पुल नबन्दा आउजाउमा सास्ती

-२० मिनेटको बाटो हिँड्न एक घण्टा
-बिरामीलाई सकस
-वर्ष बित्यो, पुल निर्माण भएन
वसन्तप्रताप सिंह

बझाङ — गत वर्ष असार महिनामा बाहुलीगाढ खोलामा आएको बाढीले जिल्लाका दक्षिणपश्चिमी भेगका साबिकका २६ गाविसलाई सदरमुकामसँग जोड्ने झोलुंगे पुल बगाएपछि सदरमुकाम आउजाउ गर्न समस्या भएको छ ।

पुल नहुँदा सदरमुकामका विभिन्न विद्यालयमा पढ्ने रिठापाटा र सुवेडाका बालबालिकालाई समस्या भएको अभिभावकले बताए । स्कुल समयमा विद्यार्थीको भीडभाड हुने बाटोमा अहिले पिठ्युँमा विद्यार्थी बोकेका अभिभावकको लर्काे देखिन्छ ।
हिउँदको समयमा काठको साँघुबाट आवतजावत गर्ने गरिएको भए पनि असारको अन्त्यतिर आएको बाढीले साँघुसमेत बगाएपछि थप समस्या भएको हो । पुल हुँदा १० मिनेटमै सदरमुकाम पुग्ने गरेका बालबालिकाहरूले अहिले आधा घण्टाको यात्रा गर्नुपर्ने बाध्यता आएको छ । पुल बगाएपछि सुबेडा, सिमखेत, नौरा, देबल, रिठापाटा लगायत क्षेत्रका साना बालबालिकाहरूलाई निकै समस्या भएको देवलका वीरेन्द्र धामीले बताए ।
झोलुंगे पुल बगाएपछि सदरमुकाम आउनेहरू पहिले पुल भएको ठाउँभन्दा झन्डै ३ किलोमिटर माथिबाट घुमेर आउनुपर्ने अवस्था छ । ‘खोलामा पुल हुँदा छिट्टै चैनपुर पुगिन्थ्यो । केटाकेटी आफैं हिँडेर स्कुल जान्थे,’ सुबेडाकी रुपा जोशीले भनिन्, ‘यति लामो बाटो बच्चा हिँड्न सक्दैनन् । घरको सबै काम छोडेर बच्चालाई स्कुल छोड्न र लिन आउनुपर्छ । दिनको ४ घण्टा बच्चाकै लागि खर्च गर्नुपर्दा घरको काम चौपट भएको छ ।’ पहिला २० मिनेट जतिमा सदरमुकाम पुगिने उनको गाउँबाट अहिले झन्डै एक घण्टा हिँड्नुपर्छ । समयमा नपुग्दा स्कुलसमेत छुट्ने गरेको उनले बताइन् । लामो र गाडी चलिरहने सडक भएकाले छोराछोरीलाई एक्लै विद्यालय पठाउन नसकिएको कमला बुढाले बताइन् । उनले भनिन्, ‘सडकमा गाडीहरू ओहोरदोहोर गरिरहेका हुन्छन् । पहिले पो गाडी नगुड्ने भएर ढुक्क भएर पठाउँथ्यौं । अहिले ढुक्क हुन सक्ने अवस्था छैन । काम छोडेरै भए पनि स्कुल त पुर्‍याउनुपर्‍यो ।’
झोलुंगे पुल हुँदा विद्यालय समयभन्दा १५/२० मिनेट अगाडि नै पुग्ने विद्यार्थीहरू अहिले प्रायजसो ढिलो गरी आउने गरेको शिक्षकहरू बताउँछन । विशेष गरी सुबेडा, नौरा, देवल, सिमखेतबाट आउने विद्यार्थीहरू समयमा कहिल्यै पनि नपुग्ने गरेको सुदूरपश्चिमाञ्चल विद्या सदनकी प्रिन्सिपल सरस्वती ढुंगेल खत्रीको भनाइ छ । लामो बाटो हिँडेर आएका विद्यार्थीहरू थकाइले कक्षाकोठामै निदाउने गरेको उनले बताइन् ।
यस्तै, पुल बगाएपछि जिल्ला अस्पतालमा उपचार गर्न जाने बिरामीलाई पनि समस्या छ । ‘पहिले छोटो बाटो भएकाले आफैं हिँडेर जाने बिरामीलाई पनि अहिले या त बोकेर लैजानुपर्छ या त महँगो भाडा तिरेर जिप रिजर्भ गर्नु पर्छ । पुल नहुँदा समस्या भएको छ,’ बिरामीका आफन्त मंगल खडकाले भने ।
जिल्ला प्राविधिक कार्यालयका प्रमुख जगतप्रसाद जोशीले झोलुंगे पुल निर्माणका लागि ठेक्का प्रक्रिया पूरा भइसकेको र यसै वर्षभित्र निर्माण सक्ने गरी ठेकेदार कम्पनी जागृति निर्माण सेवासँग सम्झौतासमेत भइसकेको बताए । उनले भने, ‘यो बर्खा जति दु:ख भयो भयो । अर्काे बर्खाबाट यस्तो समस्या भोग्नु नपर्ला ।’

प्रकाशित : श्रावण २९, २०७४ ०८:२१
प्रतिक्रिया
पठाउनुहोस्
ADVERTISEMENT

महिनापछि जाहेरी दर्ता

कान्तिपुर संवाददाता

नवलपरासी — प्रहरीले सामूहिक बलात्कार घटनाको निवेदन एक महिनापछि दर्ता गरेको छ । यसअघि उसले जाहेरी दर्ता गर्न मानेको थिएन । बर्दघाट नगरपालिकाकी १४ वर्षीया एक किशोरीमाथि सामूहिक करणी गरिएको एक महिनापछि बुधबार जिल्ला प्रहरीले निवेदन दर्ता गरेको हो ।

गत असार २६ गते राति गाउँकै ७ जना युवकले जबरजस्ती करणी गरेको पीडितको आरोप छ । उनलाई त्यो साँझ नजिकमा घुम्न बोलाएर जबरजस्ती करणी गरेको पीडितले बताइन् । स्थानीय टाठाबाठा र प्रहरीको मिलेमतोमा घटना गाउँमै मिलाउने प्रयास भएको थियो । निवेदन दर्ता नगराउन पीडितलाई दबाब दिइएको थियो । घटनाको चौथो दिनदेखि किटानी जाहेरीसहित निवेदन दिँदा पनि प्रहरीले निवेदन दर्ता गर्न मानेको थिएन । बुधबार जिल्ला प्रहरीको गेटमा प्रहरी र प्रशासनविरुद्ध नाराबाजी गरेपछि निवेदन दर्ता गरेको पीडित पक्षका पप्पु रेग्मीले जानकारी दिए । पीडित पक्षले जिल्ला प्रहरीमा आरोपीलाई छिटो कारबाही माग गर्दै बिहीबार पनि नाराबाजी गरे । जिल्ला प्रहरीका डीएसपी विष्णुहरि कोइरालाले किटानी जाहेरी लिएर ५ जनालाई पक्राउ गरी अनुसन्धान थालिसकेको बताए । ‘फरार रहेकाहरूको पनि खोजी जारी रहेको छ,’ उनले भने । 
निवेदन दर्ता अस्वीकार गरेको साँचो नभएको दाबी गर्दै केही प्राविधिक पक्ष नमिलेका कारण ढिलाइ भएको प्रहरीले जनायो । पीडित पक्षले भने घटना गाउँघरमै मिलाउन र निवेदन लिएर नआउन दबाब दिएको बताए । कक्षा ९ मा अध्ययनरत किशोरीलाई बलात्कार गरेको आरोपमा स्थानीय राजेश चौधरी, नीराजन चौधरी, राजकुमार चौधरी, होमनाथ चौधरी र अभिषेक बस्ताकोटीलाई पक्राउ गरिएको प्रहरीले जानकारी दिएको छ । 

प्रकाशित : श्रावण २९, २०७४ ०८:२१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT