकम तिर्न नसक्ने हुँदा यसले सहज बनाउनेछ ।

टीकापुर नगरपालिकाले वार्षिक १० लाख र जानकी गाउँपालिकाको वडा २ र ५ ले १/१ लाख रुपैयाँ रेडक्रसलाई रगत प्रोसेसिङवापत प्रदान गर्नेछ । स्थानीय तहसित सम्झौता भएका ठाउँका बासिन्दाले आवश्यक रगत निःशुल्क पाउनेछन् ।

प्रकाशित : श्रावण ६, २०७६ ०९:४४
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

जनप्रतिनिधिको पारिश्रमिक वृद्धवृद्धालाई

कान्तिपुर संवाददाता

कञ्चनपुर — स्थानीय तहदेखि प्रदेश र संघीय सरकारसम्म केहि जनप्रतिनिधिहरूले जथाभावी राज्यको सेवा सुविधाको दुरुपयोग गरेका समाचारहरू बेला–बेलामा बाहिर आइरहेका छन् ।

आफ्नै घरमा बसेर घर भाडा लिने, आफ्नै साधन चढेर सवारी भाडा लिनेलगायत कुराले निकै चर्चासँगै जनप्रतिनिधिलाई आलोचित पनि बनाएको छ ।

तर कञ्चनपुरको भीमदत्त नगरपालिका १ का वडाध्यक्ष आशिफ कुँवरले भने आफुले पाएको मासिक पारिश्रमिक वृद्धवृद्धा, अशक्त र अपांगता भएका व्यक्तिहरूलाई वितरण गरेका छन् । उनी निर्वाचित भएदेखि प्राप्त मासिक तलब आफ्नै वडामा नियमित रूपमै वितरण गर्दै आएका हुन् ।

यस वर्ष पनि उनले आइतबार आफ्नो पारिश्रमिकबापत प्राप्त रकम अपांगता भएका, अशक्त र ७० वर्ष नाघेका वृद्धवृद्धालाई वितरण गरे । गत आवमा प्राप्त २ लाख ६३ हजार रुपैयाँ वितरण गरिएको उनले बताए । ‘१ सय ४० जनालाई वितरण भएको छ, वडा कार्यालयमा आउन नसक्नेलाई अब घरमै पुगेर वितरण गरिनेछ,’ उनले भने, ‘वडामा भएका अपांग, अशक्त र वृद्धवृद्धाको खोजी भइरहेको छ ।’

अपांगता भएका व्यक्तिलाई १ हजार र अशक्त तथा ७० वर्ष नाघेका वृद्ध वृद्धालाई १५/१५ सयका दरले वितरण गरिएको हो । वडा कार्यालयले आफ्नै कार्ड बनाएको छ । सोही कार्डका आधारमा रकम वितरण भइरहेको वडाध्यक्ष कुंँवरले बताए । उनले गत वर्षको तुलनामा १२ जना बढेकाले लागि कार्ड बनाइएको बताए ।

गत वर्ष पनि वडाध्यक्ष कुँंवरले एक वर्षको पारिश्रमिक यसरी नै वडाका अशक्त र वृद्धवृद्धालाई वितरण गरेका थिए । उनले चुनावताका आफूले पाउने पारिश्रमिक वडामै खर्च गर्ने प्रतिबद्धता गरेका थिए । तर चुनाव जितेर आएपछि सानो रकमले केही गर्न नसकिने र वृद्ध वृद्धा तथा अशक्तलाई त्यहि रकमले पनि ठुलो राहत हुने ठानेर सबैलाई वितरण गरिएको बताए ।

प्रकाशित : श्रावण ६, २०७६ ०९:४४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT