दशकपछि शुद्ध खानेपानी

कान्तिपुर संवाददाता

दैलेख — दशकदेखि चर्चामा रहेको साहारे बृहत् खानेपानी आयोजना निर्माण अन्तिम चरणमा पुगेपछि स्थानीयले शुद्ध खानेपानी पाउने भएका छन् । आयोजनामार्फत १ हजार ८ सय ३ घरलाई चौबिसै घण्टा खानेपानी सुविधा पुर्‍याउने लक्ष्य राखिएको छ । आयोजना करिब ९५ प्रतिशत काम सकिएको स्थानीयले बताए ।


केही ग्रामीण क्षेत्रका घरमा मात्र खानेपानी जडान गर्न बाँकी रहेको साहारे खानेपानी उपभोक्ता तथा सरसफाइ समितिले जनाएको छ । समितिका अनुसार मुहानमै पानी फिल्टर गर्ने आधुनिक प्रविधि जडान गरिएपछि स्थानीयले घरमै शुद्ध खानेपानी पाएका हुन् । समितिले निर्माण सुरु भएको चार वर्षपछि निर्माण सम्पन्न गरिएको जनाएको छ । आयोजना २७ करोड लागतमा बनेको हो । आयोजना जनसंख्या हिसाबले पहाडी क्षेत्रको सबैभन्दा ठूलो मानिएको छ । नारायण नगरपालिका ४ सोतकी पार्वती न्यौपानेलाई पानीका लागि कुनै बेला बिहान ४ बजे उठेर एक घण्टा लाइन बसेर जोहो गर्नुपर्ने बाध्यता थियो । बिहानै उठदा र लामो समय लाइन बस्दा घरको काममा बाधा पुगेको उनी बताउँछिन् । गाउँका ५० भन्दा बढी घरले एउटै धारामा लाइन बसेर पानी भर्नुपर्ने बाध्यता थियो । ७० वर्षीय मयाराम विकले वृद्धावस्थामा शुद्ध खानेपानी पाउने भएकामा खुसी व्यक्त गरे । उनले पानीका लागि लामो समय सास्ती भोग्नुपरेको सम्झिए । विकका अनुसार स्थानीयले आकाशे पानीका भरमा निर्वाह गर्नुपर्ने अवस्था सुनाए ।
सुमेकचन्द्र एण्ड वसन्त जेभी ललितपुरले ठेक्का लिएको खानेपानी बृहत् योजनाअन्तर्गत नारायण नगरपालिकाका ११ वडामा विस्तार गरिएको समितिले जनाएको छ । योजनाको शुद्धीकरणका लागि २७ वटा विधामा पानी परीक्षण गरिएको खानेपानी विभागका उपनिर्देशक नारायण आचार्यले बताए । आयोजनाको ९५ प्रतिशत काम सकिएको छ । बाँकी पाँच प्रतिशत ग्रामीण भेगका घरमा धारा जडान गर्नु रहेको समिति अध्यक्ष बलराम श्रेष्ठले जानकारी गराए । 

 

प्रकाशित : आश्विन ३०, २०७४ १०:५५
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

मधेसबाट जन्तर बेच्न पहाड

ग्रहदशा शान्त हुने, भूतप्रेत भाग्ने, शरीरको दुखाइ कम गर्नेलगायत अन्धविश्वास
कान्तिपुर संवाददाता

जाजरकोट — इटहरी नगरपालिका १८, सुनसरीका मोहमद मस्तान र मोहमद अनुवर जन्तर तथा बुटी बेच्न मध्यपश्चिमका पहाड उक्लेका छन् । उनीहरू भेरी नगरपालिका ३, ठाँटीबजारको पीपलचौतारामा बसेर बुटी बनाउन र बिक्री गर्न व्यस्त छन् ।

ठाँटीचौतारामा बुटी किन्न स्थानीयको भीड नै लागेको छ । मस्तान र अनुवर जन्तर, बुटी बिक्रीका लागि अघिल्लो सातादेखि यहीँ छन् ।

ग्रहदशा शान्त पार्न, मसान भगाउन, झस्किने, तर्सने, बरबराउनेलगायत समस्या समाधानका लागि जन्तर, बुटीको प्रयोग हुने मस्तान बताउँछन् । उनीहरूले ठाँटीचौतारामा हिमाली, पहाडी र तराई क्षेत्रमा पाइने १ सय ८ ऐंजुरु प्रजातिका जडीबुटीका साथै जनावरको हड्डी र पुच्छरको पसल राखेका हुन् । उनीहरूसँग बुटी बनाउन वर, पीपल, चक्रचाली, भूतकेश, भोजपत्र, कम्मरी, सल्ली, लोठसल्ला, नागबेली, ताजबेली, नीम, पिरार, झौवालगायत जडीबुटी छन् । 
त्यस्तै कालो घोडाको टाप, हेल माछाको हड्डी, ऊँटको दाँत, कछुवाको हड्डी, चौंरीको पुच्छरलगायत पनि रहेको मस्तानले बताए । जडीबुटी र विभिन्न जनावरको हड्डीको टुक्रा मिसाएर जन्तर भर्ने गरेको उनीहरू बताउँछन् । उनीहरू प्रतिजन्तर २ सय ५० देखि हजार रुपैयाँसम्म लिन्छन् । जन्तर बिक्री गर्न भ्याइनभ्याइ भएको उनले बताए ।
उनीहरूले बिक्री गर्ने जन्तरमा प्रयोग गरिएका अधिकांश जडीबुटी हिमाली तथा पहाडी क्षेत्रमा पाइन्छन् । पहाडको जडीबुटी पहाडीलाई बिक्री गर्न तराईवासी आउँदा अनौठो लागेको स्थानीय टीकाराम वलीले बताए । आफ्नै जंगल, डाँडाकाँडा र लेकाली भेकमा पाइने जडीबुटीलाई जन्तरका नाममा मस्तान र अनुवरसँग महँगोमा किन्न हानथाप भएको छ । वलीका अनुसार उनीहरूले दैनिक सय सर्वसाधारणलाई जन्तर, बुटी बेचेर ३० हजारभन्दा बढी कमाइ गरेका छन् ।

प्रकाशित : आश्विन ३०, २०७४ १०:५५
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT