राप्रपा नेपाल विभाजित

कान्तिपुर संवाददाता

काठमाडौ — समानुपातिक सभासद मनोनयनमा विवाद बढेपछि राष्ट्रिय प्रजातन्त्र पार्टी नेपाल सोमबार विभाजित भएको छ ।

पार्टीमा सैद्धान्तिक विचलन भएको, अध्यक्ष कमल थापाले मनोमानी ढंगले कार्य गर्दै आएको दाबी गर्दै ४० प्रतिशत केन्द्रीय सदस्यले बेग्लै पार्टीका लागि निर्वाचन आयोगमा निवेदन दिएका छन् । उनीहरूले नयाँ पार्टीको नाम 'नेपाली राष्ट्रिय प्रजातन्त्र पार्टी' प्रस्ताव गरेका छन् । शाहीकालीन सञ्चारमन्त्री टंक ढकालले अगुवाइ गर्दै पेस गरेको २० जनाको सूचीमा सहमहामन्त्री राजाराम श्रेष्ठ, केन्द्रीय सदस्यहरू श्याम तिमिल्सिना, बालकृष्ण न्यौपाने, रमेश श्रेष्ठ, घनेन्द्र सुब्बा, रुपासिंह थापा, इन्द्र चित्रकार, गणेश शेरचनलगायत छन् ।
मंसिर ४ को संविधानसभा चुनावमा समानुपातिकमा २४ सिट ल्याई राप्रपा, नेपाल चौथो शक्ति बनेको थियो । सभासद मनोनयन केन्द्रीय समितिलाई थाहै नदिई गरेको, अध्यक्ष थापाले कीर्ते दस्तावेज पेस गरेको, नातागोता र मोलमलाई गरी सभासद चयन गरेको भन्दै पार्टीभित्र असन्तुष्टि बढेको थियो । त्यसबाहेक पार्टीभित्र सैद्धान्तिक विचलनसमेत भएको दाबी असन्तुष्ट पक्षको छ । 'हामीले चुनावमा भोट माग्न जाँदा संवैधानिक राजतन्त्र, हिन्दु राष्ट्र र अखण्डतालाई मुख्य एजेन्डा बनाएका हौं,' पार्टी अलग हुनुको कारण राख्दै केन्द्रीय सदस्य बालकृष्ण न्यौपानेले कान्तिपुरसँग भने, 'तर, अध्यक्ष थापाले पार्टीले जितेपछि ती एजेन्डामा सम्झौता गर्न सक्ने भन्नतिर लाग्नुभयो । यो लाखौं जनताप्रति अपमान हो ।'
त्यसबाहेक सभासद चयन गर्दा पार्टी पद्धतिलाई पूरै वाइपास गरी एकलौटी ढंगले निर्णय गरेकाले पार्टी अलग हुन बाध्य भएको उनले बताए । 'पार्टीलाई यो अवस्थामा ल्याउन योगदान पुर्‍याएकालाई छाडेर छोरी, बुहारी, व्यापारी, आर्थिक चलखेलवाला व्यक्तिलाई टिप्न खोज्दा नै समस्या भएको हो,' न्यौपानेले भने । असन्तुष्ट केन्द्रीय सदस्यहरूले नयाँ पार्टी दर्ता गरी आधा सभासद आफूहरूले मनोनयन पाउनुपर्ने दाबी गरे पनि त्यो सम्भव नभएको आयोग स्रोतले जनाएको छ । नयाँ दलबारे आयोगले केही दिनमै आवश्यक निर्णय गर्ने स्रोतले बतायो । सभासद चयनकै विषयमा असन्तुष्ट पक्षले यसअघि निर्वाचन आयोग र सर्वोच्च अदालत दुवैमा कानुनी चुनौती दिँदै संस्थापनविरुद्ध निवेदन दिएको थियो । सर्वोच्चले यससम्बन्धी मुद्दामा केन्द्रीय कार्यसमितिको निर्णयसहितका कागजातसहित पेस गर्न आदेश दिइसकेको छ ।
अध्यक्ष थापाले ३ खालको केन्द्रीय समिति बनाई अपारदर्शी ढंगले काम गर्दै आएको अर्का एक केन्द्रीय सदस्यले आरोप लगाए । 'कतै ४५, कतै ७७ र एक सय ६० जनाको केन्द्रीय समिति खल्तीमा बनाई काम गर्दै आएको पनि पायौं । त्यसको छानबिन पनि अब हुन्छ,' उनले भने । थापा निकट केन्द्रीय सदस्य मोहन श्रेष्ठले भने निर्वाचन प्रक्रिया सक्नुअघि नै यस्तो विवाद झिक्नु अस्वाभाविक र त्रुटिपूर्ण हुने बताए । असन्तुष्ट पक्षले भनेअनुसार पार्टीमा सैद्धान्तिक विचलन नआएको उनले बताए । 'पार्टीले चुनावी घोषणापत्रको लाइन छाडेको छैन,' उनले भने । आयोगमा पेस भएको निवेदनमा उल्लेखित नामहरू केन्द्रीय समितिमै नभएको दाबी पनि उनले गरे ।

प्रकाशित : पुस १६, २०७० १०:१९
प्रतिक्रिया
पठाउनुहोस्

मधेसीका सूचीमा 'आफन्त र पैसावाल’

अब्दुल्लाह मियाँ

काठमाडौ — राजेन्द्र महतो, अनिल झा र राजकिशोर यादवले पठाए श्रीमतीको नाम गच्छदारले प्याब्सन र एन प्याब्सनका अध्यक्षलाई बनाएद्य

सबैजसो मधेसी दलले आफन्त र व्यापारी नछुट्ने गरी समानुपातिक सूची सोमबार निर्वाचन आयोगमा बुझाएका छन् । मधेसमा पहिलो दल बनेको विजयकुमार गच्छदार नेतृत्वको मधेसी जनअधिकार फोरम लोकतान्त्रिकले पार्टी पदाधिकारीभन्दा बाहिरका व्यापारिक पृष्ठभूमिका र पैसावाललाई सभासद सिफारिस गरेको छ ।
भीएस निकेतन स्कुलका संस्थापक पि्रन्सिपल तथा प्याब्सनका अध्यक्ष डा.बाबुराम पोखरेल, ग्यालेक्सी पब्लिक स्कुलकी पि्रन्सिपल तथा एन प्याब्सनकी अध्यक्ष गीता राणासमेत फोरम लोकतान्त्रिकको सभासदको सूचीमा परेका छन् ।यस्तै व्यापारीहरू डा.सुबोध पोखरेल र दिनबन्धु अग्रवाल पनि गच्छदारको सूचीमा छन् । पार्टी केन्द्रीय समितिले समानुपातिकका १० सभासद छान्ने अधिकार अध्यक्ष गच्छदारलाई दिएको थियो । फोरम लोकतान्त्रिकले समानुपातिक सूचीमा रहेका उपाध्यक्ष मोहम्मद नसिर सिद्दिकी, महासचिव जितेन्द्रनारायण देव र सचिव चन्द्रेश्वर खत्वेलाई समेटेन । कोषाध्यक्ष आशा चतुर्वेदीलाई भने उसले समेटेको छ ।
यस्तै सद्भावना अध्यक्ष राजेन्द्र महतोले पनि श्रीमती शैलदेवी र व्यापारी विमल केडियालाई सभासद बनाएका छन् । सद्भावना अध्यक्ष महतो भने सर्लाही ४ मा तराई मधेस सद्भावना पार्टी -तमसपा) अध्यक्ष महेन्द्र यादवबाट पराजित भएका थिए । पार्टीले अध्यक्षलाई नै नाम छान्ने अधिकार दिएको थियो । सद्भावनाले अघिल्लो पटक पनि समानुपातिक सभासद रहेका सहअध्यक्ष लक्ष्मणलाल कर्णसहित उपाध्यक्ष नरसिंह चौधरीलाई सभासद बनाएको छ । तराई मधेस लोकतान्त्रिक पार्टी -तमलोपा) ले पनि पैसावाल र व्यापारिक पृष्ठभूमिकालाई सभासद बनाएको छ । अघिल्लो पटक पनि मन्त्रिपरिषद्को सिफारिसमा सभासद बनेका अकबाल अहमद शाहसहित अस्पताल व्यवसायी डा.विजय सिंह, पैसावाल राजकुमारी गडेरियालाई तमलोपाले सभासद बनाएको हो ।
शरतसिंह भण्डारी नेतृत्वको राष्ट्रिय मधेस समाजवादी पार्टी -रामसपा) लेसमेत दुई व्यापारीसहितलाई सभासद बनाएको छ । पार्टीकी सल्लाहकार तथा व्यापारी निर्जला राउत र अर्का दिनेशप्रसाद साह र धर्मेन्द्र साहलाई समानुपातिक सभासद बनाएको हो । व्यक्तिगत फाइदा उठाएर सभासदमा सिफारिस गरेको भन्दै महासचिव रामेश्वर साहले अध्यक्षको भण्डाफोर गर्ने बताएका छन् । 'अध्यक्षले पार्टीको हितविपरीत पैसा लिएर सभासद बनाएका छन्,' उनले कान्तिपुरसित भने, 'अध्यक्षविरुद्ध अविश्वासको प्रस्ताव अघि बढ्छ ।'
संघीय सद्भावना अध्यक्ष अनिल झाले पनि महतोको सिको गर्दै एक सिटमा श्रीमती डा.डिम्पलकुमारी झालाई सभासदका लागि सिफारिस गरेका छन् । झा भने रौतहट १ बाट पराजित भएका थिए । मधेसी जनअधिकार फोरम गणतान्त्रिकका अध्यक्ष राजकिशोर यादवले पनि पाएको एक सिटमा श्रीमती सरिता यादवको नाम पठाएका छन् । 'अध्यक्षले श्रीमतीलाई नै पठाउँछन् भन्ने पहिले नै थाहा थियो,' पार्टी वरिष्ठ नेता राजलाल यादवले भने । फोरम नेपालले भने सोमबार नाम बुझाएन ।

प्रकाशित : पुस १६, २०७० १०:१९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT