ठेक्का तोडियो

कान्तिपुर संवाददाता

प्यूठान — खवाङ स्वास्थ्यचौकी भवनको ठेक्का तोडेर पुनर्निर्माण प्रक्रियामा लैजान थालिएको छ । लामो समयसम्म ठेकेदारले भवन निर्माण अलपत्र पारेपछि सहरी विकास विभागले ठेक्का तोड्ने निर्णय गरेको हो ।

२०६९ असोजमा निर्माण सम्पन्न गर्नुपर्ने सम्झौता भए पनि ठेकेदारले भवन अलपत्र छाडेका थिए । सहरी विकास तथा भवन डिभिजन कार्यालय रोल्पा मार्फत ‘नेपाल प्रगति/राप्ती/उच्च हिमालय जेभीले निर्माणको जिम्मा लिएको थियो । करबाहेक ७७ लाख ८८ हजार ६ सय ९५ रुपैयाँमा ठेक्का भएको थियो । कार्यालयका अनुसार ठेकेदारले भवन निर्माण गर्ने काम सुरु नगरेकाले ठेक्का तोड्ने प्रक्रियामा गएको हो ।
‘विभागले सोमबार ठेक्का तोड्ने निर्णय गरेको जानकारी कार्यालयमा आएको छ,’ भवन डिभिजन कार्यालयका लेखा अधिकृत भगबहादुर दसौंदीले भने, ‘ठेकेदारलाई कारबाहीको पत्र थमाएपछि लागत अनुमान गरी प्रक्रियाअघि बढ्छ ।’ उनले ठेकेदारले हालसम्म ५३ लाख ५२ हजार ९ सय ८० रुपैयाँ भुक्तानी लिइसकेको पनि बताए ।
‘ठेकेदारबाट मोबिलाइजेसनको ९ लाख ९ हजार रुपैयाँ असुली गरिसकेका छौं,’ दसौदीले भने, ‘अब बैंक ग्यारेन्टीको ४ लाख ४१ हजार असुली प्रक्रिया अगाडि बढ्छ ।’ उनले ठेकेदाको फर्म कालोसूचीमा पर्ने बताए । २ तलाको १६ कोठे भवन निर्माण गर्ने स्टिमेट रहेकामा ६५ प्रतिशत मात्र काम गरी ठेकेदारले अलपत्र पारेको कार्यालयको भनाइ छ । स्थानीय मजदुरले काम गरेको ज्यालासमेत पाएका छैनन् । ५२ मजदुरले १५ लाख ९३ हजार ८ सय ७४ हजार रुपैयाँ ज्याला पाउन बाँकी रहेको मजदुर शोभाराम पुनले बताए ।

प्रकाशित : भाद्र २९, २०७४ १०:३९
प्रतिक्रिया
पठाउनुहोस्

उमेर नपुग्दै सम्बन्धविच्छेद

बालविवाह
हरि गौतम

रुकुम — जिल्ला अदालत मुसीकोटमा १४ वर्षीयाले सम्बन्धविच्छेद गरिपाउँm भनेर निवेदन दिइन् । मुसीकोट नगरपालिका घर भएकी उनको मुद्दा प्रक्रियामै छ । अदालतका अनुसार अबको केही समयमै उनको मुद्दा किनारा लाग्नेछ ।


उनको पतिको स्थायी ठेगानामा म्याद तामेल पत्र छाडिएको छ । त्यसको प्रत्युत्तर वा म्याद तामेलको मिति कटेपछि उनको मुद्दाले स्वत: इजलास प्रवेश पाउनेछ । उनको यो उमेर पढ्ने लेख्ने हो । उनी भने सम्बन्धविच्छेदका लागि अदालत धाइरहेकी छन् । जिल्ला अदालतमा सम्बन्धविच्छेदको मुद्दा दिने उनी सबैभन्दा कान्छी पनि हुन् । तर उनीभन्दा बढीका मुद्दा दिने पनि छन् । उनीहरूको पनि बिहे गर्ने उमेरै पुगेको छैन । सम्बन्धविच्छेदको मुद्दा लिएर अदालत पुग्ने कम उमेरका किशोरकिशोरी संख्यात्मक रूपमा बढी छन् ।
अदालतमा पर्ने सम्बन्धविच्छेदका कुल मुद्दामध्ये १४ देखि २० वर्ष उमेर समूहका किशोरीको संख्या ५० प्रतिशत छ । आव ०७३/७४ मा जिल्ला अदालतमा परेका कुल मुद्दाको ३७.२७ प्रतिशत मुद्दा सम्बन्धविच्छेदकै छन् जसमा ५० प्रतिशत मुद्दा २० वर्षमुनिकाकै रहेको जिल्ला न्यायाधीश डण्डपाणी शर्माले बताए । आव ०७३/७४ मा जिल्ला अदालतमा परेका ३ सय ६१ र आव ०७२/७३ बाट जिम्मेवारी सरेर आएका ८७ गरी ४ सय ४८ मध्ये १ सय ६७ मुद्दा सम्बन्धविच्ेछदकै थिए ।
‘यहाँ सम्बन्धविच्ेछदका लागि पर्ने मुद्दाका आधा मुद्दा २० वर्षमुनिका छन्,’ न्यायाधीश शर्माले भने, ‘पढाइलेखाइ गरी भविष्य बनाउने बेला बिहे र सम्बन्धविच्छेदको झमेलामा किशोरीहरू फस्नु ठूलो समस्या छ ।’ स्रेस्तेदार तेजप्रसाद पौडेलले गत साउनयता २६ सम्बन्धविच्ेछदका मुद्दा दर्ता भएको जनाए । गत आवबाट जिम्मवारी सरेर आएका २२ र चालु आवको हालसम्म परेकामा गरी ४८ मुद्दा सम्बन्धविच्छेदकै छन् ।
सानै उमेरमा बिहे गर्ने र उमेर बढ्दै जाँदा बालविवाहप्रति वितृष्णा जागेसँगै सम्बन्धविच्छेदका लागि निवेदन दिने गरेको जिल्ला बाल कल्याण समितिले जनाएको छ । बालअधिकार अधिकृत मानवीर ओलीले जिल्लामा बालविवाहको चलनले सम्बन्धविच्छेदका घटना बढी भएको बताए । ‘उमेर बढ्दै जाँदा सचेतता पनि थपिँदै जाने र त्यसैले बिहेको उमेर नपुग्दै सम्बन्धविच्छेद हुनुपर्ने बाध्यता सिर्जना भएको हुन सक्छ,’ ओलीले भने । समितिका अनुसार हाल जिल्लाको बालविवाहको दर ५७ प्रतिशत छ ।

प्रकाशित : भाद्र २९, २०७४ १०:३९
पूरा पढ्नुहोस्
प्रतिक्रिया
पठाउनुहोस्