जनप्रतिनिधिलाई अभिमुखीकरण

छोटकरी
कान्तिपुर संवाददाता

जनकपुर — धनुषाबाट विजयी गाउँ तथा नगरपालिका अध्यक्ष उपाध्यक्ष, कार्यकारी प्रमुख एवं लेखा अधिकृतका लागि ‘स्थानीय सरकार सञ्चालन तथा बजेट तर्जुमासम्बन्धी अभिमुखीकरण’ तालिम शुक्रबार सुरु भएको छ ।

संघीय मामिला तथा स्थानीय विकास मन्त्रालयले गरेको तीन दिने अभिमुखीकरण तालिममा धनुषाका १८ स्थानीय तहका जनप्रतिनिधि र प्रशासकसहित ७२ जनाको सहभागिता रहेको छ । 
कार्यक्रममा संघीय प्रणाली र नेपालमा स्थानीय सरकार, स्थानीय सरकार सञ्चालन ऐन २०७४, स्थानीय तह सञ्चाल प्रक्रिया, वित्तीय व्यवस्था तथा आर्थिक कार्य प्रणाली, अन्तर सम्बन्धित विषयको व्यवस्थापन, पूर्वाधार विकाससम्बन्धी मापदण्ड, वार्षिक बजेट तथा कार्यक्रम तर्जुमा, एकीकृत गुरुयोजना तर्जुमालगायत विषयमा छलफल हुने मन्त्रालयका उपसचिव गुरुप्रसाद सुवेदीले जानकारी दिए । सहभागीलाई प्रशासकीय अदालतका न्यायाधीश काशीराज दाहाल, स्थानीय विकास मन्त्रालयका सचिव दिनेश थपलिया, उपसचिव सुवेदी तथा सुमन घिमिरेले प्रशिक्षित गर्ने छन् ।

प्रकाशित : कार्तिक २५, २०७४ ०७:२४
ADVERTISEMENT
प्रतिक्रिया
पठाउनुहोस्
ADVERTISEMENT

खानेपानीमा जापानी सहयोग

कान्तिपुर संवाददाता

मोरङ — विराटनगर महानगरपालिकाको खानेपानी सुधार र विकासका लागि जापान अन्तर्राष्ट्रिय सहयोग नियोग जाइकाले सहयोग गर्ने भएको छ । खानेपानी अवस्थाबारे जाइकाको प्रतिनिधिमण्डल, महानगरपालिका र खानेपानी संस्थानबीच छलफल भएको हो ।


जाइकाको नेपालका लागि वास एडभाइजर टाकासी सेकी र कार्यक्रम अधिकृत विद्या पोखरेलको टोलीले खानेपानी अवस्थाबारे जानकारी लिएको थियो । टोलीले यसको संरचनाको अनुगमनसमेत गरेको महानगरका कार्यवाहक प्रमुख इन्दिरा कार्कीले बताइन् ।
सेकीले विराटनगरको खानेपानी समग्र विकासका लागि सहकार्य गर्न जाइका तयार रहेको बताइन् । यसका लागि प्राविधिक रूपमा जाइका र महानगरले तयारी थालेको कार्कीको भनाइ छ ।
संस्थानका कामु सहायकप्रबन्धक शैलेन्द्रकुमार साहले महानगर क्षेत्रमा रहेको खानेपानी समस्याबारे बिस्तृत रूपमा जानकारी गराएका थिए । यसअघि विराटनगरमा खानेपानीको कारण जन्डिसबाट ८ जनाको मृत्यु भएको थियो भने संरचना जीर्ण हुँदा सडकमा जमेको र ढलको फोहोर पानीसमेत मिसिँदा अधिकांश उपभोक्ता समस्यामा परेकोसाहले बताए ।

प्रकाशित : कार्तिक २५, २०७४ ०७:२४
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT