गठबन्धनको दादागिरी
मंसिर १२ गते मध्यदिनमा राजधानीको नयाँबानेश्वर चोकको मूल सडक वाम गठबन्धनले कब्जामा लिए । मूल सडकमा वाम गठबन्धनले पूरै सडक बन्द गरी चुनावी आमसभा गर्यो । उक्त समयमा नयाँबानेश्वर क्षेत्रमा सम्पूर्ण सवारी साधनलाई आवत–जावतमा प्रतिबन्ध लगाइयो ।
सार्वजनिक सडकमा कुनै पार्टी विशेषले गरेको उक्त चुनावी सभामा सवारी साधनलाई प्रतिबन्ध लगाउनमा नेपाल प्रहरीले पनि निकै मिहिनेतका साथ सहयोग गरिरहेको देखियो । यसले गर्दा आम जनताले दु:ख र सास्ती भोग्नुपर्यो । के कुनै पार्टी विशेषले सार्वजनिक सडकमा आवागमन नै बन्द गरी चुनावी सभा गर्न पाउँछ, हुन्छ ? यो चुनाव आचारसंहिताको खुल्ला उल्लंघन हो कि होइन ? यो जनताको आवागमन स्वतन्त्रता माथिको हस्तक्षेप हो कि होइन ? यो वाम गठबन्धनको दादागिरी हो कि होइन ?
– गोविन्द श्रेष्ठ
नयाँबानेश्वर, काठमाडौं