ढाका — अम्पायर बस्ने क्रममा क्रिकेट बलले लागेपछि शुक्रबार १७ वर्षीय युवक रफिकुल इस्लामको मृत्यु भएको छ । बंगलादेशको राजधानी ढाकास्थित बलुर माथ मैदानमा शुक्रबार अम्पायर बसेका उनी बलले छातीमा लागेपछि ढलेका थिए ।
गम्भीर अवस्थामा उनलाई ढाका मेडिकल कलेज हस्पिटल पुर्याइएको थियो । गरिब परिवारका इस्लामका बुवा रिक्सा चलाउँछन् भने आमा घरेलु मजदुर हुन् । इस्लामको शुक्रबारै अन्त्येष्टि गरिएको छ ।