९ सदस्यीय जिल्ला समन्वय समिति

कान्तिपुर संवाददाता

कपिलवस्तु — यहाँको जिल्ला समन्वय समिति ९ सदस्यीय हुने भएको छ। जिल्लाका १० स्थानीय तहमा निर्वाचित मेयर/उपमेयर र प्रमुख/उपप्रमुखको प्रथम जिल्ला सभा बैठकले उक्त निर्णय गरेको हो।

बढीमा ९ सम्म जिसस बनाउने व्यवस्था रहेकोमा यहाँका पदाधिकारीले अधिकतम सदस्य रहने समिति बनाउने र उक्त जानकारी निर्वाचन आयोगलाई गराउने निर्णय गरेको छ। 
१० स्थानीय तहका २० मतदाता रहेको जिससमा स्थानीय तहमा निर्वाचित ५ सय २६ जनामध्येबाट जोसुकैले उम्मेदवारी दिने व्यवस्था रहेको जिल्ला निर्वाचन अधिकारी ज्ञानहरि घिमिरेले बताए। निर्वाचनबाट समन्वय समितिका लागि प्रमुख, उपप्रमुख, तीन महिला सदस्य, एक दलित अल्पसंख्यक सदस्य र तीन खुला सदस्य गरी नौ जना चयन हुने बनाइएको छ। 

Yamaha

Esewa Pasal

प्रकाशित : श्रावण १५, २०७४ ०९:५३
प्रतिक्रिया
पठाउनुहोस्
ADVERTISEMENT

जिसस एमाले एक्लैले बनाउने

कान्तिपुर संवाददाता

लमजुङ — जिल्ला समन्वय समिति एमाले एक्लैले बनाउने तयारी गरेको छ। ४ गाउँ र ४ नगरपालिकाका निर्वाचित प्रमुख र उपप्रमुखको १६ जनामा एमालेको बहुमत छ।

वैशाख ३१ गतेको स्थानीय तह चुनावमा एमाले–माओवादी गठबन्धन भएको थियो। कार्यापालिका चुनावमा गठबन्धन तोडेको र उद्योग वाणिज्य संघमा कांग्रेससँग गठबन्धन गरेको भन्दै एमालेको एक पंक्तिले माओवादी केन्द्रबाहेक नै समन्वय समिति बनाउनुपर्ने दबाब पार्टीमा दिएका छन्। 
समन्वय समिति निर्माणमा माओवादी केन्द्रले आफ्नो सदस्य राख्नलाई कुनै जानकारी नगराएपछि एमाले एक्लैले समन्वय समिति बनाउने तयारी गरेको हो। एमाले अध्यक्ष धनञ्जय दवाडीले समन्वय समिति एक्लै बनाउने वा के गर्ने भन्ने विषयको टुंगो आइतबारको जिल्ला कमिटी बैठकको निर्णयबाट हुने बताए। केन्द्रीय स्थायी कमिटीको बैठकले समन्वय समिति आइतबार बस्ने बैठकले प्रमुख र उपप्रमुखको टुंगो लगाउने र आवश्यक ७ जना सदस्यको टुंगो आइतबार नै बस्ने जिल्ला कमिटी बैठकले टुंगो लगाउने उनले बताए। जिल्ला समन्वय समिति ९ सदस्यीय हुनेछ।
जिल्ला समन्वय समितिका लागि १६ मतदातामध्ये एमालेसँग प्रमुख ४ र उपप्रमुख ५ गरी ९ जना छन्। कांग्रेसँग प्रमुख २ र उपप्रमुख ३ जना गरी ५ छन्। माओवादी केन्द्रसँग १ प्रमुख र १ उपप्रमुख गरी २ मतदाता रहेको छ। एमालेको बहुमत रहेकाले उसैले समन्वय समिति बनाउने भन्दै कांग्रेसले खासै तयारी गरेको छैन। माओवादी केन्द्रले पनि कुनै तयारी गरेको छैन। कांग्रेस सभापति भेषबहादुर पौडेलले जिल्ला समन्वय समितिमा उम्मेदवारी दिनलाई के गर्ने भन्ने विषयमा यसअघि एकपटक बैठक भएको र फेरि बैठक बसेर टुंगो लगाउने बताए। ‘उम्मेदवारी दिने वा नदिने विषयमा औपचारिक निर्णय भएको छैन। हामी छलफलमै छौं,’ उनले भने। 
समन्वय समितिको निर्वाचन साउन २२ गते गरिँदै छ। मुख्य निर्वाचन अधिकृतको कार्यालयले निर्वाचन तालिका बनाएर तयारी थालेको छ। मुख्य निर्वाचन अधिकृत एवं जिल्ला न्यायाधीश अर्जुन अधिकारीले निर्वाचनको तयारी थालिएको बताए। उनका अनुसार १८ गते उम्मेदवारको मनोनयन दर्ता हुनेछ। १९ गते मनोनयन पत्रको जाँच र उजुरीउपरको निर्णय गर्ने, उम्मेदवारको नामावली प्रकाशन गर्ने र उम्मेदवारले आफ्नो नाम फिर्ता लिने कार्यतालिका बनाइएको छ। साउन २० गते उम्मेदवारको अन्तिम नामावली प्रकाशन गर्ने र उम्मेदवारलाई निर्वाचन चिह्न प्रदान गर्ने कार्यक्रम रहेको छ। २२ गते ११ बजेदेखि २ बजेसम्म मतदानको समय तोकिएको उनले बताए। 
समन्वय समितिको सभापति, उपसभापति र सदस्य को हुने भन्ने चर्चा चलेको छ। एमाले जिल्ला कमिटीले समन्वय समितिको सभापतिका लागि ६ जना र उपसभापतिका लागि ४ जनाको नाम प्रदेश कमिटीमा सुझावका लागि पठाएको थियो। 
सभापतिका लागि प्रेम बस्नेत, गोविन्द बस्नेत, भोजबहादुर रिमाल, लोकराज पाण्डे, हीरादेवी घले र नन्दराम विश्वकर्माको नाम प्रदेश कमिटीमा पठाएको थियो। उपसभापतिमा विष्णुमाया राना, धनमाया तामाङ, ज्ञानुमाया नेपाली र उषा गुरुङको नाम सिफारिसमा परेको थियो। प्रदेश कमिटीले केन्द्रीय कमिटीमा सभापति र उपसभापतिको नाम सिफारिस गरिसकिएको एमालेले जनाएको छ। 

प्रकाशित : श्रावण १५, २०७४ ०९:५२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT