‘अबको सरकारले भ्रष्टाचारी कसैलाई छाड्दैन’

कान्तिपुर संवाददाता

काठमाडौं — एमाले अध्यक्ष केपी ओलीले आगामी सरकारले भ्रष्टाचार गर्नेहरूप्रति कडा रबैया अपनाउने बताएका छन् । उनले राजनीतिक, कर्मचारी र व्यापारिक क्षेत्रमा हुने भ्रष्टाचार किटान गरी त्यसमा कडा नीति अवलम्बन गरिने उल्लेख गरे ।

भावी सरकारको नेतृत्व गर्ने तयारीमा रहेका ओलीले निकै चुनौतीपूर्ण अवस्था रहेकाले भ्रष्टाचार निर्मूल गरी अघि बढ्ने बताए ।
‘देशमा भ्रष्टाचार नियन्त्रण कसरी हुन्छ, आगामी सरकारले देखाउँछ । कुनै सुनुवाइ हुने छैन,’ राजधानीबाट निर्वाचित सांसदलाई बधाई तथा शुभकामना दिन वाम गठबन्धनले बुधबार आयोजना गरेको कार्यक्रममा अध्यक्ष ओलीले भने, ‘राजनीति, कर्मचारी र बिजनेस सेक्टरलगायतमा हुने भ्रष्टाचारप्रतिको रबैया कडा हुनेछ । हामी पूर्ण भ्रष्टाचारमुक्त देश बनाउनेछौं ।’ 
उनले प्रशासन र जनताले पाउने सुविधामा पनि कुनै सम्झौता नगर्ने बताए । प्रशासन चुस्त बनाई जनताको सेवामा समर्पित गराउने उनले उल्लेख गरे । सांसदहरूलाई पार्टीको मर्म र अहिलेको चुनौती बुझेर काम गर्न निर्देशन दिँदै ओलीले भने, ‘इमानमा तलमाथि पाइए, स्वच्छतामा खोट भेटिए, कुनै लापरबाही फेला परे पार्टीलाई सहय हुँदैन । उनले सांसदहरूलाई निर्देशन दिँदै भने, ‘हामी 
बहुमत चुनौतीपूर्ण अवस्थामा छांै, त्यसैले सबै क्षेत्रमा राम्रो काम गर्नुपर्नेछ ।’
चुनौतीपूर्ण अवस्था रहे पनि जनताका अगाडि सामना गर्न नसकिने कुनै अप्ठेरा नरहेको उनले उल्लेख गरे । ‘हामी आगामी दिनमा अब समयको आवश्यकता र जनताको चाहना पूरा गर्ने दिशामा अघि बढ्छौं,’ उनले भने ।
उनले समयको मर्म बुझेर एमाले र माओवादी केन्द्रबीच एकता हुन लागेको जानकारी दिए । पार्टी एकता हुन्छ कि हँुदैन भन्ने भ्रम नराख्न उनले आग्रह गरे । ‘कसैले हात समातेर लगेर पार्टी एकताको गुरुमन्त्र दिएर एकता हुन लागेको हो र ?’ उनले भने, ‘हामीले गरेको प्रयास हो नि । हामीचाहिँ विभाजित हुने अनि अरूले शासन गरिरहने ? यो अवस्थालाई बुझेर हामी एकतामा गएका हौं ।’ 
उनले एमाले र माओवादी केन्द्र एकजुट भएपछि आम रूपमा कम्युनिस्ट आादोलन एकजुट हुने उल्लेख गरे । ‘कसैले भावना भड्काउन खोज्छन् । कतिपयले माओवादीका साथीलाई गएर भन्छन्, माओवादीलाई त एमालेले निल्छ नि, एमालेमा पनि आएर भड्काउन खोज्ने कोसिस हुन्छ,’ उनले भने, ‘हो माओवादी केन्द्रले एमालेलाई निल्छ । एमालेले माओवादीलाई निल्छ अनि छुट्टै नयाँ पार्टी नयाँ ढंगले बन्छ ।’
उनले अब एमाले र र माओवादी खोजेर नपाइने बताए । एकताको कुराले दुवै पार्टीका कार्यकर्तामा आत्मविश्वास बढेको ओलीले उल्लेख गरे । उनले राष्ट्रिय सभाको अध्यादेशका विषयमा पनि कांग्रेसले राखेको अडानप्रति आपत्ति जनाए । यथास्थितिमा अध्यादेश राष्ट्रपतिले जारी गर्न नमिल्ने उनको तर्क थियो ।

 

Yamaha

प्रकाशित : पुस ६, २०७४ ०६:३७
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

‘नेतृत्वमाथि हस्तक्षेप गर्न युवा अभियान’

कांग्रेस युवा नेता भेला
कान्तिपुर संवाददाता

काठमाडौं — कांग्रेसका युवा नेताहरूले पार्टी नेतृत्व दोस्रो पुस्तामा हस्तान्तरण गर्न जोड दिने भएका छन् । चुनावमा पार्टी पराजयको समीक्षा गर्न बुधबार एक पार्टी प्यालेसमा बसेको युवा नेताहरूको बैठकले केन्द्रीय कार्यसमिति हुँदै महाधिवेशन बोलाउनुपर्ने माग गरेको छ ।

कांग्रेसका युवानेताहरूले पार्टी नेतृत्व दोस्रो पुस्तामा हस्तान्तरण गर्न जोड दिने भएका छन् । चुनावमा पार्टी पराजयको समीक्षा गर्न बुधबार एक पार्टी प्यालेसमा बसेको युवा नेताहरूको बैठकले केन्द्रीय कार्यसमिति हुँदै महाधिवेशन बोलाउनुपर्ने माग गरेको छ । केन्द्रीय सदस्य चन्द्र भण्डारीको संयोजनमा भएको बैठकमा नेताहरू गगन थापा, धनराज गुरुङ, बद्री पाण्डे, गुरुराज घिमिरे, महादेव गुरुङ, जीवन परियार, प्रदीप पौडेल, उमेशजंग रायमाझी, रामहरि खतिवडा, सुवास पोखरेल, उज्ज्वल बराललगायत थिए ।

नेता भण्डारीले पार्टीमा आमूल सुधारका लागि विचारसहितको कार्यक्रम लिएर युवाहरू अघि बढ्ने उद्देश्यसहित छलफल थालिएको बताए । ‘आजबाट कुनै गुट/उपगुटमा नलागी पार्टीको आमूल सुधारका लागि एक हुने अभियान थालेका छौं,’ भण्डारीले कान्तिपुरसँग भने, ‘वामपन्थीहरूसँग प्रतिस्पर्धा गर्न सक्ने पार्टी बनाउने हो भने अहिलेको नेतृत्वमाथि युवाहरूले हस्तक्षेप गर्नुपर्छ भन्ने नै हाम्रो मुख्य जोड हो ।’ युवा नेताहरूको बैठकले अहिलेको पुस्ताबाट पार्टी सञ्चालन हुन नसक्ने निष्कर्ष पनि निकालेको छ । युवा नेताहरूले परिवर्तनको चाप पछ्याउन सक्ने नेतृत्व पार्टीलाई आवश्यक रहेको भन्दै पहिलो पुस्तालाई विश्राम दिनुपर्ने बताएका थिए । पार्टीको नीति र नेतृत्वबारे छलफल गर्न पनि विशेष महाधिवेशन बोलाउनुपर्ने निष्कर्षमा उनीहरू पुगेका छन् ।
युवा नेता धनराज गुरुङले विशेष महाधिवेशन माग गर्ने विषयमा आइतबार बस्ने बैठकले तय गर्ने बताए । ‘चुनावमा पार्टी कसरी पराजय भयो भन्नेबारे मात्रै छलफल गरेका छौं, आइतबारको बैठकमा दस्ताबेजसहित नीति, कार्यक्रम र महाधिवेशन बोलाउनेबारे निर्णय लिन्छौं,’ उनले भने । भण्डारीले पार्टीभित्र गुट र उपगुटलाई तिलाञ्जली दिँदै पार्टी सुधारको महाअभियान युवाले सुरु गर्ने बताए । त्यसका लागि नेतृत्व परिवर्तनबाटै सुधार हुनुपर्ने उनीहरूको जोड छ । केन्द्रीय सदस्य प्रदीप पौडेलले उम्मेदवार चयन र वाम गठबन्धनसँग प्रतिस्पर्धा गर्ने रणनीतिक कार्यक्रम नहुँदा कांग्रेसले चुनावमा लज्जास्पद हार व्यहोर्नुपरेको निष्कर्ष बैठकमा आएको बताए । बैठकमा सबैजसो नेताले नेतृत्वकै कमीकमजोरीका कारण पार्टीले हार व्यहोर्नुपरेको धारणा राखेका थिए ।
‘यो हार वामपन्थी गठबन्धनका कारण मात्रै होइन, शीर्ष नेतृत्वले प्रभावकारी रणनीति नबनाउँदा र टिकट वितरणमा मनपर्दी गर्दाको परिणाम पनि हो,’ पौडेलले भने, ‘कसले जित्छ होइन, कसलाई टिकट दिँदा मेरो गुट बलियो हुन्छ भन्ने आधारमा उम्मेदवार बनाइयो । पार्टी नेतृत्वले कुनै रणनीतिक योजना पनि दिन सकेन ।’ बैठकमा सहभागी रामहरि खतिवडाका अनुसार पार्टी पराजय हुनुमा नेतृत्वमा रहेका सबैको कमजोरी देखिएको ठम्याइसहित यसमा छलफल गर्न तत्काल केन्द्रीय समिति बैठक बोलाउन माग गरिएको बताए । केन्द्रीय कार्यसमितिको बैठकमा उनीहरूले विशेष महाधिवेशनको माग गर्ने तयारीसमेत गरेका छन् ।

थापालाई संसदीय दलकोनेता बनाउन जोड

बैठकमा युवा नेता गगन थापालाई संसदीय दलको नेता बनाउनुपर्ने माग गरिएको छ । केन्द्रीय सदस्य धनराज गुरुङले थापालाई संसदीय दलको नेता बनाउन सके पार्टीमा आमूल सुधार हुने विश्वास व्यक्त गरे । थापाले भने यसबारे बैठकमा कुनै प्रतिक्रिया दिएनन् । उनले समयमै पार्टीमा आमूल सुधार गर्न नसके संगठनका लागि अझै ठूलो क्षति हुने बताएका थिए । थापालाई संसदीय दलको नेता बनाउनुपर्ने प्रस्तावमा अन्य नेताहरू पनि सकारात्मक देखिएका छन् । ‘पार्टी नयाँ ढंगले सञ्चालन हुन्छ भन्ने सन्देश जान्छ, सँगै नेतृत्वको परिवर्तन र युवा नेताहरूलाई नेतृत्वमा स्थापित गर्ने सन्देश पनि दिन्छ,’ गुरुङले थपे ।

प्रकाशित : पुस ६, २०७४ ०६:३७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT