त्रिविको पुन:संरचना आवश्यक

विश्वविद्यालयको व्यवस्थापकीय पक्ष कति कमजोर छ, त्यो यहांँ लेखिरहनु आवश्यक छैन । सबै प्राज्ञ वर्गलाई अवगत नै छ । यसमा त्रिवि नेतृत्वको ध्यान जानु आवश्यक छ । अझ मैले उठान गर्न खोजेको हालै हुनगइरहेको दीक्षान्त समारोहमा दीक्षित हुने विद्यार्थीले फर्म भर्दा पाएको सास्तीको विषय हो । देशकै पहिलो विश्वविद्यालयको यो व्यवस्थापन पक्षलाई हेर्दा हामी र हाम्रो प्राज्ञिक स्तर कहांँ रहेछ, सजिलै बुझ्न सकिन्छ । देशकै यति ठूलो संस्थामा अनलाइनबाट फर्म भरेर बुझाउने र जुनसुकै बैंकमार्फत रकम बुझाउने एउटा यति सानो पद्धतिको विकास त गर्न सकिन्छ नि ? एउटा जावो फर्म भर्न दिनभर माया मार्नुपर्ने के कसैको पनि काम हुँदैन ? त्यसै त विद्यार्थी वर्गलाई काठमाडौंमा बाँच्न धौधौ भइसक्यो । यो भदौको घाममा विद्यार्थीहरू कहिले यता लाइन बस कहिले उता लाइन बस । यो संस्थाप्रति विद्यार्थीले गौरव गर्ने ठाउँ खै ? हुन त त्रिवि नेतृत्व वर्गलाई कहाँ फाइदा हुन्छ, कुन नेताको पछाडि लाग्ने ? यिनीहरूलाई नेताको चाकडी गर्नै फुर्सद छैन । विद्यार्थीको सुविधा र त्रिविको सुधारको लागि सोच्ने समय पनि छैन । 
– उद्धव सापकोटा
काठमाडौं