लोकतन्त्रमा नसुहाउँदो काम

काङ्ग्रेस सभापति एवं प्रधानमन्त्री शेरबहादुर देउवाले ५४ जनाको जम्बो मन्त्रीमण्डल बनाएका छन् । अब के.पी. ओलीले जस्तो ६ वटा उपप्रधानमन्त्री पनि राख्ने हो भने पूर्णरूपमा ओलीपथ हुनेछ । अनि ओलीकै जस्तो कालोबजारी र महँगीलाई पनि बढावा दिने हो भने ओलीको कार्यले पूर्णता पाउनेछ ।

देउवा प्रधानमन्त्री हुँदा सकेसम्म सानो र छरितो मन्त्रीमण्डल बनाउने सबैले आशा राखेका थिए । तर उनले आम मानिसको आशालाई पटक्कै ध्यान दिएनन् । ओली, प्रचण्ड र देउवा तीनैजनाले मण्डले लिएर सरकार चलाउने हर्कत गरे । यी नेताहरूको किन यति ठूलो मण्डले मोह ? के यी पञ्चहरूले नेपालमा लोकतन्त्र ल्याएका हुन् ? भनौं भने लोकतन्त्र ल्याउन लडेका मानिसको अझै बेहालत छ । कैयौं अङ्गभङ्ग छन् भने कैयौंको अझै उपचार हुन सकिरहेको छैन । अझ हाम्रा प्रधानमन्त्री देउवाकै पनि यिनै पञ्चहरूले जिब्रोमा करेन्ट लगाइदिएर जिन्दगीभर बोल्न गार्‍हो बनाइदिएको उनले भुसुक्कै बिर्सेछन् कि ? 
अहिलेको मन्त्रीमण्डलको काम भनेको चुनाव गराउनु मात्रै हो । चुनाव आउन साढे २ महिनामात्र बाँकी छ । चुनावपछि यो मन्त्रीमण्डल स्वत: विघटन हुन्छ । जाबो ढाई महिनाका लागि मन्त्रिपरिषद् हेरफेर नगरेको भए के हुन्थ्यो र ? उनले जसरी अहिले मन्त्रीमण्डल विस्तार गरे, त्यसले निर्वाचन आचारसंहिता त उल्लंघन भयो नै, साथै उनीमाथि भइरहेको अवाञ्छित विरोधमाथि आगोमा घिउ थप्ने काममात्र हुनेछ । लोकतन्त्रमा पञ्चहरूको सत्तारोहण ढाकाटोपीमाथि गुहेंँलाको फूलजस्तो छ भने कांग्रेस–कम्युनिष्टले तिनलाई दिने गरेको पुरस्कारले जगत्मा हाँसोको विषय बनेको छ । त्यसमा पनि प्रजातन्त्रका लागि लडेका कांग्रेस, एमाले र गणतन्त्रको मसिहा ठान्ने माओवादी केन्द्रको मण्डले मोह हेर्दा यसलाई लोकतन्त्र भन्न हामीलाई लाज लागेको छ । देउवाजी † कमसेकम तपाईं प्रजातन्त्रका निम्ति लडेको मानिसले यसो नगर्दा के बिग्रिन्थ्यो ? पञ्च पार्टी सत्तामा नल्याउँदा भूकम्पै त जाने थिएन होला अथवा सरकारै गिरिहाल्ने अवस्था पनि थिएन । 
– ज्यो. रत्ननिधि रेग्मी ‘शुक्राचार्य’
महाकवि देवकोटा आश्रम, काठमाडौं 

प्रकाशित : भाद्र २९, २०७४ १०:२४
प्रतिक्रिया
पठाउनुहोस्

चक्रपथ यातायातमा ठगी !

काठमाडौंं बाहिर जाने सिलसिलामा बस टिकट खरिद गर्न भदौ २७ मा नयाँ बसपार्क जाँदै थिएँ । ललितपुरको ग्वार्कोबाट महानगर बससेवा लेखिएको तर पुरानो बा.२.ख.४६५३ नंं.को चक्रपथमा चल्ने बसमा यात्रा गरी बिहान ६.३० बजे नयाँ बसपार्क पुगेंँ ।

बस भाडा तिर्न मेरो ज्येष्ठ नागरिकको प्रमाणस्वरूप परिचयपत्रका साथ २० रुपैयाँ दिएँ । हुन त ९ रुपैयाँमात्र लिनुपर्ने भए तापनि १० रुपैयाँ नै लिने प्रचलन छ क्यारे । केही बेरसम्म प्रतीक्षा गरी मलाई १० रुपैयाँ फिर्ता खोइ त भनी माग्दा बसका सहचालकले आँखा तर्दै झर्केर कार्डसहित २० रुपैयाँ नै हो भनी पैसा फिर्ता गर्न मानेनन् । मैले पुन: फिर्ता रकम माग गर्दा गालीगलौज गर्दै गयो । मलाई साह्रै उदेक लाग्यो र तुरुन्तै १०३ नंंं.मा फोन गरी सबै वृत्तान्त बताएँ र कारबाही गरी मेरो मोबाइलमा जानकारी गराउन अनुरोध गरेंँ । तर बेलुकासम्म कारबाही भए/नभएको खबर नपाएपछि पुन: ट्राफिक प्रहरीलाई कारबाहीको अनुरोध गर्दै टेलिफोन गरेंँ । त्यसको पृष्ठपोषण प्राप्त भएको छैन । कुरो अर्थात रकम २० रुपैयाँ थोरै हो, तर नियत कति खराब हो ? म जस्तो सचेत नागरिकलाई त यसरी ठगी गर्ने बसले सोझासिधा यात्रीलाई कति ठग्लान् ? त्यसकारण रकम थोरैभन्दा पनि खराब आचरण र अन्यायलाई निरुत्साहित गर्नैपर्ने देख्छु ।
– गंगाराज अर्याल
ग्वार्को, ललितपुर–१७ 

प्रकाशित : भाद्र २९, २०७४ १०:२४
पूरा पढ्नुहोस्
प्रतिक्रिया
पठाउनुहोस्