बडिमालिकाको ७ दिने तीर्थयात्रा

संगीता तिमिल्सेना 

बाजुरा — बडिमालिका तीर्थयात्राका लागि देशैभरका विभिन्न ठाउँबाट पर्यटक तथा भक्तजन आउने क्रम सुरु भएको छ । बडिमालिकामा जनैपूर्णिमाको अघिल्लो दिन पूजा हुने गर्छ । समुद्री सतहबाट ४ हजार २ सय १६ मिटर उचाइमा रहेको बडिमालिका पुग्न ७ दिनको पैदल यात्रामा हजारौं भक्तजन निस्किन्छन् ।

यहाँ पूजा गरे मागेको वर प्राप्त हुने जनविश्वास छ । साथै यहाँको प्राकृतिक सुन्दर दृश्यावलोकनका लागिसमेत पर्यटक देशैभरिबाट आउने गर्छन् ।

सदरमुकाम मार्तडीदेखि आइतबार बडिमालिकाको तीर्थयात्रा सुरु भएको छ । मेला लाग्ने ३ दिनअघि मार्तडीबाट औपचारिक पूजा टोलीसहित तीर्थयात्री प्रस्थान गर्ने चलन छ । साउन शुक्लपक्षका दिन यहाँबाट यात्रा सुरु हुने गरेको छ । बडिमालिकामा साउन २९ मा मूलपूजा गर्न मेला लाग्छ ।

जिल्लाभित्र र बाहिरका तीर्थयात्री तथा पर्यटकहरू, यहाँस्थित सरकारी कार्यालय र स्थानीय पर्यटकसहित भक्तजन परम्पराअनुसार आइतबार बिहान प्रजिअ गंगाप्रसाद न्यौपानेको नृेतत्वमा बडिमालिका प्रस्थान गरेको छ । बडिमालिका पुग्न तोकिएका स्थानमा बसेर ३ दिन लगाउनुपर्ने परम्परा छ । औपचारिक पूजाका लागि अछाम, डोटी, जुम्ला र कालिकोटबाट पनि सरकारी टोलीसहितका तीर्थयात्री बडिमालिका प्रस्थान भइसकेका छन् । पूजाका लागि डोटीको टोली प्रस्थान गरेको दिन त्यहाँका सरकारी कार्यालयमा सार्वजनिक बिदा दिने चलन कायमै छ ।

अछामको वैद्यनाथबाट त्यस क्षेत्रमा फलेको धानको बाला बडिमालिकामा चढाउने परम्पराअनुसार एक टोली १० दिनअघि प्रस्थान गरिसकेको छ । करिब १४ हजार फिट उचाइका समथर हरिया फाँट र ती फाँटमा फुलेका दर्जनौं प्रजातिका फूलले बडिमालिका प्रकृतिको अनुपम उपहार अनुभव हुने बुढीनन्दा ५ का प्रेमलाल पाध्याय बताउँछन् ।

बडिमालिका दर्शनका लागि बाजुरा, बझाङ, अछाम, डोटी, डडेल्धुरा, बैतडी, हुम्लाबाट तीर्थालु पुग्छन् । काठमाडौं, भारतको गढवाललगायत ठाउँबाट पनि दर्शनार्थी आउने गरेको मेला समितिले जनाएको छ । जनैपूर्णिमाका दिने गरिने पुजाका लागि १५ दिन अघिदेखि नै तयारी गर्ने चलन रहेको छ ।

बर्सेनि बाजुराले बडिमालिका जाने तीर्थयात्रुका लागि सुरक्षा व्यावस्थापन गदै आएको छ । सुरक्षा प्रबन्ध मिलाउन प्रहरी नायब उपरीक्षक उद्धवसिंह भाटको नेतृत्वमा टोली त्यसतर्फ प्रस्थान गरिसकेको छ । मेलामा मदिरा निषेध गरिएको छ । मदिरा नियन्त्रण गर्न विशेष टोली परिचालित हुने भएको भाटले बताए । बीचबाटोमा बास बस्ने र दर्शन गर्न जाने दर्शनार्थीलाई समस्या परे जुनसुकै बेला पनि प्रहरीलाई खबर गर्न सकिने प्रहरीले जनाएको छ ।

आवश्यक शौचालय व्यवस्थापनको जिम्मेवारी बडिमालिका नगरपालिकाले लिएको नगर प्रमुख पदम बडुवालले बताए । हिड्ने बाटोदेखि बडिमालिका मन्दिरसम्म ३० अस्थायी शौचालय निर्माणका लागि ३ दिनअघि नै प्राविधिकसहित कामदाहरू पठाइसकेको नगरप्रमुख बडुवालले बताएका छन् ।

बाजुरा जिल्लाका विभिन्न धार्मिक तथा पर्यटकिय क्षेत्रमा दर्शन गर्न यतिबेला तीर्थयात्रीको संख्या बढेको छ । जिल्लाका बुढिनन्दा, बडिमालिका, नाटेश्वरी, जुकोटको स्वामिकार्तिक, बडालेखलगायत क्षेत्रमा साउन पुर्णिमाको दिन एकैदिन पूजा गर्ने चलन छ ।

प्रकाशित : श्रावण २७, २०७६ ०९:१२
ADVERTISEMENT
प्रतिक्रिया
पठाउनुहोस्
ADVERTISEMENT

वैदैशिक रोजगारीले खेत बाँझै

‘घरमा महिला र वृद्धवृद्धा मात्र भए, भएको जमिन कमाउन नसकेपछि बाँझै हुन थाल्यो’
मोहन बुढाऐर

धनगढी — गाउँका सबै वैदेशिक रोजगारीमा हिँडेपछि धनगढी उप–महानगरपालिका १८ वडाको ‘जे’ गाउँको रानाभाट बस्तीका खेत बाँझै छन् । गाउँका अधिकांश पुरुष वैदेशिक रोजगारमा छन् । घरमा खेतीपाती गर्ने कोही नभएर तिनका खेत बाँझै पर्न थालेका हुन् ।

‘घरमा महिला र वृद्धवृद्धा मात्र भए’ ८६ वर्षीय वसन्त रानाभाटले भने, ‘कमाउन नसकेको जमिन बाँझै पर्न थालेको हो ।’

गाउँबाट केहि परिवार पलायन पनि भइसकेका छन् । उनकाअनुसार यो गाउँ ७४ परिवार रानाभाट परिवार मध्ये अहिले १५/२० मात्रै रहेका छन् । ‘कोहि सुगम सहरको खोजीमा छोड्न थालेका छन्, कोही आफ्नै थातथलो पोखरा राम्रो मानेर गएका छन्,’ उनले भने । रानाभाटको परिवारबाट पनि ४ जना वैदेशिक रोजगारमा छन् ।

उनका जेठो र कान्छो छोराबुहारीको परिवारले पनि पोखरामा घरजग्गा जोडेर उतै घरजम गरेका छन् । उनी भन्छन्, ‘यहाँ कुनै दुःख पीडा भएर छोड्न थालेका छैनन्, यहाँभन्दा बढी सुविधा र काम पाइने सम्भावना पोखरामा छ, त्यै भएर छोराहरूले पोखरा बसाइँ सरौ भने । विदेशबाट फर्केपछि उतै घरजग्गा किनेका हुन् ।’

०३२ सालमा पहिरोपीडित ७४ परिवार रानाभाट परिवारलाई सरकारले पुनःस्थापना गरेको थियो । धनगढीका १४, १५ र १८ नम्बर वडामा पर्ने फूलबारीको ‘ए’ देखि ‘के’ सम्मका गाउँ सरकारले बाढीपहिरो पीडितलाई ०३२ मा यहाँ ल्याएर पुनर्बास गराएको हो । फूलवारी कैलालीको साबिकको एक सिंगो गाविस हो । ‘जे’ गाउँको रानाभाट बस्ती वैदेशिक रोजगारले रित्तिन लागेको होइन ।

धनगढी उप–महानगरपालिको १४, १५ र १८ नम्बर वडामा पर्ने फूलवारीबाट बैदेशिक रोजगारमा जानेको सख्या बढी छ । फूलबारीको अर्को ‘डी’ गाउँ पनि वैदेशिक रोजगारमा निर्भर छ । खेतीपातीबाट घर खर्च धान्न नसकिने भएपछि यहाँको युवा जनशक्ति वैदेशिक रोजगारमा आकर्षित भएका देखिन्छन् ।

स्थानीय रमेश बस्नेत १८ वर्ष पूरा भएपछि वैदेशिक रोजगारको पछि दौड्ने जनशक्तिले यहाँको खेतीयोग्य जमिन बाँझो पर्न थालेको बताउछन् । ‘सुरुमा विदेशको कमाइबाट राम्रो कमाइगरि फर्केको देख्दा गाउँका अन्य बेरोजगार यवा/युवतीसमेत वैदेशिक रोजगारमा आर्कषित भए,’ उनले भने । ‘केटाकेटीको पढाइतिर पनि ध्यान गएको देखिँदैन । पढौलेखौं र सरकारी जागिर खोजौं भन्नेतिर कसैको सोच नै जादैन’ बस्नेतले भने ।

सुरक्षित अप्रावासन क्षेत्रमा स्वयंसेविको काम गर्दै आएका पुर्णबहादुर तिवारीले फूलवारीमा वैदेशिक रोजगारमा बुझेर नजाने ले दुःखसमेत पाएको बताए । उनी भन्छन्, ‘वैदेशिक रोजगारको लोभमा दलालको फन्दामा परेर कैयौं युवा ठगिएको, युवती बेचिएका घटना छन् ।’ उनका अनुसार फूलवारी गाउँका ३ जनाको विदेशमा मृत्यु भएको छ । कोहि जेलमा परेका छन् । कसैले काम नपाएर अलपत्र परेका छन् ।

प्रकाशित : श्रावण २७, २०७६ ०९:११
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT